Read tharaka MATHAYO 24 Bible Online

MATHAYO 24 - tharaka bible

MATHAYO 24

¹Yiesû akuumagarûka nyomba ya Ngai athiîte, arutwa baake baathi kîrî we bamwonia bûra mwako wa nyomba ya Ngai wathongamîîte bûgana.

²Yiesû abeera, “Ibûkwona mwako ûyû unthe? Na mma ga nkûbwîra, gûtirî iiga rîgaatigwa rîrî îgûrû ya rîra rîngî, monthe imakaanyagaarua.”

³Yiesû akari nthî Karîmaani ka Mîceituuni, arutwa baake baathi kîrî we barî bonka. Bamwîra, “Tatwîre irî mantû mama magaatuîkîka. Na i mbi îkoonania rîra ûkeegua ûûyîîte, rîra mûthiro wa nthîgûrû ûgaakinya?”

⁴Yiesû abeera, “Îmenyagîîreeni bûtikeeneerue i muntû,

⁵n'ûntû antû baingî mûno bakaaya bagîtûmagîra riîtwa rîakwa bakauga i bo Kîrîstû na bagaata antû baingî.

⁶Bweegua ndûa ikîrûîwa kana ikîgwetwa bûtikaamake. Mantû ta mamu nwa mwanka matuîkîke, îndî ûyu t'uu mûthiro.

⁷Nthîgûrû îkaarûa na îra îngî, ûnene bûrûe na bûra bûngî, mayûûra makaaya na nthîgûrû îkainaina gûntû na gûntû.

⁸Mantû mamu monthe i ta rûgakai rwa mbere rwa mwekûrû arî akubî kûgîa na mwana.

⁹“Rîru bûkaanenkanîrwa bûnyamaarue na bûûragwe. Na antû bonthe bakabûmena n'ûntû bwa riîtwa rîakwa.

¹⁰Kagiita gaku baingî bagaataratara wîtîgioni. Antû bagaakunyanagîra bara bangî na bagaatumana moothû.

¹¹Gûkaumîra iroria bia ûrongo biingî bieneerie antû baingî baûre.

¹²Ûthûûku bûkaingîa na wendo bwa antû baingî bûnyiie.

¹³Îndî ûra akaûmîîria mwanka mûthia akoonokua.

¹⁴Ntheto îmbega ya ûnene bwa îgûrû îgaatûmîîrua nthîgûrû yonthe îrî ûkûûyî kîrî mîgongo yonthe, rîru mûthia ungwa ûkinye.”

¹⁵Yiesû auga, “Rîra bûkoona kîra kîthûûku mûno, kîra Ngai athûîre kîrûngi ara atheru (mûthoomi tanataûre), bara ûkeegua barî Njundea ibakuthûke bathi bwa irîma. Gîku i kîo kîra kîroria Ndanieri aaroriirie mantû ma kîo.

¹⁶

¹⁷Ûra akeegua arî rûûgûrû rwa nyomba, eendama atikaagerie kûthara nwa mbi.

¹⁸Ûra akeegua arî mûndaani, atigaakare kûthûkia nguo yake ara agûtûûgîîrîîtie.

¹⁹Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku!

²⁰Îrombaani kagiita gaku bûgaakuthûka gatikeegue karî ga mpîo kana wîgua kûrî ntugû ya *Sabatû,

²¹n'ûntû kînyamaara kîra ûkeegua kîrî oogo, i kîra gîtooneka nthîgûrû îno kaîrî kuuma îkûûmbwa. Na gûtirî kîngî ta kîo gîkooneka gûkû kaîrî.

²²Ûkeegua ti bûra Mwathani akubîîtie ntugû inu, gûtirî muntû oonoka. Na aikubîîtie n'ûntû bwa bara athuurîîte.

²³Kwoogu ûra akaabwîra, ‘N'ûyû Kîrîstû!’ kana ‘N'ûûra!’, bûtikaamwîtîgie.

²⁴N'ûntû Kîrîstû ba ûrongo na iroria bia ûrongo ûkeegua barî ku. Bakaaringaga biama biinene na bakoonanagia magegania kaingo weegua gûkaûmbîka beeneeria kinya bara Ngai athuurîîte.

²⁵Îndî biû îmenyeereeni. Nkûbwîra mantû monthe mbere ya makarîka.

²⁶“Kwoogu bakaaya kûbwîra, ‘Arî rwanda,’ bûtikaathi noogo. Kana babwîra, ‘N'ûyû gûkû nyomba,’ bûtigeetîgîre.

