Read tetala 1 Samuele 28 Bible Online

1 Samuele 28 - tetala bible

1 Samuele 28

¹Lu nshi sho asi Filistiya wakasanganya elui awo wʼalimbi, wakakitsha ului otoi, dia vo ndosha asi Isariyele. Akishi akatela Davidi ati: Mete, mete, eyi wati: We avutsho la mi lu ta, we la alimbi aye.

²Davidi akakaluya Akishi diui ati: Mete, mete, we ayena okone ayutsha ukambi aye. Ku Akishi akatela Davidi ati: Layukudja ndu ulami wʼelombwelo kami pundju.

³Samuele akavu. Isariyele tshe wakuleli, wakukhunde lʼusumba andi la Rama.[43] Saulu akanya wane wakateketshaka djimu ndu wane wakataka akambu wahatayi lu kete.[44]

⁴Asi Filistiya wakasangana, wakatuhanga la Shunema. Saulu akasanganya Isariyele tshe. Ku vo wakatuhanga la Ngiliboa.

⁵Lamʼakenyi Saulu ului wʼalimbi wʼasi Filistiya, ndi akuki woma; utema andi akadidima.

⁶Saulu akambula Latuyalaka. Ku Latuyalaka kumbukaluya diui lu alo, lu loyembo lʼaloho usasi,[45] kuyanga uma le amvutshi.

⁷Saulu akatela ekambi andi ati: Nyutunyangeli umuntu latoteketshaka djimu, keli dimi ndjutshu le ndi ntuwumbuli. Ku akambi andi wakawutela vati: Ulungi, la Ene-Dora keli umuntu omotshi latoteketshaka djimu.

⁸Okone Saulu akayafanya la untu ukina, akalote ahondo akina. Ku ndi akatshu la antu andi. Vo wakatukuma laka umuntu lʼutshu. Saulu akatela umuntu ati: Onteketshiya edimu, dia to mvutelami akambu wahatayi, umbeteli one layumukutela.

⁹Umuntu akûkaluya diui ati: Mete, we mbeyaka dikambu diaka-tshi Saulu, uku akandanya wane watoteketshaka djimu la wane watutaka akambu wahatayi lu kete. Okoko wana wambuyamba lumu lami djunga dia djakami?

¹⁰Saulu akutshibela le Latuyalaka ati: Uku eli Latuyalaka la lumu! nduku dikambu dia kolo diayuya le ye lu dikambu ne.

¹¹Umuntu akawumbula ati: Akona alangaye dimi nketela? Ku ndi akilkaluya diui ati: Umbeteli Samuele.

¹²Lamʼakenyi umuntu Samuele, ndi akadi kuku ya wulu, akambula Saulu ati: Dikambu kuna diakayankeshi? We eli Saulu!

¹³Khumʼekanga akawutela ati: Tukaki woma. Kakona kenaye? Umuntu akakaluya Saulu diui ati: Etemolatemola kemotshi kenami kayatumbi uma lu kete.

¹⁴Saulu akawumbula ati: Wuhu akona wendi? Ndi akûkaluya diui ati: Usumbi a pami mbayatumbi olote ukutu. Saulu akalimbitela ati: Samuele oso. Ku ndi akakole elundji lu kete, akukhusamela.

¹⁵Samuele akambula Saulu ati: Okoko wana wakayampenyihenyisha, dia mbetama okone? Saulu akunaluya diui ati: Dimi leko lʼatei wa sui dia wulu. Asi Filistiya wambolo la mi ta, la Unyashungu akamo uma le mi. Ndi kunkaluyami nduku diui uma le amvutshi kuyanga lu alo. Ku dimi lakaketshi dia we ndjunimbitshiya dikambu diahumbami ntsha.

¹⁶Samuele akawumbula ati: Ya ukundi amumbulaye ne dia Latuyalaka akamo uma le ye, ndu akayala utunyi aye?

¹⁷Latuyalaka ambukutshela uku akamatakutedi lu dikambu diandi. Latuyalaka akahotola diulelu uma lu anya aye, akadisha Davidi.[46]

¹⁸We kunkitanyia diui dia Latuyalaka, kuyanga nshidiya kele kandi ka wulu le Amaleka.[47] Diako mbambukutshela Latuyalaka wuhu one elo.

¹⁹Latuyalaka ayukimo ndu Isariyele kame la ye lu anya wʼasi Filistiya. Lui, we la anʼaye nyayuyala kame la mi. Latuyalaka ayukimo alimbi wʼasi Isariyele lu anya wʼasi Filistiya.

²⁰Kemʼedja Saulu akayahumanya la kete, akuki woma efula, ne dia aui wakawutela Samuele. Ndi akakomo, ne dia ndi konde ma yanyi tshe la utshu tshe.

²¹Umuntu akayi le Saulu lamʼakandenyi ati: Ndi ambundama la sasi. Ndi akawutela ati: We henyi dimi ukambi aye a umuntu lakuki diui diaye. Dimi lakasundjisha lumu lami dia nkitanyia aui wakayamvutedi.

²²Okone lambukosengasenga nti: Ndu we, ulungi diui dia ukambi aye a umuntu. Etawo dia dimi nkusha kyama ya ma keli uli, mbayuyuyala la wulu wa nkendakenda lu mbuka.

²³Keli ndi akatuni, akati ati: Dimi hali. Ku ekambi andi la umuntu uku wakosengasenga, okone ndi akawaukela. Ndi aketo uma la kete, akadjase lu tangi.

²⁴Umuntu aki la yana ya ngombe yununyi lakandi. Ndi akayidiaki esadi; akose shima, akakisohanya, akakitakati ma diaha la edya.

²⁵Ndi akadikitsha la ntundu ka Saulu la ekambi andi. Ku vo wakali. Lʼokongo diku, wakunela, wakatshu lʼutshu ako.