Read tharaka MATHAYO 12 Bible Online

MATHAYO 12 - tharaka bible

MATHAYO 12

¹Kagiitaani wagaku ntugû îmwe ya *Sabatû, Yiesû akûrûkîîrîîte gûntû kwarî na mînda ya ngano, arutwa baake beegua yûûra mûno. Baanjîîria kuuna ngano bagiikithaga na njara bakarîa.

²*Abarisai bakwona ûgu baûria Yiesû “I kî n'ûntû arutwa baaku bakuuna ngano bakîrîyaga na batibuirîîte barûtha ûgu ntugû ya Sabatû?”

³Yiesû abaûria, “Ka bûtaathooma bûra Ndaundi na bara baarî n'we baarûthire beegua yûûra?

⁴Aathiire nyomba ya Ngai arî na bara baarî n'we baarîa mîgaate îra mîtheru na ibwiyî mîgaate înu itikîrûmwa i muntû ûngî tatiga *athînjîri ba Ngai bonka.

⁵Kana ka bûtathoomeete mabuku ma *watho bwîgua bûra *athînjîri babîtagia ntugû ya Sabatû baathi nyomba ya Ngai na batitaragîrwa marî meeyia.

⁶Îndî ga nkûbwîra, kûrî bu bûrî aaga bûnene nkûrûki ya nyomba ya Ngai.

⁷Tookeegua ibwamenyaga bûra ntheto îno ya Ngai yugaga atî, ‘Mbendaga antû beeganua kîao nkûrûki ya baruta kîgongwana,’ bûtikîgiitîra îgamba muntû ataarî na mabîtia.

⁸Kwoogu Mwana wa Muntû n'we Mwathi wa Sabatû.”

⁹Yiesû auma agu aathi bantû angî aathûngîra *sinagoogiini.

¹⁰Ikwarî na muntû oonjeete njara gûku sinagoogiini. *Abarisai bara baarî gûku bagîcûa ûntû bwa kûthitangîra Yiesû, bamûûria, “*Watho ibwîtîgîîrîîtie muntû oorania ntugû ya Sabatû?”

¹¹Yiesû abaûria, “N'ûû wacienu ataruta ng'ondu yake mûthûrûriini ntugû ya Sabatû?

¹²Muntû n'we arî gîtûmi nkûrûki ya ng'ondu. Ti bu? Kwoogu watho ibûgwîtîgîîria muntû arûtha mantû meega ntugû ya Sabatû.”

¹³Yiesû eera muntû ûyu oonjeete njara, “Tambûrûkia njara yaku.” Muntû ûyu akûmîtambûrûkia yabua yakara ta îra îngî.

¹⁴Abarisai bakuuma gûku sinagoogiini baabanga kûûraga Yiesû.

¹⁵Yiesû akûmenya mûbango ûra baarî na uu auma agu aathi. Antû baingî mûno bamûthingata, Yiesû abooria bonthe.

¹⁶Îndî abakaania abeera batikauge n'we ûû.

¹⁷Ntheto ira ciariirue i kîroria Isaaya ciaûyûra, rîra augire,

¹⁸“Ûyû i mûruti ngûgî wakwa ûra nthuurîîte, ûra mbendeete, na nankenagia. Nkamwîkîra Kîrundu wakwa, na agaatûmîîria antû batarî Ayaundi, abamenyithie mantû ma kûgiitîrwa îgamba.

¹⁹Atiithetania na antû, kana aringa gîtuma, kana arûtha mûceemanio aarîria antû.

²⁰Atiigiitûkania karara kara kang'inyang'inyûkanu, atioria taa îra îrî akubî kwora. Akaathi na mbere kûruta ngûgî mwanka ûmma bûcinde ûthûûku,

²¹na antû bara batarî Ayaundi beerîgagîîre riîtwa rîake.”

²²Antû baareetera Yiesû muntû arî na kîrundu kîîthûûku. Mûntû ûyu atoonaga na ataaragia. Yiesû amworia aatua kwaria na kwona.

²³Antû bonthe baarigara. Baatua kûûrania, “Waûmba kwîgua ûyû n'we Mwana wa Ndaundî?”

²⁴*Abarisai bakwîgua mantû mamu bauga, “I Bericebuuri, mûnene wa irundu biithûûku amweyaga inya ya kwîngatia irundu biithûûku, na t'ûngî.”

²⁵Yiesû akûmenya bûra bwarî mathûgaaniani maao, abeera, “Ûnene bûkaathûkana bûtitûûra. Na antû ba taûni îmwe kana ba mûciî ûmwe bakaathûkana, taûni înu kana mûciî ûyu ûtitûûra.

²⁶Ûkeegua Saitaani arîîngatia Saitaani neegua aathûkeene. Kwoogu n'ata ûnene bwake bûûmba gûtûûra?

²⁷Ûkaaya kwîgua mbîngatagia irundu biithûûku ngîtûmagîra inya ya Bericebuuri rî, antû beenu batûmagîra inya ya ûû kûbiîngatia? Bûra barûthaga i bu bûgaatûma bûmenya bûra bûkuuga.

