Read tetala 1 Samuele 4 Bible Online

1 Samuele 4 - tetala bible

1 Samuele 4

¹Diui dia Samuele diakadiangana lu Isariyele tshe. Isariyele wakatshu dia ntolo la asi Filistiya. Vo wakatuhanga la Ebene-Ezere. Asi Filistiya wakahangi la Afeka.

²Asi Filistiya wakayalonge dia ndosha Isariyele. Lamʼakawalo, asi Filistiya wakalembia asi Isariyele, wakadiaki andoshi awo wa ta lasuki la nunu nei.

³Lamʼakakalula andoshi wa ta la pangu, dihangamendi dia Isariyele wakambwana vati: Okoko wana wakatukimwi Latuyalaka dia asi Filistiya ntolembia elo? Tutshu la Shilo tutose oshete wa sheki wa Latuyalaka. Vo wayali lʼatei asu dia vo ntushimbela uma lʼanya wʼatunyi asu.

⁴Okone vo wakatumi antu la Shilo, wakatosa oshete wa sheki wa Latuyalaka, Kanga lulimbilimbi, latudjaseka lʼasa akeruba.[5] Ana apami ahendi wa Eli, Hofeni la Finehasi, waki leko kame la oshete wa sheki wa Unyashungu.

⁵Lamʼakakumi oshete wa sheki wa Latuyalaka lʼatei a pangu, asi Isariyele tshe wakahangohango la ongenongeno; ku kete yakadidima.

⁶Lamʼakuki asi Filistiya lundju la wuki loso, vo wakambwana vati: Na lundju la wulu loso latumba uma lu pangu kʼasi Heberu? Ku vo wakuki lukumu vati: Oshete wʼekila wa Latuyalaka wambukuma lu pangu.

⁷Asi Filistiya wakuki woma, wata vati: Unyashungu kambuya lu pangu. Wakatanela vati: Diasu ku! ne dia dikambu dia wuhu one diatatshama nduku lushi edja ndu elo.

⁸Diasu ku! Ayutushimbela uma lu anya wa ditemolatemola dia wulu ne? Ditemolatemola diako mbakasuya asi Edjibitu lu wehu tshe wʼasui lʼusui wa shenga.

⁹Nyu asi Filistiya, nyukikitali, nyuyali apami, nyutukuyala fumbi yʼasi Heberu uku akiwo fumbi yanyu. Nyuyali apami, kanyolo ta!

¹⁰Asi Filistiya wakatatela ta, wakalembia asi Isariyele. Ku untu lʼuntu akalawo utsha lakandi; asi Isariyele wakavu efula. Andoshi wa ta nunu akumi asatu wakavu lu Isariyele.

¹¹Asi Filistiya wakahotola oshete wʼekila wa Unyashungu, wakadiaki ana apami ahendi wa Eli: Hofeni la Finehasi.

¹²Pami kemotshi, usi Bendjamina, akalawo uma lu dihuli dia ta, akatukuma la Shilo, ahondo betshi tu, la kete lʼote.

¹³Lamʼakandakumi, ndi akatani Eli udjashi lu edie kandi lʼumamu a mbuka akungela, ne dia ndi aki la woma lu dikambu dia oshete wʼekila wa Unyashungu. Lamʼakakumi untu ako lʼeotwelo kʼusumba, ndi akasanya lukumu lako. Ku antu tshe wa lʼusumba wakatundo lʼalelu.

¹⁴Lamʼakuki Eli alelu ako, ndi akambula ati: Na lufungusu loso na? Ku pami kako akasamanya, akayutela Eli lukumu lako.

¹⁵Eli aki la deku akumi divwa la enanei, ku ashu andi wenda etunune, hawuyena ntu.

¹⁶Pami kako akatela Eli ati: Dimi laki la ta, uma leko kayamalawo elo. Ku Eli akawumbula ati: Onʼami, ngandi akayadi leko?

¹⁷Ku one lakayi la lukumu akûkaluya diui ati: Isariyele wakalawi. Asi Filistiya wakalembisha asi Isariyele, wakadiaki antu efula, wakadiaki ndu anʼaye ahendi wʼapami: Hofeni la Finehasi, ndu wakahotodi oshete wʼekila wa Unyashungu.

¹⁸Kamʼakati untu ako dia oshete wa Unyashungu, Eli akako ekalikali uma lu edie kandi lene akandadjashi, lʼumamu a mbuka, akoko kingu. Ku ndi akavu ne dia ndi aki usumbi a lukusumbi la emunyi wambumamitwana la weka. Ndi aki umbadi wa Isariyele deku akumi anei.

¹⁹Olokai andi, wadi a Finehasi aki la diemi suki la mbuta. Lamʼakanduki lukumu ati: Wakahotodi oshete wa Unyashungu ndu dia nyoi kʼukilu andi la ka umendi, ndi akanyama, akuti ona, ne dia lono lakawundi shashimuya.

²⁰Lamʼakandayangi mvo, umuntu laki lasuki la ndi akawutela ati: Tukaki woma, we ambuta ona pami. Keli ndi kumbukaluya nduku diui kuyanga mbidja tukanyi loko.

²¹Ndi akole ona lukumbu ati: Ikaboda (kitshimudi ati: Ku lutumbu). Ndi akati ati: Lutumbu lambumo uma le Isariyele, ne dia wakahotodi oshete wa Unyashungu, ndu ne dia nyoi ka ukilu andi ndu dia nyoi ka umendi.

²²Ndi akati ati: Lutumbu lambumo uma le Isariyele, ne dia wakahotodi oshete wa Unyashungu.