²⁷Ta bûra rweni rwenagia uumîîro bwa riûa rûkamûrîka ûthûîro bwa riûa, i ta bu kûûya kwa Mwana wa Muntû ûkeegua gûkari.

²⁸Ara kiimba kîgagua kîrî noogo nderi ciîthîranaga.”

²⁹Yiesû aathi na mbere auga, “Nthûti îmwe, nyuma ya kînyamaara gîku kînene ûgu, riûa rîkaaruma mwindu na mweri ûtige kûtharara, nthata igwe kuuma îgûrû na mainya ma îgûrû mainainue.

³⁰Rîru i rîo rwano rwa kûûya kwa Mwana wa Muntû rûkooneka îgûrû. Antû ba nthîgûrû yonthe bakaarîra baminûke mûno boona Mwana wa Muntû aayîîte na matu kuuma îgûrû arî na inya na mwago ûmûnene.

³¹Rîra karumbeeta gakaaringwa na kayû kaanene, agaatûma araîka baake bathi nteere cionthe cia nthîgûrû beethîranie bara bathuure nthîgûrû yonthe.”

³²Yiesû auga, “Thûkiani ngerekano ya mûkûyû bwîrutane na uu. Rîra mpong'i cia uu cianakaga mathangû makaanjîîria kûririma ibûmenyaga i thaano îrî akubî.

³³Ûgu i ta bu ûkeegua kûrî rîra bûkoona mantû mamu magîkarîka. Bwona bûmenye Mwana wa Muntû arî akubî mûno kûûya.

³⁴Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru.

³⁵Îgûrû na nthîgûrû bikaathira îndî biugo biakwa bitikooro bithira.”

³⁶Yiesû auga, “Gûtirî muntû aiyî ntugû kana îthaa. Gûtirî mûraîka arî îgûrû aiyî, na wana Mwana atiyî. I Baaba wenka aiyî.

³⁷Bûra gwakarîkire ntugû cia Nuu i ta bu gûgaakarîka ntugû ya kûûya kwa Mwana wa Muntû.

³⁸Ta bûra gwakari ntugû cia mbere, mbere nthîgûrû îkondorua i rûûyî, antû baarîyaga na bakanyua, bakagûrana kana bakagûrîrwa mwanka rîra Nuu aathûngîîre cabinaani.

³⁹Antû bataiyî bûra gûgaakara, mwanka rîra mûguû wayire wabakondoria bonthe. Ntugû îra Mwana wa Muntû akaaya, antû bagaakirimanua ta bûra baakirimaniirue.

⁴⁰Ntugû înu antû arûme baîrî bakeethîîrua mûndaani, ûmwe athûkue ûra ûngî atigwe.

⁴¹Aka baîrî bakeethîîrua bakîthia na iiga rîmwe, ûmwe athûkue ûra ûngî atigwe.

⁴²“Kwoogu îmenyeereeni n'ûntû bûtiiyî i rî Mwathani akaaya.

⁴³Na bûmenye ûkeegua mwene mûciî namenyaga rîra mwamba akaaya nakaria nyomba yake atikaiywe.

⁴⁴Kwoogu, biû karagaani bwîthuuranîrîte n'ûntû Mwana wa Muntû akaaya rîra bûtakûmwîrîgîîra.”

⁴⁵Yiesû aathi na mbere na kwaria. Auga, “N'ûû îîndî mûruti ngûgî mwîtîgua na ûmûûme, ûra mwene mûciî aûmba gûtigîra mûciî rîra atarî ku akarûmia bara bangî irio thaa cia kûrîa ciakinya?

⁴⁶Mwene mûciî aacooka nakumagia mûruti ngûgî ta ûyû eethîra arutîîte ngûgî îra aamwere bwega.

⁴⁷Na mma ga nkûbwîra, mûnene wake amûtuîkithagia mûrûngamîîri wa into biake bionthe.

⁴⁸Îndî ûkeegua arî mûruti ngûgî ûmûthûûku aatigwa akathûgaania ûra amwandîkîîte atiiya rua,

⁴⁹akaanjîîria kûnyamaaria aruti ngûgî bara bangî, akanyua ncoobi na areebi akîrîyanagîra na bo,

⁵⁰mûnene wake akaaya ntugû îmwe ataiyî na thaa ira atamwîrîgîîrîîte.

⁵¹Aaya amûnyamaarie mûno amûgiitîre îgamba ta mwîbwithia, amûgere nja kûra ûkeegua kûrî na kîrîro na kîeba kîînene mûno.”[25]