Read tharaka MATHAYO 19 Bible Online

MATHAYO 19 - tharaka bible

MATHAYO 19

¹Yiesû akûrîîkia kweyana ngerekano înu auma Gariiri aathi Njundea, rûgongo rûra rûngî rwa muuro wa Njorondani.

²Antû baingî mûno bamûthingata, na kîrî bo ooria bara baayîîtue.

³*Abarisai bamwe baathi kîrî we bakîenda kûmûgeria beegua bûra akauga. Bamwîra, “*Watho bwetû ibwîtîgîîrîîtie muntû acookia mûka kûringana na bûra akeenda?”

⁴Yiesû abacookeria na kîûria abaûria, “Ka bûtaathooma bûra *Maandîko Maatheru maugîîte?” Abeera, “Maandîko Maatheru maugîîte, kîambîrîriani ûra aûmbire akîûmba, ‘Aûmbire antû barî muntû mûrûme na mûka.

⁵Kwoogu muntû mûrûme aumaga kwa îthe na gina akagwatana na mûka wake. Na barî baîrî bagatuîka mwîrî ûmwe’

⁶T'antû baîrî mwanya kaîrî, batuîkaga muntû ûmwe. Kwoogu bara Ngai agwatithanîîtie, gûtikaagîte muntû abaathûrana.”

⁷Abarisai bamûûria, “Na aabu i kî n'ûntû *watho bwa Musa bwîtîgîîrîîtie muntû acookia mûka bunka aandîkîîte baarûa ya kwonania bakuumanwa?”

⁸Yiesû abeera, “Musa aabwîtîgîîrie bûcookagia aka beenu n'ûntû bwa ûûmo bwa biongo bienu. Îndî kîambîrîriani gûtaakari ûgu.

⁹Na ga nkûbwîra, muntû ûra acookagia mûka n'ûntû bwa ûntû bûngî bûtarî ûthûngîîri akagûra mûka ûngî, ûyu i kûthûngîîra eegagua akîthûngîîra.”

¹⁰Arutwa ba Yiesû bauga, “Ûkaaya kwîgua i bu mantû ma muntû na mûka makari ûgu rî, i kaaba rîmwe muntû agakara atagûreene kana atarî mûgûre.”

¹¹Yiesû abeera, “T'antû bonthe baûmba gûciûra mantû mamu, tatiga bara Ngai eete gûciûkîrwa kwa mo,

¹²n'ûntû kûrî arûme nthaata kuuma gûciarwa na kûrî bo baakabirwe n'antû, na bangî beenda gûtuîka nthaata n'ûntû bwa gûtûmîkîra Ngai. Ûra akûûmba gûciûra mantû mama naciûre.”

¹³Antû bamwe ibaareeteete twana kîrî Yiesû kaingo aturîîkîîra njara aturombera. Îndî arutwa baake baanjîîria gûkaania antû babu.

¹⁴Yiesû abeera, “Rekanaani na twana tûûye kîrî niû. Bûtigaatûgirie n'ûntû ûnene bwa îgûrû i bwa bara bakari ta twana tûtû.”

¹⁵Yiesû aturîîkîîra njara atuthaarima. Agûtuthaarima aathi.

¹⁶Îgiita rîmwe muntû ûmwe aathi kîrî Yiesû amûûria, “Mwarimû, n'ûntû bûrîkû bwega bûra ndûtha nkathi mwoyooni wa tene na tene?”

¹⁷Yiesû amûûria, “I kî n'ûntû ûkûmbûûria bûra bwega? Ûra mwega n'ûmwe. Weegua nûkwenda mwoyo wa tene na tene athîkagîra maathana ma Ngai.”

¹⁸Muntû ûyu amûûria, “Maathana marîkû?” Yiesû amwîra, “Mara maugîîte, ‘Ûtikaûragane,’ ‘Ûtikaathûngîîre,’ ‘Ûtikaiye,’ ‘Ûtigaatuyanîîre,’

¹⁹‘Tîîyaga abaagu na nyûkwe,’ na ‘Enda mûtûûri waku ta bûra wîbendeete.’ ”

²⁰Mûthaka ûyu eera Yiesû, “Mamu monthe immaathîkagîra. Gûtirî bûngî?”

²¹Yiesû amwîra, “Weegua nûkwenda gûtuîka ûmwagîru kûrû, îthi wendie bira bionthe ûrî na bio ûgaîre nkîa mbia ira bikauma, rîru ûûye ûnthingate. Ûkarûtha ûgu ûkeegua ûrî na ûtonga îgûrû.”

²²Muntû ûyu akwîgua ûgu aathi akîonanagia kîeba n'ûntû naarî na into biingî mûno.

²³Yiesû eera arutwa baake, “Na mma ga nkûbwîra, n'ata kûrî inya gîtonga kûthi ûneneeni bwa îgûrû.

²⁴Na wabu ga nkûbwîra, i ûûthû nkamîîra gûkûrûkîîra karinyaani ga cindano kîrî gîtonga kûthi ûneneeni bwa Ngai.”

²⁵Arutwa bakwîgua ûgu baarigara mûno. Baanjîîria kûûrania, “Anga kûrî we akoonokua?”

²⁶Yiesû abacûûba. Abeera, “Kîrî muntû bûbu bûtiûmbîka, îndî gûtirî ûntû bûrema Ngai.”

²⁷Petûrû aûria Yiesû, “Î tiû naati tûtigîîte bionthe twakûthingata rî, gûgaakara ata?”

²⁸Yiesû abeera, “Na mma ga nkûbwîra, rîra Mwana wa Muntû agaakarîra gîtî kîa ûnene mwagooni wa nthîgûrû înjerû, wana biû arutwa baakwa bûgaakarîra itî bia ûnene bûgiitîre îgamba mîîrîga ya Isiraeri îrî îkûmi na îîrî.

²⁹Na muntû wonthe ûra atigîîte mûciî wake, kana aruagina, kana aaragina, kana îthe, kana gina, kana twana, kana mûnda n'ûntû bwakwa akoona wega maita îgana, na akoona mwoyo wa tene na tene.

³⁰Baingî ba bara barî mbere bagaatuîka ba mûthia, bara barî mûthia batuîke ba mbere.”