Read tharaka MATHAYO 21 Bible Online

MATHAYO 21 - tharaka bible

MATHAYO 21

¹Yiesû na arutwa baake bathiîte Njerusaremu, barî akubî gûkinya beethîra bantû kwarî na Karîma ka Mîceituuni, gataûni geetagwa Bethipage. Bagûkinya oogo, Yiesû aatûma arutwa baake baîrî bathiyaga.

²Abeera, “Îthiini gataûni gaka karî mbere aaga, na bwakinya ûgu bûkoona îng'ooi rîrî na kayaû rîthaîkîîtwe, bûthaûre rîo bûndeetere.

³Ûra akaabûûria i kî n'ûntû bûkûrîthaûra, bûmwîre, ‘I Mwathani arî bata na rîo na akarîcookia waaga, atiikarakara na rîo.’ ”

⁴Ûntû bûbu bwatuîkîkire kaingo mantû mara Mwathani aariirie gûkûrûkîîra kanyuani ga kîroria maûyûra, rîra augire,

⁵“Îra antû ba taûni ya Cayûni, ‘Cûûba bwone mûnene wenu aayîîte. Neendeete ûkiri na akamatîîtwe n'îng'ooi, gatigiri, kayaû ka îng'ooi.’ ”

⁶Arutwa babu baathi baarûtha wabûra Yiesû aabeerîîte.

⁷Bamûreetera îng'ooi rîru na kayaû ka rîo, bamwarîra tûbuuti twao mûgongo wa mo, Yiesû aakarîra.

⁸Antû baingî mûno baara tûbuuti twao barabaraani, na bangî baatema mathîgî bakîmwaragîra nthî.

⁹Kîrîndî kîonthe kîra kîathiîte kîrî mbere ya Yiesû na kîra kîamuumîîte nyuma kîonthe kîanjîîria kuugîîria gîkiugaga, “Ocana kîrî Mwana wa mûciî wa Ndaundi! N'ûmûthaarime ûra aayîîte kwa riîtwa rîa Mwathani! Ocana kîrî ûra arî îgûrû mûno mûno!”

¹⁰Bagûkinya Njerusaremu taûni yonthe yagwatwa i kîrigaro. Antû baatua kûûrania, “Ka muntû ûyû arî ûû?”

¹¹Bara baayanîîtie na Yiesû babeera, “Ûyu i Yiesû wa kuuma Nasareethi naara nthîgûrû ya Gariiri. I kîroria.”

¹²Yiesû aathi nyomba ya Ngai eengatia antû bonthe bauma ku bara baagûraga na bara beendagia into na nyamû. Aakuûrania meetha cia bara baakûûranagîa mbia na tûkongoro twa bara beendagia macea mara ma mîciî.

¹³Aabeengatiirie akîbeeraga, “*Maandîko Maatheru maugîîte, ‘Nyomba yakwa îgeetagwa nyomba ya kûndombera,’ îndî biû bûmîtuîkithîîtie ‘îkurungu rîa kwîbithaga aamba!’ ”

¹⁴Ntûngi na bionje biaya agu nyomba ya Ngai, Yiesû abooria.

¹⁵*Athînjîri bara banene ba Ngai na aarimû ba watho baathûûra mûno n'ûntû bwa mantû mamu Yiesû aarûthire ma kûrigaria, na n'ûntû bwa bûra twana twaugagîîria na inya agu nyomba ya Ngai tûkiugaga, “Ocana kîrî Mwana wa mûciî wa Ndaundi!”

¹⁶Beera Yiesû, “Anga nûkwîgua bûra twana tûtû tûkuuga?” Yiesû abeera, “Inkwîgua mma. Îndî anga bûtaathooma bûra kwandîkîîtwe Maandîkooni Maatheru, ‘Ngaatûma twana na tûgenke tûngonga bûra kwagîrîte’?”

¹⁷Yiesû abatiga aathi kûraara gataûni geetagwa Beethania.

¹⁸Rûûni rûkîîrî Yiesû neegagua yûûra acookeete bwa taûni ya Njerusaremu.

¹⁹Arî kûraaya oona mûkûyû rûteere rwa njîra. Akûthi atoona ûrî na nkûyû, nwa mathangû monka warî na mo. Yiesû acuîra, “Woû ûtikooro ûciara kaîrî!” Mûkûyû ûyu waûma warîru.

²⁰Arutwa baake bakwona mûkûyû waûma warîo, baarigara mûno i kîama gîku. Baûria, “N'ata mûkûyû ûyû waûma weendî?”

²¹Yiesû abeera, “Na mma ga nkûbwîra, bunka muntû atarî na nkanja ageetîgia bûra akuuga bûgaatuîkîka, nwa arûthe manene nkûrûki ya ûgu bwona ndarûtha mûkûyû. Nwa wone weera kîrîma ta gîkî, ‘Kûûka ûkagwe îriani,’ na gûgakarîka woogu.

²²Ûntû bunthe bûra ûkaaromba Ngai ûrî na wîtîgio, agakwingîria bu.”

²³Bagûcooka Njerusaremu kaîrî, Yiesû aathi aathûngîra nyomba ya Ngai aanjîîria kûrutana. *Athînjîri bara banene ba Ngai na akûrû baaya ku bamûûria, “I kû ûrutîîte watho bwa kûrûtha mantû mama ûkûrûtha? Na n'ûû akwete bu?”

