Read tharaka MATHAYO 23 Bible Online

MATHAYO 23 - tharaka bible

MATHAYO 23

¹Yiesû aacooka aarîria kîrîndî na arutwa baake abeera,

²“Aarimû ba watho na *Abarisai i bo beetîgîîrîîtue kûrutana *watho bwa Musa.

³Kwoogu baathîkagîreeni na rûthagaani monthe mara bakaabwîraga. Îndî bûtikaarûthe bûra barûthaga n'ûntû batirûthaga bûra baugaga kûrûthagwe.

⁴Baîkagia antû mîrigo îtakamatîka n'ûrito na barî bo batienda kûmîringithia nwa na kaara babateetheeria kûmîkamata.

⁵“Mantû monthe mara barûthaga, barûthaga mo kaingo boonwa n'antû. Baneneagia tûthandûkû tûra twogagîîrwa ûthiû tûgeekîrwa *Maandîko Maatheru, na bakaraayithia nkûrûki ya wîthîre mîthia ya nguo ira beekagîra bakîromba, kwonania wagîru bwao.

⁶Rîra barî biathooni kana *masinagoogiini, beendaga gûkara itîîni bia mbere bia gîtîîyo.

⁷Wana rîra barîîkanîîte n'antû beendaga babakeethia na gîtîîyo na babeeta, ‘Rabai.’

⁸“Îndî biû bûtikeende gwîtwa ‘Rabai’ n'ûntû Rabai wenu n'ûmwe na bûrî aana ba Baaba ûmwe.

⁹Na bûtigeete muntû ‘Baaba’ gûkû nthîgûrû n'ûntû Abaagu n'ûmwe na akaraga îgûrû.

¹⁰Na bûtikeende gwîtwa ‘Mwarimû’ n'ûntû Mwarimû wenu n'ûmwe, ta we Kîrîstû.

¹¹Ûra akwenda gûtuîka ûmûnene nkûrûki ya bara bangî natûmîkîre bara bangî.

¹²Ûra akeeneneithia akaanyithua. Na ûra akeenyithia akaaneneua.”

¹³Yiesû abeera, “Bûkoona thîîna, biû aarimû ba watho na Abarisai, eebwithia baba! Bûrigagîîria bara bangî bathi ûneneeni bwa îgûrû na tika biû bûkaathi ku. Bûtirekaga bara bakûthûngîra bathûngîra. [

¹⁴“Bûkoona thîîna, biû aarimû ba watho na Abarisai, eebwithia baba! Bwenagîîria ntigwa bûgaitunya into bia cio. Na bwathi kûromba bwendaga kûromba maromba maaraaya mûno bûkîenda kwîbonania kîrî antû. Îgamba rîenu ûkeegua rîrî rîîthûûku mûno.]”[24]

¹⁵“Bûkoona thîîna, biû aarimû ba watho na Abarisai, eebwithia baba! Bûriûngaga mwanka mûringo wa îria bûgîcûa muntû bûgarûra atuîka wenu. Na bwatiga bûkwona agûtuîka wenu bûmwînyangagia nkûrûki yenu agatuîka mwana wa îcamaarîro.

¹⁶“Bûkoona thîîna, biû atongoria ntûngi! Buugaga muntû akathiîtia na nyomba ya Ngai bûbu t'ûntû. Îndî akathiîtia na thaabu îra îrî nyomba ya Ngai aacookwa i mûthiîtio.

¹⁷Biû bûrî ntûngi intaku! I mbi îrî gîtûmi nkûrûki ya îra îngî, i thaabu kana i nyomba ya Ngai kûra thaabu yaigagwa kaingo îtuîka n'întheru?

¹⁸Na kaîrî bûrutanaga bûkauga muntû akathiîtia na kîthînjîro, bûbu t'ûntû. Îndî akathiîtia na kîra kîrî kîthînjîrooni nacookwa i mûthiîtio ûyu.

¹⁹Ntûngi ino! I mbi îrî gîtûmi nkûrûki ya îra îngî. I kîra kîrî kîthînjîrooni, kana i kîthînjîro ara kîewa kînenkanagîîrua kaingo kîtherua?