²⁸Îndî ûkaaya kwîgua mbîngatagia irundu biithûûku ngîtûmagîra inya ya Kîrundu wa Ngai, i mma ûnene bwa Ngai ibûbûkinyîîrîîte.

²⁹“Arîo rî, n'ata muntû abunjia nyomba ya muntû arî na inya akathûkia into biake na taka? Nwanga akaamba akamûthaîka na îkanda, rîru i rîo athûngîra nyomba akamûtunya into.

³⁰“Ûra atagwatanagîra naani i mûnthû wakwa. Na ûra ateethîranagia nkîîthîrania nanyagaaragia.

³¹“Na ka mbwîreeni, antû bakaarekerwa meeyia monthe na mantû maathûûku monthe mara baaria îgûrû rîa Ngai. Îndî ûra akaaria mantû maathûûku îgûrû rîa Kîrundu Ûmûtheru atiirekerwa.

³²Muntû wonthe ûra akaaria mantû maathûûku îgûrû rîa Mwana wa Muntû akaarekerwa. Îndî ûra akaaria mantû maathûûku îgûrû rîa Kîrundu Ûmûtheru atiirekerwa îgiitaani rîrî na îgiitaani rîra rîkaaya.”

³³“Mûtî ûrî ûmwega ûciaraga matunda meega na mûtî ûrî ûmûthûûku ûciaraga maciaro maathûûku.

³⁴Biû rûciaro rwa njoka! N'ata bûûmba kwaria mantû meega na bûrî antû baathûûku? Kanyua kaaragia mantû mara mooyûri nkoro.

³⁵Muntû ûmwega aaragia mantû meega mara maumaga nkorooni yake. Na muntû ûmûthûûku aaragia mantû maathûûku mara maumaga nkorooni yake.

³⁶Îndî ka mbwîreeni, kiugo kîonthe gîtaagîrîte kîra antû baaragia bagaatarîrwa kîo ntugû ya kûgiitîrwa îgamba.

³⁷Wamuntû akaagiitîrwa îgamba bwega kana bûûthûûku kûringana na mîgambo yake.”

³⁸*Abarisai bamwe na aarimû ba watho beera Yiesû, “Mwarimû, tûrîenda ûringa kîama twona.”

³⁹Yiesû eegua ûgu auga, “I rûciaro rûûthûûku rwa aregi Ngai rûkwenda kwona kîama. Gûtirî kîama kîngî bûkoona tatiga kîra gîa kîroria Njona.

⁴⁰Wata Njona bûra aakarire nda ya îkûyû ntugû ithatû mûthenya na ûtugû, wana Mwana wa Muntû agaakara nthîgûrû ndeni ntugû ithatû.

⁴¹Na rîra antû ba taûni ya Ninebe bakaariûkua ntugû ya antû kûgiitîrwa îgamba bakaabûtuîra ibwîyîîtie n'ûntû bo ibeeririre Njona akûbatûmîîria, na îîndî ûra arî aaga n'we mûnene kîrî Njona.

⁴²Na mûnene ûra wa mûka wa nthîgûrû îra yeetagwa Ceba aariûkua ntugû ya antû kûgiitîrwa îgamba akaabûtuîra ibwîyîîtie n'ûntû we aumire wo kûraaya kûûru aathi kwîgua ûûme bwa mûnene Soromoni bûra aarutanaga, na îîndî ûra arî aaga n'we mûnene kîrî Soromoni.”

⁴³Yiesû auga, “Kîrundu kîîthûûku kîauma kîrî muntû, kîthiyaga kîriûngîîte gîgakûrûkîîra gûntû na gûntû gûtarî rûûyî gîgîcûa bantû gîkara. Kîaga gîkeebîîra,

⁴⁴‘Gancooke nyomba yakwa îra nkûrû, kûra ndaumire.’ Gîacooka kîîthagîra gûtarî we arî ku, nyomba îrî întheru, na îkari bwega.

⁴⁵Kîona ûgu, kîthiyaga gîkagîîra irundu bingî mûgwanja biithûûku nkûrûki ya kîo bikaaya bikathûngîra muntû ûyu bigakara ku. Rîra gûkaraga ûgu, muntû ûyu nathûûkaga nkûrûki ya bûra aakari mbereeni. Ûgu i ta bu gûgaakara kîrî rûciaro rûrû rûûthûûku.”

⁴⁶Yiesû athiîte na mbere woogu na kwarîria kîrîndî, gina na aruagina baaya. Baarûngama ome ya nyomba înu aarî bakîendaga kwaria n'we. [

⁴⁷Muntû ûmwe eera Yiesû, “Nyûkwe na aruanyûkwe barî nja na ibakwenda kwaria naawe.”][12]

⁴⁸Yiesû abaûria, “Taata na aruayia i ba ûû?”

⁴⁹Ooroota arutwa baake. Auga, “Taata na aruayia i baba barî aaga.”

⁵⁰Kaîrî Yiesû auga, “Ûra wonthe arûthaga bûra Baaba ûra arî îgûrû eendaga kûrûthwa, ûyu n'we mûruayia, n'we mwarayia, na n'we taata.”