Read tharaka MATHAYO 18 Bible Online

MATHAYO 18 - tharaka bible

MATHAYO 18

¹Warîo arutwa ba Yiesû baaya kîrî we bamûûria, “N'ûû mûnene ûneneeni bwa îgûrû?”

²Yiesû eeta kaana kaniini, akarûngamia mbere yao.

³Abeera, “Na mma ga nkûbwîra, bûtikinya ûneneeni bwa îgûrû nwanga bûkagarûka bûgakara ta twana tûniini.

⁴Ûra akeenyithia akare ta kaana gaka kaniini n'we akaathi ûneneeni bwa îgûrû.

⁵Na ûra akenagîîra kaana ta gaka riîtwaani rîakwa, i niû akenagîîra.”

⁶Yiesû auga, “Ûra atûmaga nwa ûmwe wa baba baniini bambîtîgîîtie beeyia, i kaaba akoogeerwa iiga rîa kûthia nkingo akagerwa ndiani îra nene îriani.

⁷Antû ba nthîgûrû bakoona thîîna n'ûntû bwa mantû mamu matûmaga antû beeyia! Mantû ta mamu matiûra, îndî ûra amareetaga akoona thîîna!

⁸Weegua i njara yaku kana kûgûrû gwaku gûgûtûma wîyia, giita ûte! I kaaba ûkathi mwoyooni wa tene na tene ûrî na njara îmwe kana ûrî na kûgûrû kûmwe, nkûrûki ya ûkara ûrî na njara irî ciîrî kana magûrû marî maîrî na mûthiani ûgerwa mwankiini ûra ûtooraga rî kana rî.

⁹Kana weegua i riitho rîaku rîgûtûma wîyia, rîtûre! I kaaba ûkathi ûneneeni bwa Ngai ûrî na riitho rîmwe, nkûrûki ya ûmaiga marî maîrî, na mûthiani ûgerwa mwankiini wa îcamaarîro.

¹⁰“Menyeeraani bûtikaabûthie nwa ûmwe wa baba baniini, n'ûntû ga nkûbwîra, rîonthe araîka baao iboonanaga na Baaba ûra arî îgûrû. [

¹¹Mwana wa Muntû aayire kwonokia bara baûrîîte.”][20]

¹²Yiesû abeera, “Tathûgaaniani. Ûkeegua muntû arî na ng'ondu ciake îgana rî, îmwe ya cio îkaûra ntikuuga natiga inu ingî mîrongo kenda na kenda akathi gûcûa înu mbûru?

¹³Na mma ga nkûbwîra, akaaya kûmîona amîkeneera nkûrûki ya ira ingî mîrongo kenda na kenda itakûûrîîte.

¹⁴Ûgu i ta bu Baaba ûra arî îgûrû ateendaga kaana nwa kamwe ga tûtû tûniini kaûra.”

¹⁵Yiesû aathi na mbere abeera, “Muntû agakwîyîria, îthi ûmwîre bûrî baîrî bûra akwîyîîtie. Akaaya gûkûthikîîria na akoona meeyia maake nookamenya agûtuîka mûruanyûkwe kaîrî.

¹⁶Îndî akarega gûkûthikîîria na akarega gwîtîgîîria meeyia maake, mwîtîre muntû ûngî ûmwe kana baîrî, kaingo ntheto wîgua irî na ûkûûyî bwa antû baîrî kana bathatû.

¹⁷Akaaya kûrega kwîgua antû babu wana bo, îra kanica. Aarega kwîgua kanica n'yo, ûyu nookamûthûkia bûmwe na mûregi kana mûrûngithia ûgooti.”[21]

¹⁸Yiesû abeera, “Na mma ga nkûbwîra, bunthe bûra bûkaarega gûkû nthîgûrû ibûkaaregwa kinya îgûrû. Na monthe mara na mo bûgeetîgîîria gûku nthîgûrû mageetîgîîrua kinya îgûrû.

¹⁹“Na kaîrî ka mbwîreeni. Bûkagwatana antû baîrî bûgeetîganîîria kûromba gîntû kîna, Baaba ûra arî îgûrû akabwaa kîo,

²⁰n'ûntû ara baîrî kana bathatû beegagua barî n'ûntû bwa riîtwa rîakwa, mbîgagua ndî amwe na bo.”

²¹Petûrû aathi kîrî Yiesû amûûria, “Mwathani, i maita magana mbagîrîtwe kûrekera mûruayia ambîyia? Ti maita mûgwanja?”

²²Yiesû amûcookeria amwîra, “Ga ngûkwîra, ti maita mûgwanja. I maita mîrongo mûgwanja maita mûgwanja.

²³Ûnene bwa îgûrû bûkari ta mûnene ûmwe ûra eendaga mûtari wa mbia ciake ira aatigîrîte aruti ngûgî baake.

²⁴Akwanjîîria gûtarîrwa, aareeterwa mûruti ngûgî ûmwe aarî na îrandû rîa mamiirioni.

²⁵Na n'ûntû mûruti ngûgî ûyu ataarî na gîntû gîa kûmûrîa na kîo, mûnene wake auga akeendue amwe na mûka na twana twene na into biake bionthe bira aarî na bio, kaingo mbia inu cionara.

²⁶“Mûruti ngûgî ûyu aathi aaturîria mûnene ûyu maru amwereka mûno. Amwîra, ‘Itû, mûnene, mpa kaanya ngakûrîa mbia ciaku cionthe.’

²⁷Mûnene amwîgua kîao, amûcaamîra îrandû rîake rîonthe, auga naakathi.

²⁸“Mûruti ngûgî ûyu akûthi, aathi kûrandûka mûruti ngûgî ûngî ta we aarî na îrandû rîake rîa tûbia tûgana ûna. Amûbûria, amûgwata mîmero, aanjîîria kûmwita akîmwîraga, ‘Îmunthî nûkûûndîa, ûûndîe.’

²⁹“Mûruti ngûgî ûyu aagwa nthî na maru. Amwereka amwîra, ‘Itû, aba, mpa kaanya, ngakûrîa.’

³⁰Îndî amwe na amwîra ûgu, muntû ûyu aarega auga athaîkwe mwanka rîra akaamûrîa.

³¹“Aruti ngûgî bara bangî bakwona bûra muntû ûyu aarûtha, baathûûra mûno. Baathi bamuuga kîrî mûnene.

³²Mûnene akwîrwa, amwîta amwîra, ‘Woû ûrî mûruti ngûgî ûmûthûûku mûno! Niû ntaakûrekeere îrandû rîaku rîonthe n'ûntû bwa bûra wamberekire bûgana?

³³Ka woû ûtakwîgua ûra ûngî kîao ta bûra niû ndakwîgiirue?’

³⁴Mûnene aathûûra mûno, auga airwe nceera mwanka rîra akaamûrîa ndururu ya mûthia.

³⁵“Ûgu i ta bu Baaba ûra arî îgûrû akaabûrûtha weegua muntû atiirekera ûra ûngî na nkoro yake yonthe mabîtia mara amûrûthîrîte.”