Read tharaka MATHAYO 26 Bible Online

MATHAYO 26 - tharaka bible

MATHAYO 26

¹Yiesû akûthiria kweyana ngerekano inu cionthe eera arutwa baake,

²“Ibwiyî kîatho gîa *Pasaka i gîa aûke. I rîo Mwana wa Muntû akaanenkanîrwa akambwe mûtharabaani.”

³*Athînjîri bara banene ba Ngai na akûrû beethîrana amwe nyomba ya Kayabas ûra aarî mûthînjîri ûra mûnene wa Ngai.

⁴Baanjîîria gûcûa bûra Yiesû akîgwatwa na ûûme bakamûûragithia.

⁵Îndî baugîîte batimûgwata ntugû ya kîatho n'ûntû boonaga bamûgwata antû ibagaûkia gîtuma.

⁶Ntugû îmwe Yiesû naarî Bethania gwa Simioni ûra aayîîtue mûtigiri.

⁷Mûka ûmwe aaya na cûûba yarûthîîtwe na iiga rîa goro yûyûri mîtaa ya goro mûno. Yiesû aakîrîyaga, mûka ûyu oonoreeria mîtaa înu kîongo gîake.

⁸Arutwa ba Yiesû bakwona ûgu baathûûra. Baanjîîria kûûrania, “I kî n'ûntû îîndî mwekûrû ûyu akwînyangia maguta mama ûûgû?

⁹Îîndî makîendiirue matikiuma mbia inyingî ikagaîrwa nkîa!”

¹⁰Yiesû akwîgua ûgu abeera, “I mbi bûkûmûûria? Akûndûtha ûntû bwega.

¹¹Gûtirî rîo nkîa ikaathira, îndî niû îgiita irîengeerie gûkinya tûtigane.

¹²Rîra antûûrîria mîtaa mwîrî akuuthuuranîra kûthikwa.

¹³Na mma ga nkûbwîra, bantû onthe ara ntheto îmbega îgaatûmîîrua gûkû nthîgûrû, ûûgû mûka ûyû aarûtha bûkeeranagwa n'ûntû bwa kûmûririkana.”

¹⁴Ûmwe wa arutwa bara ba Yiesû îkûmi na baîrî ûra eetagwa Njundas Mûcikariota, aathi kîrî *athînjîri bara banene ba Ngai.

¹⁵Abaûria, “I mbi bûgampa ndamûkunyanîra?” Baatara fetha mîrongo îthatû bamwaa.

¹⁶Bakûgwatanîra, Njundas aanjîîria gûcûa kaanya keega ga gûkunyanîra Yiesû.

¹⁷Ntugû ya mbere ya *kîatho kîa mîgaate îtaimbithîîtue, arutwa baathi kîrî Yiesû bamûûria, “I na kû ûkwenda tûthi gûkûthuuranîra biakûrîa bia *Pasaka?”

¹⁸Yiesû abatûma abeera bathi Njerusaremu kwa muntû ûmwe bamwîre, “Mwarimû auga îgiita rîake rîrî akubî gûkinya na akaarîîra biakûrîa bia Pasaka amwe na arutwa baake gwaku.”

¹⁹Kwoogu arutwa baathi baarûtha wabûra Yiesû aabeerîîte, baathuuranîra Pasaka.

²⁰Ûgoro bûgûkinya Yiesû na arutwa baake baakara nthî kûrîa.

²¹Yiesû abeera, “Na mma ga nkûbwîra, ûmwe kîrî biû agankunyanîra.”

²²Arutwa bakwîgua ûgu baagwatwa i kîeba. Baanjîîria kûmûûria ûmwe kwa ûmwe, “I niû, Mwathani?”

²³Yiesû abacookeria abeera, “N'ûmwe kîrî biû na itwîkanîîrie njara n'we mbakûriini.

²⁴Mwana wa Muntû agaakua wata bûra kwandîkîîtwe *Maandîkooni Maatheru. Îndî ûra akaamûkunyanîra, gîku na ti kînyamaara akoona. I kaaba atagîciarirwe!”

²⁵Njundas ûra aamûkunyanîîre amûûria, “Kana i niû, Mwathani?” Yiesû amwîra, “Ûkuuga.”

²⁶Wabakîrîyaga, Yiesû aathûkia mûgaate aacookeria Ngai nkaatho. Na nyuma ya gûcookeria Ngai nkaatho, aung'enyûrania aunenkera arutwa baake. Abeera, “Thûkiani mûgaate ûyû bûrîe n'ûntû ûyû i mwîrî wakwa.”

²⁷Nyuma ya ûgu aacooka aathûkia gîkombe. Aacookeria Ngai nkaatho, aanenkera kîo arutwa baake. Abeera, “Îkundanaani.

