Read tharaka MATHAYO 1 Bible Online

MATHAYO 1 - tharaka bible

MATHAYO 1

¹Rûrû i ru rûrîîyo rwa Yiesû Kîrîstû wa mûciî wa Ndaundi, wa rûciaro rwa Îburaîmu.

²Îburaîmu aarî îthe wa Isaka. Isaka aarî îthe wa Njakubu, na Njakubu aarî îthe wa Njunda na aruagina.

³Njunda aarî îthe wa Peres na Sera (gina wao eetagwa Tamari). Peres aarî îthe wa Esroni, na Esroni aarî îthe wa Aramu.

⁴Aramu aarî îthe wa Aminandabu, na Aminandabu aarî îthe wa Naasoni. Naasoni aarî îthe wa Sarimoni,

⁵na Sarimoni aarî îthe wa Mboas, (gina eetagwa Raabu). Mboas aarî îthe wa Obendi (gina eetagwa Ruthu). Obendi aarî îthe wa Njesii.

⁶Njesii aarî îthe wa Mûnene Ndaundi. Ndaundi baaciara Soromoni barî na mûka wa muntû eetagwa Uria.

⁷Soromoni aatuîka îthe wa Reoboamu, na Reoboamu aatuîka îthe wa Abiya. Abiya aarî îthe wa Asa,

⁸na Asa aarî îthe wa Njospati, na Njospati aarî îthe wa Njoramu. Njoramu aarî îthe wa Usia.

⁹Usia aarî îthe wa Njothamu, na Njothamu aarî îthe wa Aasi. Na Aasi aarî îthe wa Esekia,

¹⁰na Esekia aarî îthe wa Manase, îthe wa Amoni. Amoni aarî îthe wa Njosia.

¹¹Njosia aaciara Njekonia na aruagina warîra Aisiraeri barî akubî kûthaamîrua Mbabironi.

¹²Barî Mbabironi, Njekonia aaciara Ciateeri, îthe wa Cerubabeeri.

¹³Cerubabeeri aarî îthe wa Abiûndi, na Abiûndi aarî îthe wa Eriakimu ûra aarî îthe wa Asoori.

¹⁴Asoori aarî îthe wa Sandoko ûra aarî îthe wa Akimû, îthe wa Eriundi.

¹⁵Eriundi aarî îthe wa Eriasa ûra aarî îthe wa Mathani, îthe wa Njakubu.

¹⁶Njakubu aarî îthe wa Njosebu, mûrûme wa Maria gina wa Yiesû Kîrîstû.

¹⁷Kwoogu cionthe ciarî nciarwa îkûmi na inya, kuuma kîrî Îburaîmu mwanka kîrî Ndaundi. Na kuuma kîrî Ndaundi mwanka rîra baathaamîîrue Mbabironi, wana cio ciarî nciarwa îkûmi na inya. Na kuuma bakûthaamîrua Mbabironi mwanka rîra Kîrîstû aaciarirwe, wana cio ciarî nciarwa îkûmi na inya.

¹⁸Gûciarwa kwa Yiesû Kîrîstû gwakari ûûgû. Gina, Maria, agîkeethagua i Njosebu mbere ya bagûrana ooneka akamatîîte nda ya Kîrundu Ûmûtheru.

¹⁹N'ûntû Njosebu aarî muntû ûmwagîru aathûgaania gûtiga Maria na witho n'ûntû ateendaga kûmwira îgi.

²⁰Njosebu waakîthûgaanagîria mantû mamu, aaroota mûraîka wa Mwathani akîaragia n'we akîmwîraga, “Njosebu wa mûciî wa Ndaundi, ûtikeegue ûguaya bwa kûthûkia Maria arî mwekûrû waku, n'ûntû nda înu arî n'yo n'ya Kîrundu Ûmûtheru.

²¹Agaaciara kaana ga kaîyî ûgeete Yiesû,[1] n'ûntû n'we akoonokia antû baume meeyiani.”

²²Mantû mamu monthe maakarire ûgu kaingo mantû mara maariirue i Mwathani gûkûrûkîîra kanyuani ga kîroria maûyûra, rîra augire,

²³“Mwana wa mwarî akaagîa nda aciare kaana ga kaîyî geetwe Imanueri.” (Riîtwa rîru rîgîtaûrwa i ta kuuga ‘Ngai arî amwe naati’.)

²⁴Rîra Njosebu aûkire torooni, aarûtha wabûra mûraîka wa Mwathani aamwîrîîte. Aathûkia Maria arî mwekûrû wake.

²⁵Njosebu ataamaama na mwekûrû wake mwanka aamba aaciara kaana ga kaîyî, ageeta Yiesû.