Read tharaka MATHAYO 17 Bible Online

MATHAYO 17 - tharaka bible

MATHAYO 17

¹Nyuma ya ntugû ithanthatû Yiesû aathûkia Petûrû, Njakubu, na mûruagina Njoana, abatongoreeria baathi baatwa kîrîmaani kîîraaya mûno. Na baarî gûku bonka.

²Arutwa babu baaraitha boona Yiesû aanjîîria kûgarûka. Ûthiû bwake bwatua gûkengakenga ta riûa na nguo ciake ciatua gûyica mûno ta werû.

³Nthûti arutwa babu bathatû boona Musa na Eriya bakîaria n'we.

⁴Petûrû akwona ûgu eera Yiesû, “Mwathani, na kaaba tûrî aaga. Weegua wenda mbîtîgîîria mbake tûganda tûthatû aaga—gaaku, ka Musa na ka Eriya.”

⁵Petûrû akîaragia woogu, îtu rîîyerû rîaya rîabakunîka. Beegua kayû kauma ku kauga, “Ûyû i Mwana wakwa na immwendeete mûno. Nankenagia mûno, mûthikagîîrieni!”

⁶Arutwa bakwîgua ûgu beeturania nthî batiirithîîtie moothiû mûthetuuni n'ûguaya.

⁷Yiesû aathi oogo abaringithia abeera, “Ûkîîraani, tigaani kûmaka.”

⁸Bagûûkîîra boonire Yiesû wenka, batoona babu bangî.

⁹Beendamîîte baumîîte kîrîmaani gîku Yiesû aakaania arutwa baake abeera, “Bûtikeere antû mantû mara bwona mwanka rîra Mwana wa Muntû akaariûka aume kîrî bara bakuû.”

¹⁰Arutwa baake bamûûria, “I kî n'ûntû aarimû ba watho barutanaga bakauga nwa mwanka Eriya aaye mbere ya Kîrîstû aaya?”

¹¹Yiesû abacookeria abeera, “N'ûmma Eriya nwa mwanka aaye oone mantû magûkara bûra maagîrîtwe wîgua makari.

¹²Îndî ka mbwîreeni. Eriya akûûya bataamwona ta muntû na gûtirî ûntû bataamûrûtha. Kinya Mwana wa Muntû nwa bu bakaamûrûtha.”

¹³Arutwa ba Yiesû baathûkiirie i Njoana Mûbaatithania augagîîra.

¹⁴Yiesû na arutwa babu bathatû bakuuma gûku baarî kîrîmaani beethîra kîrîndî kîyire. Muntû ûmwe kîrîndîîni gîku aathi kîrî Yiesû aaturia maru mbere yake.

¹⁵Amwîra, “Itû, Mwathani, mbîgîîrua kaîyî gaakwa kîao, karî na nkurî ikathîînagia mûno. Gakaraga gakîgwîyangaga mwankiini kana rûûyîîni.

¹⁶Ngûkareeta arutwa baaku ibaremirwe i ko.”

¹⁷Yiesû auga, “Biû bûrî nthuke înthûûku, îtarî wîtîgio. I mwanka rî ngaakarania naabi? Na nkaabwinyîkîria mwanka rî? Ndeeteraani kaana gaku.”

¹⁸Yiesû aagondokera kîrundu gîku. Kîrundu gîku gîakagirîkia gîkiuma, kîathi. Kaana kaabua warîru.

¹⁹Nyumaani barî bonka arutwa baûria Yiesû, “I kî n'ûntû tiû tûremirwe kwîngatia kîrundu kîra gîkûrî na kaana kara?”

²⁰Yiesû abeera, “N'ûntû bwa bûra wîtîgio bwenu bûrî bûûniini. Na mma ga nkûbwîra, bunka bûrî na wîtîgio wana ûkeegua ibûgana ta gapîndî kaniini nwa bûtûme kîrîma ta gîkî gîkûûka aaga gîkathi bantû angî. Gûtirî bu bûrema. [

²¹Kîrundu ta gîku gîtiîngatîka na kîngî tatiga na maromba ma gûtîîrîra kûrîa.]”[19]

²²Îgiita rîmwe barî amwe Gariiri, Yiesû eera arutwa baake, “Mwana wa Muntû akaaguutanîrwa anenkanîrwe kîrî antû

²³bara bakaamûûraga. Îndî akaariûka ntugû ya ithatû.” Arutwa baake bakwîgua ûgu baagwatwa i kîeba.

²⁴Yiesû na arutwa baake bagûkinya taûni ya Kaperinaumu, arûngithia ûgooti bwa nyomba ya Ngai baathi kîrî Petûrû bamûûria, “Mwarimû wenu narîaga ûgooti bwa nyomba ya Ngai?”

²⁵Petûrû abeera, “Yîî, narîaga.” Petûrû akûthi nyomba îra Yiesû aakaraga, mbere kinya amûgwetera, Yiesû amwîra, “Ingûkûûria, Simioni. Anene beethîranagia ûgooti kuuma kîrî ba ûû? I kuuma kîrî aana baao, kana i kuuma kîrî antû bara bangî?”

²⁶Petûrû amûcookeria amwîra, “I kuuma kîrî antû bara bangî.” Yiesû amwîra, “Kwoogu aana baao batibatîîrue baûrua.

²⁷Îndî n'ûntû ntikwenda tûthûûrana na antû baba, thûkia ndwano ûthi îriani. Îkûyû rîra ûkaagwata ûraithe kanyua ka rîo ûkeethîra mbia ku. Mbia inu ûthûkie cio ûthi ûndîîrîîre na woû ûkîrîa ciaku na wacio.”