²⁴Yiesû abeera, “Wana niû ka mbûûrieni. Bûkaûmba gûncookeria, wana niû nkabwîra ara ndutîîte watho bwa kûrûtha mantû mama nkûrûtha.”

²⁵Abaûria, “I kû Njoana aarutîîte watho bwa kûbaatithania? I kuuma kîrî Ngai kana i kuuma kîrî muntû?” Baanjîîria kwîrana, “Twamwîra i kuuma kîrî Ngai, agaatûûria, ‘Aabu i kî n'ûntû bûtaamwîtîgia?’

²⁶Na twamwîra, ‘I kuuma kîrî muntû,’—arî, tiga! Itûgûkuthûka kîrîndî n'ûntû antû bonthe beetîgîîtie Njoana aarî kîroria.”

²⁷Kwoogu beera Yiesû, “Tûtiiyî.” Yiesû abeera, “Wana niû ntibwîra ara ndutîîte watho bwa kûrûtha mantû mama nkûrûtha.”

²⁸Yiesû aathi na mbere kûbaarîria abeera, “Tathûgaaniani. Ikwarî na muntû aarî na aana baîrî. Îgiita rîmwe aathi kîrî ûra mûkûrû amwîra, ‘Bai, îmunthî îthi mûndaani.’

²⁹“Mûthaka amûcookeria amwîra, ‘Arî, ntikwenda.’ Îndî nyumaani aacooka kwona akûbîtia, aathîkîra îthe.

³⁰Mûkûrû aathi kîrî ûra ûngî mûniini n'we amwîra. Mûthaka ûyu mûniini amwîra, ‘Inkûthi warîru, baaba.’ Îndî ataathi.”

³¹Yiesû aûria *athînjîri bara banene ba Ngai na akûrû bara baarî agu, “N'ûrîkû kîrî aana babu barî baîrî aarûthire bûra îthe eendaga kûrûthwa?” Bamûcookeria bamwîra, “N'ûra mûkûrû.” Yiesû abeera, “Na mma ga nkûbwîra, arûngithia ûgooti na marwaya i bo bakaathi ûneneeni bwa Ngai mbere yenu.

³²Ndîbwîra ûgu n'ûntû Njoana Mûbaatithania akûûya, aayire abwonia njîra îra yagîrîte, îndî bûtaamwîtîgia. Arûngithia ûgooti na marwaya i bo baamwîtîgiirie. Îndî wana bûkwona ûgu bûteerira bûmwîtîgia.”

³³Yiesû aathi na mbere abeera, “Ka mbweeni ngerekano îngî. Kagiita kamwe ikwarî na muntû aarîmîîte mûnda wake aanda ncabiibû. Acwirigîra, aathondeka bantû a gwitîra ncabiibû, na kîbayo aaka. Rîru aakomborithia antû, aathi rûgendo.

³⁴Îgiita rîa maketha rîrî akubî gûkinya, muntû ûyu aatûma aruti ngûgî baake abeera bathi bamûgîîrîre bira biarî biake makethaani mamu kûringana na bûra baagwatanîrîte na antû babu.

³⁵“Aruti ngûgî babu bagûkinya, antû babu baakombereete mûnda babagwata. Baatura ûmwe, ûyu ûngî baûraga, na ûyu ûngî n'we bamûtonyanga na maiga.

³⁶Mwene mûnda aatûma aruti ngûgî baake bangî kaîrî, îndî baingî nkûrûki ya bara ba mbere. Îndî kinya bo baarûthwa wata bara ba mbere.

³⁷Mûthiani mwene mûnda aatûma mwana wake wengwa akîthûgaanagia antû babu bakamûkuthûka woona aarî mwana wake.

³⁸“Antû babu bakwona mwana wa mwene mûnda beerana, ‘Ûyû n'we mwene rûgai. Tûmûûrageeni kaingo rûgai rûtuîka rwetû!’

³⁹Bamûgwata bamuumagaria ome ya mûnda bamûûraga.”

⁴⁰Yiesû abaûria, “Bûrîthûgaania rîra mwene mûnda akaathi eethîre antû babu rî, n'ata akaabarûtha?”

⁴¹Bamûcookeria bamwîra, “Mwene mûnda nakaabathiria, athûûkia babu, acûe antû bangî bara bakaamweyaga gîcuncî gîake îgiita rîakinya.”

⁴²Yiesû abeera, “Anga bûtaathooma bûra kwandîkîîtwe *Maandîkooni Maatheru? ‘Iiga rîra rîaregirwe n'aaki, îîndî i rîo rîtuîkîîte rîa koona. I Mwathani atûmîîte ûntû bûbu bûkarîka, na tûbuonaga bûrî bwa magegania.’ ”

⁴³Yiesû aathi na mbere na kûbeera, “Na kwoogu ga nkûbwîra, Ngai akabûtunya kaanya ga kûthi ûneneeni bwake anenkere antû bangî bara bakaarûtha bûra eendaga kûrûthwa. [

⁴⁴Ûra akaagwîra iiga rîrî nakaunîkanga atuîke tûcuncî, tûcuncî. Na ûra rîkaagwîra rîrî rîo irîkaamûthithira.]”[22]

⁴⁵*Athînjîri ba Ngai na *Abarisai bakwîgua ngerekano inu baamenya i bo Yiesû aatemagia.

⁴⁶Baanjîîria gûcûa bûra bamûgwata. Îndî ibaakuthûkaga antû n'ûntû ibeetîgîîtie Yiesû aarî kîroria.