²⁰Kwoogu ûra athiîtagia na kîthînjîro kîa Ngai ti kîo gîonka athiîtagia na kîo. Athiîtagia kinya na into bionthe bira birî kîthînjîrooni.

²¹Ûra athiîtagia na nyomba ya Ngai, athiîtagia n'yo amwe na ûra akaraga ku.

²²Na ûra athiîtagia na îgûrû, athiîtagia na gîtî kîa ûnene kîa Ngai amwe na ûra agîkaragîra.

²³“Bûkoona thîîna, biû aarimû ba watho na Abarisai, eebwithia baba! Bûrutaga icuncî bia îkûmi bia into bienu bionthe, wana tûnyamû tûniini tûra tûnunkagia irio bwega, îndî bûgatiga mantû mara marî gîtûmi nkûrûki ya watho ta kûrûthagîra antû bûra kwagîrîte, kûbeegua kîao, na kwîgua bûrî na wîtîgio kîrî Ngai. Bwagîrîtwe bûrûthaga mantû ta mama bûtakûriganîrua i mamu mangî wana mo.

²⁴Biû bûrî atongoria ntûngi! Bûrutaga kathigiiri ûcûrûûni bûkameria njogu.

²⁵“Bûkoona thîîna, biû aarimû ba watho na Abarisai, eebwithia baba! Bûmenyagîîra kûthambia thaani na ikombe nja bûgatiga ndeni biûyûri rûko ta ûtunyani na îtanûka rîa mîthemba yonthe.

²⁶Woû Mûbarisai ntûngi! Amba ûthambie gîkombe na thaani ndeni kaingo wana nja îthera.

²⁷“Bûkoona thîîna, biû aarimû ba watho na Abarisai, eebwithia baba! Bûkari ta nthiko ciakîîtwe cokaa ome kaingo cioneka irî inthongi îgûrû, îndî ndeni ciûyûri maîndî ma antû na woru.

²⁸Wana biû kwa mwonekere antû babwonaga bûrî baagîru, îndî nkoro cienu ciûyûri wîbwithia na ûthûûku.

²⁹“Bûkoona thîîna, biû aarimû ba watho na Abarisai, eebwithia baba! Bûthuuranagîra nthiko cia iroria bia Ngai na bûkagemia cia atheru

³⁰bûkiugaga, ‘Ûkeegua twarî oogo îgiita rîa bakîûyûûyû tûtikîgwatanîra na bo. Tûtigîîtîgîîria nthakame ya iroria îîtûûrwa.’

³¹Kwoogu ibûrîîkîîtie kwonania bûrî bwingwa atî, bûrî aana ba bara baûragire iroria!

³²I bu ni nabûkaûyûrîîria mûthûmba wa biûyûûyû bienu.

³³“Biû, njoka ino! Rûciaro rwa njoka imbîî! Ntikwona bûra bûtagîtuîrwa kûthi îcamaarîro.

³⁴Kwoogu nkabûtûmîra iroria, antû baûme, na aarimû ba watho. Bamwe baao bûkabaûraga na bûbaambe mûtharabaani. Bangî bûbaturîre *masinagoogiini bûkîînganaga na bamwe kuuma taûni kûthi îra îngî,

³⁵kaingo bûcookwa i nthakame ya antû bonthe baagîru îra bweetûûrire, kwanjîîria na ya Abeeri ûra aarî ûmwagîru, mwanka ya Cakaria wa Mberakia ûra bwaûragîîre gatîgatî ka nyomba ya Ngai na ara kîthînjîro kîa Ngai kîarî.

³⁶Na mma ga nkûbwîra, mantû mamu monthe magaacooka nthuke îno.”

³⁷Yiesû auga, “Antû ba Njerusaremu, bûûragaga iroria bia Ngai abitûma kîrî biû, na bûûragaga atûmwa ba Ngai na maiga abatûma kîrî biû. I maita magana ndeendaga kwîthîrania amwe aana beenu ta ngûkû bûra îîthîranagia tûcwi twa yo îguîkîra, îndî naabi bûkarega!

³⁸Atarî, nyomba yaku Njerusaremu n'îganjo.

³⁹Na mma ga nkûbwîra, bûtimbona kaîrî mwanka rîra bûkauga, ‘N'ûmûthaarime ûra aayîîte kwa riîtwa rîa Mwathani.’ ”