Read tharaka MATHAYO 25 Bible Online

MATHAYO 25 - tharaka bible

MATHAYO 25

¹Yiesû auga, “Nwa tûbuanaanie ûnene bwa îgûrû na aarî îkûmi bara ûgoro bûmwe baathûkiirie ntandîka ciao baathi kûthagaana mûgûrani.

²Bataano kîrî bo baarî baataku îndî babu bangî bataano baarî baûme.

³Babu bataku bakûthûkia ntandîka ciao bataakamata maguta ma kûgana.

⁴Babu baûme baakama maguta marî ntandîkaani na mangî na cûûba.

⁵Gûgûtuîka mûgûrani agûceererwa ataayîîte, aarî babu bonthe baanoga bagwatwa i toro.

⁶“Ûtugû gatî kanene kwaugîîrua na inya kweerwa, ‘Yîî, n'ûyu mûgûrani aayîîte! Mûthagaaneeni.’

⁷“Aarî babu baumbuthûka torooni, beetithia ntambi.

⁸Bara bataaririkana gûkamata maguta ma kûgana beera babu baarî na mo, ‘Tûkundieni maguta twongeere, ntandîka cietû nikwenda kwora.’

⁹“Bara baarî na mo babeera, ‘Arî! Tûkabûgaûrîra matitûgana na tiû. Îthiini kîrî bara beendagia bûgûre meenu.’

¹⁰“Aarî babu bakûthi kûgûra, mûgûrani aaya baathi wikiini na bara baarî oogo. Bakûthûngîra kûra kîatho kîathuuranîrîtwe, mûrango waingwa.

¹¹Aarî bara baarî bakûthi kûgûra maguta baaya. Beetana, ‘Itû, aba, tûrugûrîre.’

¹²“Mûgûrani abeera, ‘Arî. Na mma ntibwiyî.’ ”

¹³Yiesû aarîîkia na kwîra arutwa baake, “Kwoogu rîonthe karagaani bwîmenyeereete n'ûntû bûtiiyî ntugû kana îthaa rîra Mwana wa Muntû akaaya.”

¹⁴Yiesû eera arutwa baake, “Na kaîrî nwa tûbuanaanie ûnene bwa îgûrû na muntû ûmwe aathiîte rûgendo. Mbere ya athi eeta aruti ngûgî baake abeera bamûmenyeere into.

¹⁵Abanenkera mbia beetaga taranta.[26] Ûmwe amûnenkera taranta itaano, ûyu ûngî ciîrî, na ûyu ûngî îmwe kûringana na bûra aiyî muntû narutaga ngûgî bûgana. Rîru aathi.

¹⁶Ûra aanenkeretwe taranta itaano ataata thaa. Aathiire aaringa biacaara na cio oona baita ya cingî itaano ta cio.

¹⁷Ûra eetwe ciîrî wana we aathiire aaringa biacaara na ciake oona baita ya cingî ciîrî.

¹⁸Îndî ûra eetwe îmwe, we aathiire eenja karinya bantû nthîgûrû aathika ku.

¹⁹“Nyuma ya îgiita rîîraaya, mwene mûciî aacooka. Eera aruti ngûgî babu baake bamwîre bûra baarûthire na mbia ira aabatigîrîte.

²⁰Ûra eetwe taranta itaano, amûreetera cingî itaano. Amwîra, ‘Niû, mûnene, wanenkeere itaano ndathi ndabaitania ciakinya îkûmi. Îka, mûnene.’

²¹“Mûnene wake amwîra, ‘I bwega mûno, mûrutî ngûgî mwîtîgua! N'ûntû ûgûtuîka mwîtîgua na biikai, ngakwaa biingî. Ncû ûkeneere na woû ngîkeneera.’

²²“Ûra n'we eetwe taranta ciîrî aaya. Amwîra, ‘Niû, mûnene, wampeere ciîrî ndathi ndabaitania ciakinya inya. Îka, mûnene.’

²³“Mûnene wake amwîra, ‘I bwega mûno, mûruti ngûgî mwîtîgua! N'ûntû ûgûtuîka mwîtîgua na biikai, ngakwaa biingî. Ncû ûkeneere na woû ngîkenera.’

