Read tetala 1 Samuele 31 Bible Online

1 Samuele 31 - tetala bible

1 Samuele 31

¹Asi Filistiya wakalo lʼasi Isariyele ta. Asi Isariyele wakalawo asi Filistiya. Ku asi Filistiya wakatadiaka lʼukungu wa Ngiliboa.

²Asi Filistiya wakayelana la Saulu la anʼandi wʼapami. Vo wakatudiaka Jonatana, Abinadaba la Malekishua, ana wa Saulu.

³Ta diakaheki Saulu. Ambuki weta wakatuwunda, wakuhumuya wulu.

⁴K Saulu akatela omembi andi a dihumo dia ta ati: Osomole yombo yaye. Umpiki, ne dia wane wahatahemaka ehekeli aku, watukuyumbika ehumo ndu watukuyontenga. Keli omembi andi a dihumo dia ta kunanga, ne dia ndi akandama la woma. Ku Saulu akose yombo yandi, akayahumanya ladiku diayo.

⁵Lamʼakenyi omembi andi a dihumo dia ta ati: Saulu ambuvo, ndu ndi akayahumanya ladiku dia yombo yandi, akavu kame la ndi.

⁶Osoku mbakavu Saulu la anʼandi apami asatu, ndu one lakatawembelaka dihumo diandi dia ta, kame la antu andi tshe etena otoi lushi lako.

⁷Lamʼakenyi asi Isariyele waki lu wedi one wʼukidi ndu wa lu wedi one wa Jorodana vati: Asi Isariyele wambulawo, ndu Saulu la anʼandi wambuvo, vo wakatshiki esumba awo, wakalawo ndu vo. Ku asi Filistiya wakatshu, wakatudjase leko.

⁸La wedi a pindju asi Filistiya wakatshu dia ntosa diango diaki edu. Vo wakatani Saulu la anʼandi asatu wakavwi lʼukungu wa Ngiliboa.

⁹Wakahimbula Saulu ote, wakose dihumo diandi dia ta. Ku wakadianganya lukumu utsha le dikishi diawo dia lu kete tshe ya Filistiya ndu lʼatei a wudja.

¹⁰Vo wakakitsha dihumo dia ta diaki Saulu lu luudu la WaAshitarota. Ku wakamami udu andi lu eheli ka Bete-Shana.

¹¹Lamʼakuki asi Jabeshe-Ngiliyade lukumu uku akatshela asi Filistiya Saulu,

¹²apami wa dihunga tshe wakunela, wakatshu utshu utu. Vo wakatunya udu wa Saulu la edu wa anʼandi lu peli dia la Bete-Shana. Ku vo wakakalula la Jabeshe, wakatutshumba edu awo leko.

¹³Vo wakose weka awo, wakekhunde la Jabeshe la tshina diʼuvungu. Ku vo wakakili mbu ya nde nshi esambeli.