Read tharaka MATHAYO 2 Bible Online

MATHAYO 2 - tharaka bible

MATHAYO 2

¹Yiesû aaciarîîrwe taûni ya Bethireemu gîteere kîa Njundea, îgiita rîra Eronde aarî mûnene. Antû bamwe baûgî[2] baaya Njerusaremu baumîîte bwa mbarî ya uumîîro bwa riûa.

²Baûrithîria, “Arî kû ûra aciarîîtwe atuîka Mûnene wa Ayaundi? Twaya kûmûgonga n'ûntû itwonire nthata yumîîte bwa mbarî ya uumîîro bwa riûa îkîonanagia gûciarwa gwake.”

³Rîra mûnene Eronde aakinyîîrwe i mantû mamu eegua aatangîka mathûgaaniani maake. Na t'we wenka i Njerusaremu akubî yonthe.

⁴Eeta *athînjîri bara banene ba Ngai na aarimû ba watho bonthe amwe, abaûria i na kû kweerirwe Kîrîstû agaaciarwa.

⁵Bamwîra, “I taûni ya Bethireemu gîteereeni kîa Njundea, n'ûntû ûûgû i bu kwandîkîîtwe i kîroria,

⁶‘Woû, Bethireemu nthîgûrû ya Njunda, naka na woû ûtirî mûkai kîrî atongoria ba Njunda, n'ûntû ûkauma mûtongoria ûra akaatha antû baakwa ba Isiraeri.’ ”

⁷Mûnene Eronde eeta antû babu baûgî kajûri, abaûria rîra rîongwa nthata înu yonekire.

⁸Abatûma Bethireemu abeera, “Îthiini bûcûnkûûne mantû ma kaana gaku. Bwakoona bûcookeere aaga bûkîmmenyithia kaingo na niû nthi gûkagonga.”

⁹Bakûrîîkia kwîgua bûra mûnene aabeerire, bauma agu baathi bûra baathiîte. Bakuuma, nthata îra booneete îrî bwa mbarî ya uumîîro bwa riûa yabatongoreeria kaîrî baathi mwanka yarûngama ara kaana kaarî.

¹⁰Bakwona yarûngama baakena mûno.

¹¹Baathûngîra nyomba boona kaana kagwetwe i gina, Maria. Baaturia maru bakagonga, baarugûra biondo biao bakanenkera biewa bia thaabu, macoco, na manemane.[3]

¹²Ngai abakaania kîrootooni abeera, “Bûtigaacookeere kwa Mûnene Eronde kaîrî.” Kwoogu bakîînûka baacookire na njîra îngî.

¹³Ageni bakûthi, Njosebu aaroota mûraîka wa Mwathani akîmwîraga, “Ûka ûthûkie kaana ûgakuthûkie amwe na gina, bûthi Miisiri bûkare noogo mwanka rîra ngaakwîra n'ûntû Eronde nagûcûa kaana gaka akaûraga.”

¹⁴Njosebu agûûka aathûkia kaana na gina wa ko baathi bwa Miisiri.

¹⁵Baakara noogo mwanka rîra Eronde aakuire, kaingo bûra Mwathani augire gûkûrûkîîra kanyuani ga kîroria bûûyûra. Augire, “Indeetire mwana wakwa kuuma nthîgûrû ya Miisiri.”

¹⁶Mûnene Eronde aathûûra mûno akûmenya antû babu baûgî ibaamweneerie. Aatûma acikaarî, abaa watho bwa kûûraga twana twa twîyî tunthe tûra twakinyithîîtie mîanka îîrî kwîndama, tûra twarî Bethireemu na ntûûra ira ciarî akubî n'yo wata bûra aamenyithîîtue n'antû babu.

¹⁷Mantû mara kîroria Njeremia aariirie maûyûra. Augire,

¹⁸“Mbu nîeguîkire Rama, kîrîro na kîîthikîîro kîînene, Raeri akîrîrîra twana twake, aarema gûkirakirîka, n'ûntû tûtirî mwoyo.”

¹⁹Eronde agûkua, Njosebu barî naagu Miisiri aaroota mûraîka wa Mwathani akîmwîraga,

²⁰“Ûka ûthûkie kaana na gina bûcooke nthîgûrû ya Isiraeri n'ûntû bara bareendaga kûûraga mwana i baakuû.”

²¹Njosebu aûka aathûkia mwana na gina baacooka Isiraeri.

²²Njosebu akwîgua Arikeraus, mwana wa Eronde, n'we aathanaga Njundea îthe agûkua, aakuthûka kûthi noogo. Ngai amûkaania kîrootooni athi bûngî, aathi bwa gîteere kîa Gariiri

²³taûni ya Nasareethi aatûûra noogo. Na i kaingo ntheto ira ciariirue i kîroria ciûyûra. Kîroria kîaugire, “Ageetagwa Mûnasareethi.”