Read tetala 1 Samuele 29 Bible Online

1 Samuele 29 - tetala bible

1 Samuele 29

¹Asi Filistiya wakasanganya elui wʼalimbi la Afeka. Ku asi Isariyele wakahangi lasuki lʼeteko ka la Jezerele.

²Ewandji wʼasi Filistiya wakayi kame la elui awo wa kama kama, la elui awo wa nunu nunu. Ku Davidi la alimbi andi wakayayakaka lʼokongo awo kame la Akishi.

³Ewandji wʼasi Filistiya waka-mbwana vati: Katsha asi Heberu ane lane? Ku Akishi akakaluya ewandji wʼasi Filistiya diui ati: Aha Davidi, ukambi wa Saulu khumʼekanga ka Isariyele, one? Ndi ambudjase la mi edja, latutani nduku la munga ka tshitshe umaka lamʼakandakumi edja ndu elo.

⁴Keli ewandji wʼasi Filistiya wakuki Akishi kele, wakawutela vati: Ukaluya pami kene. Ndi akaluli lu dihuli diakayawusha. Ndi tatshokaki kame la su lu ta, atukututuyali utunyi omotshi lu ta. La na ayukalula pami kene dia ndi ntekesanela la khumendi, naka aha kame la ete wʼantu asu ane?

⁵Aha Davidi one lakawatimbaka, watano wenye vati: Saulu akadiaki kinunu, kinunu, Keli Davidi nunu dikumi, dikumi?[48]

⁶Akishi aketi Davidi, akawutela ati: Uku eli Latuyalaka la lumu! we eko pami kʼusimbwi. Dimi latongenangenaka nkena lamʼatuyutshokaka ndu lamʼatuyukalulaka kame la mi lu pangu. Dimi latakutani nduku la dikambu dia kolo umaka etena kakayakumi lakami edja ndu elo. Keli ewandji wʼasi Filistiya hawukongenangena.

⁷Okone ukaluli, utshu la ki, utukuyutsha dikambu dimotshi diahangenyangenya ewandji wʼasi Filistiya.

⁸Davidi akambula Akishi ati: Bundi, kakona kakamatshi, ndu dikambu diakona diakayatani le ukambi aye, umaka lamʼakamakumi lasuki la ye edja ndu elo, diahamatshu dia ntolosha atunyi wa khumemi khumʼekanga?

⁹Akishi akakaluya Davidi diui ati: Dimi mbeyaka nti: We eko ololo lu ashu ami uku ondjelo wa Unyashungu. Keli ewandji wʼasi Filistiya mbata vati: Ndi tatshokaki kame la su lu ta.

¹⁰Okone keto kʼolomo la pindju, we la ekambi wa khumeye, wakayi kame la ye. Kanyuneli, kanyutshu kamʼayuhuto unya.

¹¹Davidi la alimbi andi waketo la djikidiki, dia vo munela kʼolomo la pindju, la nkalula lu kete yʼasi Filistiya. Ku asi Filistiya wakatshu utsha la Jezerele.