Read tharaka MATHAYO 11 Bible Online

MATHAYO 11 - tharaka bible

MATHAYO 11

¹Yiesû akûthiria kûrutana arutwa baake bara îkûmi na baîrî, auma agu baarî. Aariûnga na taûni cia gûntû gûku akîrutanaga antû na akîbatûmagîîria.

²Njoana Mûbaatithania arî nceera akwîgua bûra Kîrîstû aarûthaga, aatûma bamwe ba arutwa baake.

³Baathi baûria Kîrîstû, “I woû tweerirwe ûkaaya kana n'ûngî?”

⁴Yiesû abeera, “Cookaani bwîre Njoana bûra bweegua na bûra bwoona.

⁵Ntûngi nikwona, bionje ibikûthi, bara baayie mîtigiri ibakworua, ipûra ibikwîgua, bara bakuû ibakûriûkua, na ntheto îmbega nîgûtûmîîrua nkîa.

⁶Kîthaarimo i kîrî ûra aambîtîgîîtie atarî na nkanja.”

⁷Arutwa ba Njoana bakûthi, Yiesû aanjîîria kwîra antû mantû ma Njoana. Abaûria, “Rîra bwathiîte rwanda kwona Njoana rî, n'ata bwerîgagîîra? Bwathiîte kwona rûrara rûkiinainua i ruuo?

⁸Kana i mbi bwathiîte kwona? I muntû eekîrîte nguo imbega? Bara beekagîra nguo ta inu boonekanaga mîciî ya anene.

⁹Kwoogu i mbi bwathiîte kwona? Ti kîroria? Na mma ga nkûbwîra, aarî nkûrûki ya kîroria.

¹⁰N'we agweteetwe *Maandîkooni Maatheru akîîragwa, ‘Ga ngûkwîra, ngaatûma mûtûmwa wakwa mbere ya ûkinya akûrûthîre njîra.’

¹¹Na mma ga nkûbwîra, kîrî aana bonthe bara baaciarwa n'aka, gûtirî ûngî ooneka arî mûnene ta Njoana Mûbaatithania. Îndî kinya ûra oonekaga arî mûniini kîrî bara barî ba ûnene bwa îgûrû, n'ûmûnene nkûrûki yake.

¹²Kuuma îgiita rîa Njoana Mûbaatithania mwanka îîndî, ûnene bwa îgûrû bûkûrûkagwa na taka. Na bara baûmîîru i bo bakûrûkaga ku.[11]

¹³Iroria bionthe bira biarî oogo mbere ya Njoana ibiagweteete mantû mama ma ûnene bwa îgûrû, na wana kinya *watho bwa Musa ibûgweteete.

¹⁴Na kîrî ûra akwenda gwîtîgia, Njoana n'we eeragîîrwa rîra kweragwa, Eriya akaaya kaîrî.

¹⁵Ûra arî na matû neegue.

¹⁶“I mbi mma mbûmba kûbuanaania n'yo antû ba ntugû ino? Bakari ta twana tûrîîkanîîte thokooni, tûmwe tûkeeraga tûra tûngî,

¹⁷‘Tuugiirie mîtûûrirû, bwarega kûgoyia. Tûkwina ndwîmbo cia mathiko, bûtirarîra.’

¹⁸“Ndiuga ûgu, n'ûntû Njoana akûrega kûrîa irio bira baarîyaga, aatua gûtîîrîra kûrîa n'ûntû bwa maromba na aarega kûnyua ncoobi, antû baugire, ‘Narî na kîrundu kîîthûûku.’

¹⁹Mwana wa Muntû akûûya aarîa na aanyua, antû baatuire kuuga, ‘Ûyû i muntû wa îtanûka, i mûtogooni, na i mûcoore wa arûngithia ûgooti na eeyia!’ Îndî ûûme bwa kîîngai bwonekaga i bwa mma na maciara ma bu.”

²⁰Yiesû aanjîîria kûtheta n'ûntû bwa antû ba taûni ira aaringîîte biama biingî bia kûrigarania na amwe na ûgu baarega kwîrira.

²¹Auga, “Bûkoona thîîna, biû antû ba taûni ya Korosini! Na bûkoona thîîna, biû antû ba taûni ya Bethisainda! Ûkaaya kwîgua biama bira biaringirwe taûni cienu biaringirwe taûni ya Turo kana ya Sindoni antû ba taûni inu boona, wîgua bo beeririre, beekîra mathango wo tene, na muu beemincîria biongo kwonania kwîrira kwao.

²²Na ga nkûbwîra, ntugû ya îgamba antû ba Turo na Sindoni bakeegua barî kaaba kîrî biû.

²³Naabi antû ba taûni ya Kaperinaumu, weegua bûrîthûgaania bûgaakumua, Ngai akaabûgera îcamaarîro! Ûkeegua biama bira biaringirwe taûni yenu biaringirwe taûni ya Sondomu, wîgua taûni înu irî oogo wana îmunthî!

²⁴Ga nkûbwîra, ntugû ya îgamba antû ba Sondomu ûkeegua barî kaaba kîrî biû.”

²⁵Yiesû auga, “Baaba, Mwathani wa îgûrû na nthîgûrû, ingûgûcookeria nkaatho n'ûntû withîîte bara baûgî na bara bathoomu mantû, îndî wagwûrîra mo bara beenyiîtie.

²⁶I mma, Baaba, woû nwa bu weendeete gûkarîka ûgu.

²⁷“Ngai Baaba nampete mantû monthe. Gûtirî we aiyî Mwana tatiga Îthe. Na gûtirî we aiyî Îthe tatiga Mwana kana bara Mwana athuuraga akabagwûrîra we.

²⁸“Ncûûni bwinthe bara bûnogeete i gûkamata mîrigo îmîrito mbûnogokie.

²⁹Thûkiani gîcooki gîakwa bwîkîre mbûrutane bûnogoke nkoro n'ûntû niû ndî ûmûbooreeru na indînyiîtie.

³⁰Gîcooki gîakwa i kîûthû na mûrigo ûra nkaabwaîkia n'ûmûûthû.”