Read tharaka MATHAYO 15 Bible Online

MATHAYO 15 - tharaka bible

MATHAYO 15

¹Nyumaani *Abarisai bamwe na aarimû ba watho ba kuuma Njerusaremu baathi kîrî Yiesû bamûûria,

²“I kî n'ûntû arutwa baaku baunaga wîthîre bwetû bwa kûthamba njara mbere ya kûrîa irio?”

³Yiesû abaûria, “I kî n'ûntû bûtaathîkagîra *watho bwa Ngai bûgatindaga bwîngeene na kîîwîthîre kîenu?

⁴Ngai augîîte, ‘Tîîyaga abaagu na nyûkwe.’ Na aacooka kaîrî auga, ‘Ûra akaaruma îthe kana gina, na mma nakue.’

⁵Îndî ûrutaniini bwenu biû buugaga muntû arî na gîntû aûmba gûteethia na kîo îthe kana gina, nwa abeere i gîa kûrutîra Ngai na atabateethie, na mamu ti mabîtia. Na kaîrî bûrutanaga antû kûrega gûtîîya beethe na bagina. Gûku ti kwagîra watho bwa Ngai gîtûmi n'ûntû bwa kûthingata kîîwîthîre kîenu?

⁷Biû eebwithia baba! Isaaya naaroragia mantû meenu bwega rîra aandîkire,

⁸‘Antû baba baankumagia na tûnyua akî, nkoro ciao irî kûraaya mûno naani.

⁹N'ûtheri bangongaga, mantû mara barutanaga i maathana magûtuîgwa n'antû.’ ”

¹⁰Yiesû aacooka eera kîrîndî, “Thikîîriani bwîgue na bûciûre bûra nkuuga.

¹¹Kîra kîthûngagîra kîrî muntû gûkûrûkîîra kanyuani ti kîo gîtûmaga agîa mûgiro.[16] Kîra kiumaga kanyuani i kîo gîtûmaga agîa mûgiro.”

¹²Arutwa ba Yiesû baathi kîrî we bamwîra, “Nûkûmenya Abarisai batirakenua i bûra uugire?”

¹³Yiesû abeera, “Gîntû kîonthe kîra Baaba ûra arî îgûrû ataanda nagaakûûra na marindo meene.

¹⁴Rekanaani na bo tu. Bûroona ntûngi îkwathîîra îra îngî njîra? Ntûngi îtiûmba kûgwata îra îngî mûtî n'ûntû bakeethîra îrinya i ku boorokera bonthe.”

¹⁵Petûrû amwîra, “Wenda twîre bûra ûkwenda kuuga na ngerekano îno.”

¹⁶Yiesû abeera, “Îkaanthî wana biû bûtiraciûra?

¹⁷Bûrîenda kuuga îîndî bûtiiyî kîra kîthûngagîra mwîrî gûkûrûkîîra kanyuani kîthiyaga nda na gîgacooka gîkauma?

¹⁸Îndî kîra kiumaga na kanyua kîîgagua kiumîîte nkorooni na i kîo gîtûmaga muntû agîa mûgiro,

¹⁹n'ûntû nkorooni i ku kuumaga meeciiria maathûûku, ûûragani, ûthûngîîri na ûtheria, wamba, ûkûûyî bwa ûrongo, na kûrumanga antû.

²⁰Mama i mo mantû mara matûmaga muntû agîa mûgiro. Îndî kîrî Ngai, kûrîa ûtathambîîte njara gûtiûmba gûtûma ûgîa mûgiro.”

²¹Yiesû na arutwa baake bakuuma agu baathi bwa Turo na Sindoni.

²²Mûka ûmwe wa gûntû gûku aaya kîrî Yiesû amûkaîra amwîra, “Mwathani, mwana wa rûrîîyo rwa Ndaundi, itû mbîgua kîao! Kaarî gaakwa karî na kîrundu kîîthûûku mûno gîtakarekaga.”

²³Îndî Yiesû gûtirî bu aamûcookeria amwîra. Arutwa baake baathi akubî baaria n'we bamwîra, “Ûtamwîre athi rîmwe bantû akara atuumîîte nyuma agîtûringagîra gîtuma?”

²⁴Yiesû auga, “Ndatûmirwe kîrî Aisiraeri bonka, bakari ta ng'ondu ciûrîîte.”

²⁵Yiesû akîrîîkia kuuga ûgu, mûka ûyu aathi aaturia maru mbere yake. Amwîra, “Itû, Mwathani, nteethia.”

²⁶Yiesû auga, “Ti bwega kûgerera kurû irio bia twana.”

²⁷Mûka ûyu amwîra, “Bûbu bu n'ûmma, Mwathani. Îndî rî, wana kurû nirîyaga tûngenyua tûra tûgwîyaga rungu rwa meetha eene cio bakîrîa.”

²⁸Yiesû amwîra, “N'ata ûrî na wîtîgio bûgana, mwekûrû! Bûra ûkwenda ûkaarûthîrwa bu.” Na kuuma thaa wainu kaarî gaake kaabua.

²⁹Yiesû akuuma naagu aathi aakinya îriani rîa Gariiri. Aatamba na rûteere aathi aatwa karîmaani aakara nthî.

³⁰Kîrîndî kiingî mûno kîamwirîra bionje, ntûngi, ithua, maamu, na aayie ba mîthemba îngî bakîbaigagîîra akubî na magûrû maake. Yiesû abooria.

³¹Kîrîndî kîarigara mûno, gîakumia Ngai wa Isiraeri gîkwona maamu ciatua kwaria, ithua biatua kûthi, bionje biabua, na ntûngi igûtua kwona.

³²Yiesû eeta arutwa baake abeera, “Inkwîgua antû baba kîao n'ûntû tûkarîîte na bo ntugû ithatû na batirî na irio. Ntikwenda beenûka na yûûra n'ûntû baûmba kûgwa njîraani.”

³³Arutwa baake bamûûria, “I kû tûruta mîgaate ya kûgana rwanda ta rûrû tûrî ya kûrûmia kîrîndî gîkî kîonthe?”

³⁴Yiesû abaûria, “I mîgaate îgana îrî oogo?” Bamûcookeria bamwîra, “I mûgwanja na tûkûyû tûûkai.”

³⁵Yiesû auga antû bakare nthî.

³⁶Aathûkia mîgaate înu mûgwanja na tûkûyû tûtu. Aacookeria Ngai nkaatho, aang'enyûranangia akînenkagîra arutwa baake, arutwa baagaîra antû.

³⁷Antû bonthe baarîa baabaa. Arutwa ba Yiesû beethîrania ikaabû mûgwanja bia ing'enyua bira biatigarire.

³⁸Antû arûme bonka baarî ta ngiri inya tûtagûtara aka na twana.

³⁹Rîru Yiesû eera antû beenûke, aatwa îtarûûni aathi bwa gûntû gweetagwa Magandani.