²⁴“Ûra eetwe îmwe aaya. Amwîra, ‘Niû, mûnene, n'ûntû mbiyî ûrî muntû ûmûûmo na ûkethaga ara ûtaanda na ûgaakûra kîra ûtaanîka,

²⁵indakuthûkire. Ndathiire ndeenja karinya ndaitha mbia ciaku ku. Ene n'ino wabûra, ka.’

²⁶“Mûnene amwîra, ‘Woû ûrî mûruti ngûgî ûmûthûûku na ûrî kîthao! Aabu wana ûkeegua nwiyî nkethaga ara ntaanda na ngaakûra kîra ntaanîka

²⁷rî, ûtikîmbaigîra cio mbanki ndaaya nkathûkia mbia ciakwa irî na baita?’

²⁸“Mûnene auga atunywe taranta înu aamwete înenkerwe ûra ooneete baita ya taranta itaano. Auga,

²⁹‘Gîtûmi i kwîgua ûra arî na gîntû nkamwongeera kiingîe nkûrûki ya kîthimi. Îndî ûra gûtarî kîo arî na kîo, wana gîîkai kîra arî na kîo inkaamûtunya

³⁰na mmwingîre ome mwinduuni kûra ûkeegua kûrî na kîrîro na kîeba kîînene mûno.’ ”[27]

³¹Yiesû eera arutwa baake, “Rîra Mwana wa Muntû akaaya arî na mwago wake wa ûnene na arî na araîka bonthe, akaaya akare nthî gîtîîni gîake kîa ûnene.

³²Antû bonthe beethîrane mbere yake abaathûrane ta muntû akwathûrana ng'ondu na mbûri.

³³Akaathûra ng'ondu bwa ûrîo na mbûri bwa ûmotho.

³⁴“Rîru eere bara ûkeegua barî bwa ûrîo, ‘Ncûûni, biû Baaba athaarimîîte bûthûkie ûnene bûra aabûthuuranîîre bûrî rûgai rwenu kuuma wo nthîgûrû îkûûmbwa.

³⁵Ndarî na yûûra bwangaagûra. Ndarî na bûûta bwankundia rûûyî. Ndarî mûgeni bwangwata ûgeni.

³⁶Ndathirîîtie nguo bwampa imbega. Ndaayiirue bwaya kûndaitha. Ndathaîkîîtwe nceera bwaya kûmbona.’

³⁷“Babu baagîru bamûûrie, ‘Mwathani, i rî warî na yûûra twakûgaagûra na i rî warî na bûûta twagûkundia rûûyî?

³⁸I rî warî mûgeni twakûgwata ûgeni na i rî wathirîîtie nguo twakwaa imbega?

³⁹I rî wayîîtue twaya gûkûraitha na i rî wathaîkîîtwe nceera twaya gûkwona?’

⁴⁰“Mûnene akaabeera, ‘Na mma ga nkûbwîra, ûntû bunthe bwarûthîra wakîra ûmwe wa antû baakwa bara beegagua bakîenda ûteethio i ta niû bwarûthagîra.’

⁴¹“Rîru mûnene acooke eere bara na bo ûkeegua barî bwa ûmotho, ‘Biû bûrî baarume! Umaani aaga ndî bûthi mwankiini ûra ûtooraga rî kana rî, ûra Nkoma na araîka baake bathuuranîrîtwe.

⁴²Ndarî na yûûra na bûtangaagûra. Ndarî na bûûta na bûtankundia rûûyî.

⁴³Ndarî mûgeni na bûtangwata ûgeni. Ndathirîîtie nguo na bûtampa imbega. Ndaayiirue na bûtaaya kûndaitha na ndathaîkîîtwe nceera na bûtaaya kûmbona.’

⁴⁴“Bamûûrie, ‘Mwathani, i rî warî na yûûra, kana bûûta? I rî warî mûgeni, na i rî wathirîîtie nguo îndî twarega gûgûteethia? I rî wayîîtue, na i rî wathaîkîîtwe nceera îndî tûtaaya gûkwona?’

⁴⁵“Mûnene akaabacookeria abeere, ‘Na mma ga nkûbwîra, rîra bwaregaga gûteethia antû baakwa nwa bara baniini na bakîendaga ûteethio i ta niû bwaregaga gûteethia.’

⁴⁶“Bakaathi îkaanûkiani rîtakîthira rî kana rî, îndî bara baagîru bakaathi mwoyooni wa tene na tene.”