Read tharaka MATHAYO 10 Bible Online

MATHAYO 10 - tharaka bible

MATHAYO 10

¹Ntugû îmwe Yiesû eeta amwe arutwa baake barî îkûmi na baîrî. Abaa inya ya kwîngatia irundu biithûûku na ya kworia antû ndwari na mbayua cia mîthemba yonthe.

²Mariîtwa ma atûmwa babu baatûmirwe maarî, Simioni (ûra kaîrî eetagwa Petûrû), mûruagina Enderea, Njakubu wa Cabendi na mûruagina Njoana,

³Piripû, Bathoromayo, Tooma, Mathayo ûra aarî mûrûngithia ûgooti, Njakubu wa Arubayo, Thandayo,

⁴Simioni Mûkaanani, na Njundas Mûcikariota ûra aakunyanîîre Yiesû, amûgwatithia.

⁵Yiesû aabatûmire abeera, “Bûtikaathi nthîgûrû cia bara batarî Ayaundi kana bûthi taûni ya Asamaria.

⁶Îthiini kîrî Aisiraeri. Bakari ta ng'ondu ciûrîîte.

⁷Bûthi bûgîtûmagîîria bûkiugaga, ‘Ûnene bwa îgûrû bûkûthengeera.’

⁸Bworie bara baayie, bûriûkie bara bakuû, bworie bara barî na mîtigiri na bwîngatie irundu biithûûku biume kîrî bara barî na bio. N'ûntû bwetwe ûtheri eyanaani bûtakûrîwa.

⁹“Bûtigaakamate mbeeti kana mbia cia thaabu, fetha, kana mûthemba ûngî,

¹⁰na bûtigaakamate mbooro. Bûtigaakamate nguo îngî tatiga îra muntû eekîrîte kana iraatû bingî tatiga bira muntû eekîrîte. Na bûtigaakamate mîraagi ya gwîkinyîîria n'yo, n'ûntû mûruti ngûgî nabatîîrue amenyeerwa.

¹¹“Bwathi taûni kana ntûûra îra bûkaathi, bûcûe muntû ûmwagîru bûkare gwake mwanka rîra bûkaathi.

¹²Bwathûngîra gwake bwambe bûkeethie antû nkeethi cia ûkiri.

¹³Weegua bûkaagwatwa ûgeni ku ûkiri bûrookara mûciî ûyu. Îndî weegua bûtiigwatwa ûgeni batiikara na ûkiri mûciî ûyu!

¹⁴Bara batakîbûgwata ûgeni kana bara bakaarega kûbûthikîîria bûbaturaturîre tîîri ya mbayo cienu rûrî rwano rwa kûboonia bûtirî ngwatanîro na bo.

¹⁵Na mma ga nkûbwîra, rîra ntugû ya îgamba îgaakinya antû ba taûni cia Sondomu na Ngomoora ûkeegua barî kaaba nkûrûki ya antû ba taûni ta înu.”

¹⁶Yiesû eera arûtwa baake, “Ndabûtûma bûrî ta ng'ondu gûntû kûrî ncûûgi. Kwoogu karagaani bwîmenyeereete bûrî na ûûme ta kayûgû[10] na ûkiri ta îcea.

¹⁷Bwîmenyeere n'ûntû antû bakabûthitanga biamaani biao na babûringithie ibooko *masinagoogiini maao.

¹⁸Na bûkaathitangwa kîrî aathani na anene n'ûntû bwakwa, îndî bûgakûûyîîra kîrî bo na kîrî antû bonthe.

¹⁹Îndî wana babûthitanga kootiini bûtikaûrie n'ata bûkauga, kana n'ata bûgaacookia. Îgiita rîakinya bûkeewa bwa kuuga,

²⁰n'ûntû bûra bûkauga ûtiîgua buumanîîtie naabi. Bûkeewa bûra bûkauga i Kîrundu wa Abaagu.

²¹“Muntû agaakunyanîra mûruagina aûragwe n'anene. Mwana agaakunyanîrwa n'îthe, na aana bakaang'entera aciari baao babaûragithie.

