Read tharaka MATHAYO 20 Bible Online

MATHAYO 20 - tharaka bible

MATHAYO 20

¹Yiesû eera arutwa baake, “Ûnene bwa îgûrû bûkari ta mwene mûciî ûra aaraûkire kuuma rûkîîrî mûno, aathi aacûa antû ba kûmûrutîra ngûgî mûndaani wake wa ncabiibû.

²Akûboona na baagwatanîra akaabarîa îrîi rîa gîîntugû, aboonia mûnda.

³“Aacooka aumagarûka kaîrî ta thaa ithatû. Aathi thokooni oona antû barûngi woogu mana gûtarî bu bakûrûtha.

⁴Abeera, ‘Kinya biû îthiini bûndutîre ngûgî mûndaani nkabûrîa bûra kwagîrîte.’

⁵Beetîgîîria baathi. “Aacooka kaîrî ta thaa thiita na ta thaa kenda aacûa bangî.

⁶Ta thaa kûmi na îmwe aumagarûka kaîrî eethîra bangî barûngi. Abaûria, ‘N'ata n'ûntû bwatinda bûrûngi aaga mûthenya unthe gûtarî bu bûkûrûtha?’

⁷“Antû babu bamwîra, ‘Tûtiroona muntû wa gûtwaa ngûgî.’ “Muntû ûyu abeera, ‘Wana biû tûthiini bûkaandutîre ngûgî ya mûnda.’

⁸“Ûgoro bûgûkinya mwene mûnda eera mûrûngamîîri wa ngûgî yake, ‘Îta aruti ngûgî ûbee mbia ciao, na wanjîîrie na bara baaya rîa mûthia ûrigie na bara baayire rûkîîrî.’

⁹“Bara baayire thaa kûmi na îmwe baaya baarîwa wakîra muntû îrîi rîa ntugû yûyûri.

¹⁰Bara baayire rûkîîrî bakwona ûgu beerîgîîra bakaarîwa mbia inyingî nkûrûki yao. Îndî wana bo baarîirwe îrîi rîa ntugû.

¹¹Bakwona mbia ira beewa baanjîîria kûnung'unîra mwene mûnda

¹²bakîmwîraga, ‘N'ata ûûmba gûtûrîa bûmwe na antû barutîîte ngûgî îthaa rîmwe na tûtindîîte kûthithina mûthenya unthe tûkîrûngûraga i riûa!’

¹³“Mwene mûnda aacookeria ûmwe wao amwîra, ‘Bai, ntikûbûbîtîria. Tûtigwatanîîre nkaabûrîa îrîi rîa ntugû?

¹⁴Thûkia bira birî biaku ûthi. I kwenda gwakwa ndatûmîra kûrîa bara baaya rîa îrigia bûmwe naabi.

¹⁵Ga ntaûmba kûrûtha bûra nkeenda na mbia ciakwa? Kana i rûriitho bûkûbeegua n'ûntû bwa kûbua gwakwa?’ ”

¹⁶Yiesû eera arutwa baake, “Bara barî mbere bagaatuîka ba mûthia, bara barî ba mûthia batuîke ba mbere.”

¹⁷Yiesû bathiîte Njerusaremu, eeta arutwa bara baake îkûmi na baîrî gataaria. Abeera,

¹⁸“Îîndî tûthiîte Njerusaremu na Mwana wa Muntû agaakunyanîrwa anenkanîrwe kîrî *athînjîri bara banene ba Ngai na aarimû ba watho bamûtuîre kûûragwa.

¹⁹Na bakamûnenkanîra kîrî antû batarî Ayaundi bamûnyûrûnte, bamûringe ibooko, bamwambe. Îndî akaariûka ntugû ya ithatû.”

²⁰Mwekûrû wa Cabendi aathi kîrî Yiesû arî na aana baake baîrî. Aaturîria Yiesû maru akîenda amûrûthîra ûntû.

²¹Yiesû amûûria, “N'ata ûkwenda?” Mwekûrû ûyu amwîra, “Ndîenda uuga aana baba baakwa bagaakara amwe naawe ûneneeni bwaku, ûmwe rûteere rwaku rwa ûrîo na ûyû ûngî rwa ûmotho.”

²²Yiesû eera aana babu, “Biû bûtikûmenya kîra bûkûromba. Bûkaûmba kûnyua gîkombe kîra nkaanyua gîa kûnyamaarua?” Bamûcookeria bamwîra, “Yîî, tûkaûmba.”

²³Yiesû abeera, “Gîkombe kîra nkaanyua bûgakînyua, îndî ti niû mbagîrîtwe nthuura mbuga i ngania agaakara rûteere rwakwa rwa ûrîo kana rwa ûmotho. Naagu kûthuuranîrîtwe gûkarwa i bara Baaba ataarîîte.”

²⁴Arutwa bara bangî îkûmi bakwîgua bûra Njakubu na Njoana beendaga babathûûra.

²⁵Yiesû abeeta baayanga akubî n'we. Abeera, “Bara barî anene ba nthîgûrû îno beendaga kwonia antû i bo anene, atongoria ba nthîgûrû beekumagia kwonia antû i bo atongoria, wata bûra bwiyî.

²⁶Îndî biû bûtibatîîrue bwîgua bûkari ûgu. Ûra wacienu akwenda gûtuîka mûnene natûmîkîre bara bangî.

²⁷Ûra akwenda gûtuîka wa mbere natûmîkîre bonthe,

²⁸ta bûra Mwana wa Muntû ataaya gûtûmîkîrwa. Aayire gûtûmîkîra antû na kûruta mwoyo wake wonokia antû baingî.”

²⁹Yiesû na arutwa baake baumîîte bwa taûni ya Njeeriko, antû baingî mûno bamûthingata.

³⁰Ikwarî na antû baîrî ntûngi baakari rûteere rwa njîra. Bakwîgua i Yiesû aakûrûkîîte baanjîîria kûmwîta na inya bakiugaga, “Mwathani, Mwana wa mûciî wa Ndaundi, twîgue kîao!”

³¹Antû baingî baanjîîria kûbakaania bakîbeeraga bakire, îndî bataakira. Baûkîîria tûyû na inya nkûrûki bakiugaga, “Mwathani, Mwana wa mûciî wa Ndaundi, twîgue kîao!”

³²Yiesû aarûngama abeeta. Abaûria, “N'ata bûkwenda mbûrûthîra?”

³³Ntûngi inu ciamwîra, “Mwathani, itûkwenda tûtua kwona.”

³⁴Yiesû abeegua kîao. Aatambûrûkia njara yake abatonga meetho. Nthûti îmwe baatua kwona bamûthingata.