Read tharaka MATHAYO 16 Bible Online

MATHAYO 16 - tharaka bible

MATHAYO 16

¹*Abarisai bamwe na *Asandukai baathi kîrî Yiesû. Bakîmûgeria bamwîra aringe kîama, kîrî rwano rwa kwonania inya îra arî n'yo kuuma îgûrû.

²Yiesû abeera, “Bûkoona gwatuga gûtarî na matu buugaga, ‘Rûû gûgaakea gûkembûkîîte.’

³Na rûkîîrî buugaga, ‘Îmunthî gûkaura n'ûntû kûrî na matu maayirû.’ Ibwiyî kûraitha mwonekere wa matu bûkamenya bûra gûgaakara, îndî bûtikûûmba kûmenya bûra mantû mara magûtuîkîka ntugûûni ino makwonania.

⁴I rûciaro rûûthûûku rwa aregi Ngai rûkwenda kwona kîama. Gûtirî kîama kîngî bûkoona tatiga kîra gîa kîroria Njona.” Yiesû abatiga aathi.

⁵Arutwa ba Yiesû bakîringanîria bathi rûgongo rûra rûngî rwa îria, bataaririkana bakamata mîgaate.

⁶Yiesû abeera, “Îmenyeereeni îgûrû rîa ndawa îra *Abarisai na Eronde batûmagîra kwimbithia mîgaate.”[17]

⁷Arutwa baanjîîria kwaranîria. Bauga, “Arîtwîra ûûgû n'ûntû tûtiraaya na mîgaate.”

⁸Yiesû akwîgua bakîîrana ûgu abaûria, “N'ata bûrî na wîtîgio bûûniini! I kî n'ûntû bûkûthûgaania i bûra bûtarî na mîgaate?

⁹Ka bûtagûciûkîrwa kinya îîndî? Ka bûtakûririkana rîra ndagaîrîîre antû ngiri itaano mîgaate îtaano? Bwaûyûriirie ikaabû bigana bia matigari?

¹⁰Bûtikûririkana kinya rîra ndagaîrîîre antû bara ngiri inya mîgaate îra mûgwanja? N'ikaabû bigana bia matigari bweethîraniirie?

¹¹Aabu i kî îîndî n'ûntû bûtagûciûkîrwa bûmenya ti mantû ma mîgaate nkwaragîîria? Bwîmenyeere kîrî ndawa ya kwimbithia mîgaate ya Abarisai na Asandukai.”

¹²Rîru i rîo baaciûkîîrwe baamenya ataabeeraga beemenyeere kîrî ndawa ya kwimbithia mîgaate, aabeeraga beemenyeere kîrî moorutani ma Abarisai na Asandukai.

¹³Yiesû agûkinya rûteere rûra taûni ya Kaisaria Piripi yarî aûria arutwa baake, “Înkûbûûria, antû baugaga Mwana wa Muntû n'ûû?”

¹⁴Arutwa baake bamwîra, “Bamwe baugaga ûrî Njoana Mûbaatithania, bangî bakauga ûrî Eriya, na bangî na bo bakauga ûrî kîroria Njeremia, kana ûmwe wa iroria.”

¹⁵Yiesû aacooka abaûria, “Î biû buugaga ndî ûû?”

¹⁶Simioni Petûrû amwîra, “Woû ûrî Kîrîstû, Mwana wa Ngai ûra arî mwoyo.”

¹⁷Yiesû amûcookeria amwîra, “Woû ûrî ûmûthaarime, Simioni mwana wa Njona, n'ûntû ti muntû akûgwûrîrîte mantû mama. I Baaba ûra arî îgûrû akûgwûrîrîte mo.

¹⁸Ga ngûkwîra, i woû Petûrû.[18] Ngaaka kanica yakwa îgûrû ya rwara rûrû, na wana gîkuû gîtimîkîria inya.

¹⁹Ngakûnenkera mbungûro cia ûnene bwa îgûrû. Kîonthe kîra ûkaarega gûkû nthîgûrû, wana îgûrû igîkaaregwa. Na kîra ûgeetîgîîria gûkû nthîgûrû wana îgûrû gîgeetîgîîrua.”

²⁰Yiesû abeera batikeere antû n'we Kîrîstû.

²¹Kuuma îgiita rîru Yiesû aanjîîria kwonia arutwa baake nwa mwanka athi Njerusaremu anyamaarue mûno n'akûrû, *athînjîri bara banene ba Ngai, na aarimû ba watho bamûûragithie. Îndî akaariûka ntugû ya ithatû.

²²Petûrû amwira gataaria, aanjîîria kûmwîra atige kuuga ûgu. Amwîra, “Mwathani, Ngai atiîtîgîîria mantû mamu na ntienda ûgu!”

²³Yiesû aûndûka amwîra, “Taaria aaga ndî, Saitaani, n'ûntû nûkûndigîîria ntiraingia kwenda kwa Ngai. Mathûgaanio maaku ti ma kîîngai i ma kîîmuntû.”

²⁴Yiesû aacooka eera arutwa baake, “Muntû akeenda kûnthingata abatîîrue eetîîyîra, akamata mûtharaba wake, rîru anthingata.

²⁵Ûra oonaga mwoyo ûyû n'uu ûrî gîtûmi akaûra. Îndî ûra akeeruta n'ûntû bwakwa agaatûûra mwoyo.

²⁶Î rîo rî, i baita mbi muntû oona wana ûkeegua nthîgûrû yonthe n'yake, îndî akaaga mwoyo? Anga kûrî kîo muntû ateeyana akîenda kwonokia mwoyo wake?

²⁷“Mwana wa Muntû arî akubî kûûya na araîka baake arî na mwago wa Îthe. Eengeerie kûûya atuîre woora muntû kûringana na ngûgî yake îra arûthîîte.

²⁸Na mma ga nkûbwîra, bamwe ba baba barûngi aaga batiikua batooneete Mwana wa Muntû akîîya na ûnene bwake.”