Read tharaka MATHAYO 14 Bible Online

MATHAYO 14 - tharaka bible

MATHAYO 14

¹Kagiitaani gaku Eronde ûra aathanaga rûteere rûru rwa Gariiri akwîgua nkuma ya Yiesû

²eera aruti ngûgî baake, “Ûyu i Njoana Mûbaatithania arariûkire kûringana na inya înu arî n'yo ya kûringa biama.”

³Gwatuîkîîte Eronde augîîte Njoana agwatwe athaîkwe nceera, n'ûntû bwa Erondia. Erondia aarî mûka wa mûruagina wa Eronde eetagwa Piripû.

⁴Njoana aakaraga akîîraga Eronde ti bwega gûkara na mûka wa mûruagina taka aarî wake, na Piripû arî mwoyo.

⁵N'ûntû bwa ûgu, Eronde neendaga kûûraga Njoana, îndî agakuthûka antû n'ûntû naiyî antû iboonaga Njoana aarî kîroria.

⁶Ntugû ya kîatho gîa gûkeneera gûciarwa kwa Eronde îgûkinya, mwarî wa Erondia ainîra Eronde na ageni baake ndanci bwega, aakenia Eronde.

⁷Eronde aathiîtia amwîra, “Mbîîra kîonthe kîra ûkwenda na ngakwa kîo.”

⁸Mwarî aathwa i gina amwîra auge arîenda eewa kîongo kîa Njoana Mûbaatithania kîrî thaaniini warîru arî agu.

⁹Mûnene akwîgua ûgu aagwatwa i kîeba. Îndî gûtirî bu akîrûtha arega kûmwaa kîo n'ûntû bwa bûra aarî akûthiîtia mbere kinya ya ageni baake. Kwoogu auga mwarî ûyu arûthîrwe woogu augire.

¹⁰Aatûmana nceera Njoana aagiitwa kîongo

¹¹kîareeterwa mwarî wa Erondia kîrî thaaniini. Mwarî ûyu aathûkia aanenkera gina kîo.

¹²Arutwa ba Njoana baathi baathûkia mwîrî wake baathi baathika. Bakûmûthika baathi beera Yiesû.

¹³Yiesû akwîgua mantû mamu auma agu na îtarû aathi wenka bantû gûtaarî n'antû. Antû bakûmenya bauma taûni ciao bamûthingata na magûrû.

¹⁴Warîra Yiesû agîkinyûka kuuma îtarûûni oona bûra antû baingîîte bûgana, abeegua kîao mûno. Ooria aayie.

¹⁵Ûgoro bûgûkinya arutwa baake baathi bamwîra, “Igûkwenda gûtuga na i ta rwanda rûrû tûrî. Îra antû bathi kaingo bakinya ntûûra beegûrîra irio.”

¹⁶Yiesû abeera, “Gûtirî gîtûmi gîa kûbeera bathi. Beeni gîntû bûrî biû barîe.”

¹⁷Arutwa baake bamwîra, “Aaga i mîgaate îtaano na makûyû maîrî akî tûrî na mo.”

¹⁸Yiesû abeera, “Tareeteeni bio.”

¹⁹Yiesû eera antû bakare nthî nyakiini. Aathûkia mîgaate înu îtaano na makûyû mamu maîrî. Aacûûba îgûrû aacookeria Ngai nkaatho. Rîru ang'enyûranangia mîgaate înu aanenkera arutwa baake bagaîra antû.

²⁰Antû bonthe bara baarî agu baarîa baabaa. Arutwa beethîrania ikaabû îkûmi na biîrî bia mang'enyûrû ma mîgaate na inuku bia makûyû mara maatigarire.

²¹Antû arûme bonka bara baagaagûrirwe baarî ngiri itaano, tûtagûtara aka na twana.

²²Nyuma ya ûgu Yiesû eera arutwa baake batwe îtarûûni bathiyage rûgongo rûra rûngî rwa îria, we aatigwa akîîra kîrîndî kîînûke.

²³Akûrîîkia gûtigana na kîrîndî, Yiesû aatwa karîmaani arî wenka kûromba Ngai. Aaromba mwanka gwatuga.

²⁴Thaa inu îtarû irîarî rîkûthi kûraaya mûno na irîainainagua i makûmbî ma rûûyî n'ûntû bwa bûra rwarîrigagîîria.

²⁵Rware rûgîtema Yiesû aaya kîrî arutwa baake athiîrîîte îgûrû rîa rûûyî.

²⁶Arutwa baake bakûmwona baamaka mûno. Bauga, “I nkoma.” Baaringa gîtuma mûno n'ûguaya.

²⁷Warîru Yiesû aaria na bo. Abeera, “I niû, ûmîîriani! Tigaani kûmaka.”

²⁸Petûrû amwîra, “Mwathani, weegua i woû, uga mbûye nthiîrîîte îgûrû rîa rûûyî na niû.”

²⁹Mwathani amwîra, “Ncû!” Petûrû auma îtarûûni aakinya rûûyî aanjîîria kûthi kîrî Yiesû.

³⁰Îndî akwona bûra ruuo rwagana aagwatwa n'ûguaya, aanjîîria kûriama. Auga mbu auga, “Nteethia itû, Mwathani!”

³¹Warîru Yiesû aatambûrûkia njara amûgwata. Amûûria, “Ka ûrî na wîtîgio bûniini ata? I kî ûtagwîtîgia?”

³²Bagûtwa îtarûûni ruuo rwatiga kûbuutana bûra rwabuutanaga.

³³Bara baarî îtarûûni baagonga Yiesû bauga, “I mma woû ûrî Mwana wa Ngai.”

³⁴Yiesû na arutwa baake baaringa îria, baakinya bantû eetagwa Ngenesareeti.

³⁵Antû ba noogo bakûmwona bamûmenya. Baatûmana ntûûra antû beerwa. Antû baareetera Yiesû aayie baao bonthe bara baayîîtue.

³⁶Bamwereka bamwîra eetîgîîrie aayie batongithie nwa mûthia wa nguo yake. Yiesû akûbeetîgîîria bara bonthe batongithiirie boora.