²²Bûkaamenwa n'antû bonthe n'ûntû bwakwa. Îndî ûra ûkaûmîîria mwanka mûthia akoonokua.

²³Bûkaaya kûnyamaarua ntûûra îmwe, bûtoorooke bûthi îngî n'ûntû na mma ga nkûbwîra, ûtiîgua bûgûkomania ntûûra cia Isiraeri cionthe mbere ya Mwana wa Muntû aaya.

²⁴“Mûrutwa t'we mûnene kîrî mwarimû wake. Na mûruti ngûgî t'we mûnene kîrî ûra arutagîra ngûgî.

²⁵Mûrutwa agatuatia mwarimû wake, ûgu ibûmûganîîte. Na mûruti ngûgî agatuatia ûra arutagîra ngûgî, ûgu ibûmûganîîte. Ûkoona i mwene mûciî beetire Bericebuuri, mûnene wa irundu biithûûku, t'wa antû ba mûciî wake.”

²⁶Yiesû abeera, “Îndî amwe noogu bûtikaabakuthûke n'ûntû ûntû bunthe bûra bwithe nwa bûkaamenyekana na gûtirî witho bûtakiumbûka.

²⁷Mara nkaabwîra kûrî ûtugû, îraani antû mo kûrî mûthenya. Na mara nkaabwîra na kîoye, bûtwe mîtîîni kûra îgûrû buugîîrie antû beegue.

²⁸Bûtigaakuthûke bara baûmba kûûraga mwîrî akî, îndî bataûrage mwoyo. Kuthûkaani ûra aûmba kûûraga mwîrî na akathiria mwoyo na mwanki wa îcamaarîro.

²⁹Anga ûkeendia tûnyoni twîrî tûniini twauma mbia kûrî? Îndî amwe noogu, gûtirî nwa kamwe ga tu gakua, nwanga Abaagu ûra arî îgûrû eendeete.

³⁰We wana ntundu ira irî biongo bienu cionthe naciiyî n'igana.

³¹Kwoogu menya bûmaka. Biû bûrî gîtûmi nkûrûki ya tûnyoni tûtatarîka.”

³²Yiesû auga, “Ûra agakûûyîîra kîrî antû, wana niû nkamûkûûyîîra kîrî Baaba ûra arî îgûrû.

³³Îndî ûra agankaana kîrî antû, wana niû inkaamûkaana kîrî Baaba ûra arî îgûrû.”

³⁴Yiesû auga, “Bûtigeeciirie mbûyîîte kûreeta ûkiri nthîgûrû. Ntiyîîte kûreeta ûkiri, ndeeteete ndûa,

³⁵n'ûntû mbûyîîte kwathûrana muntû na îthe, mwarî na gina, mûk'wa mwana na ciaraawe.

³⁶Na ngaatûma muntû amenwa kûrû n'antû ba mûciî wake bongwa.”

³⁷Yiesû auga, “Muntû ûra eendaga îthe kana gina nkûrûki yakwa, kana ûra eendaga mwana wake nkûrûki ya bûra ambendeete atiagîrîte auga n'wakwa.

³⁸Muntû atagîkamata mûtharaba wake anthingata atiûmba gûtuîka wakwa.

³⁹Ûra acûaga wengwa gûtûûra mwoyo akaûra. Îndî ûra akeeruta n'ûntû bwakwa agaatûûra mwoyo.”

⁴⁰Yiesû auga, “Muntû ûra akaabwîtîgîra i niû akeegua agîîtîgîra. Ûra aambîtîgagîra n'ûra aantûmire eetîgagîra.

⁴¹Ûra eetîgagîra kîroria n'ûntû bwa kwîgua i kîroria akeewa kîewa kîganeene na gîa kîroria. Na ûra ageetîgîra muntû wa Ngai n'ûntû bwa kwîgua i muntû ûmwagîru, kinya we akeewa kîewa kîganeene na muntû ûmwagîru.

⁴²Na mma ga nkûbwîra, ûra agaakundia nwa rûûyî rûûtheri ûmwe wa athingati baba baakwa baniini n'ûntû bwa bûra barî athingati baakwa, i mma atiaga kîewa.”