²⁸Îno i nthakame yakwa îra îgeetûûrwa îrî rwano rwa kîrîîkanîro kîîyerû n'ûntû bwa antû baingî kûrekerwa meeyia maao.

²⁹Na ga nkûbwîra, ntiinyua ndibei îno kaîrî, tatiga îra tûkaanyua naabi ûneneeni bwa Baaba.”

³⁰Nyuma ya ûgu baina rwîmbo, baathi baatwa Karîmaani ka Mîceituuni.

³¹Yiesû abeera, “Ûtugû bûbû bwa îmunthî, biû bwinthe bûkaathi bûntige ninka n'ûntû kwandîkîîtwe *Maandîkooni Maatheru, ‘Nkaaringa mûrîîthi mmûûrage, ng'ondu inyagaaranie.’

³²Îndî ndariûka nkaathi Gariiri mbere yenu.”

³³Petûrû amwîra, “Wana weegua baba bangî bonthe bagagûtiga bathi, niû ntiithi ngûtiga.”

³⁴Yiesû eera Petûrû, “Na mma ga ngûkwîra, ûtugû bûbû bwa îmunthî mbere ya ngûkû îkurura, ûgaankaana maita mathatû.”

³⁵Îndî Petûrû aaremeeria na kûmwîra, “Wana weegua igûgaatuîka mbûragwe ûkîûragwa, ntigûkaana.” Arutwa bara bangî wana bo bonthe bauga wata Petûrû woogu.

³⁶Bagûkinya bantû eetagwa Ngethisemane, Yiesû eera arutwa baake, “Karaani nthî aaga nthi nkarombe.”

³⁷Yiesû aathûkia Petûrû na aana bara baîrî ba Cabendi aathi na bo. Yiesû aagwatwa i kîeba na kîîthikîîro.

³⁸Abeera, “Inkwîgua ndî na kîeba mûno nkorooni yakwa akubî kinya kîmbûraga. Karagaani aaga na bûtikaamaame.”

³⁹Aathiyanga gataaria, eeturania nthî, aaromba atiirithîîtie ûthiû nthî. Auga, “Baaba, weegua bwaûmbîka ruta gîkombe gîkî gîa kûnyamaarua mbere yakwa. Îndî rûtha bûra ûkwenda ti bûra nkwenda.”

⁴⁰Yiesû aûkîîra aacooka kîrî arutwa baake eethîra ibamaamire. Eeta Petûrû, “Petûrû!” Amwîra, “Bûtiraûmba gûkara bûtamaami nwa îthaa rîmwe nkîromba?”

⁴¹Abeera, “Bûtikaamaame karagaani bûkîrombaga bwewa inya ya gûcinda magerio. Nkoro nîkwenda i mwîrî ûkûremwa.”

⁴²Yiesû aacooka kûromba kaîrî auga, “Baaba, weegua gûtiûmbîka ndutarutîrwa gîkombe gîkî mbere yakwa na nwa mwanka nkînyue, kwenda gwaku ikûrûthîke.”

⁴³Agûcooka kaîrî kîrî arutwa bara eethîra bamaamire kaîrî n'ûntû ibaang'ontaga mûno.

⁴⁴Kwoogu abatiga, aacooka kûromba kaîrî rîa mathatû akiugaga mîgambo weera.

⁴⁵Akûthiria aacooka kîrî arutwa bara abaûria, “Î wana îîndî nwaka bûmaami bûnogokeete? Raithaani bwone. Îgiita rîgûkinya rîa Mwana wa Muntû kûnenkanîrwa kîrî antû ba meeyia.

⁴⁶Ûkîîraani tûthi. Eneeni, ûra aankunyanîrîte n'ûyu aayîîte!”

⁴⁷Yiesû akîaragia woogu, Njundas ûra aarî ûmwe wa arutwa bara baake îkûmi na baîrî aaya na mûkondo wa antû baakamatîîte ndûyiû na ncûgûma, batûmîîtwe *n'athînjîri bara banene ba Ngai na akûrû.

⁴⁸Njundas naarî akûbaathîîra bûra agaakunyanîra Yiesû. Aabeerîîte ûra bakoona aacunca bamenye n'we Yiesû, bamûgwate.

⁴⁹Njundas agûkinya ûgu, aathi kîrî Yiesû amwîra, “Mwarimû, muuga!” Amûcunca.

⁵⁰Yiesû amwîra, “Mûcoore, rûtha bûra bûgûkûreeteete.” Warîru antû babu baathi baagwata Yiesû.

⁵¹Mûrutwa ûmwe wa Yiesû aatambûrûkia njara, aacomoora rûyiû aatema mûruti ngûgî ûmwe wa mûthînjîri ûra mûnene wa Ngai, amûgiita gûtû.

⁵²Yiesû amwîra, “Cookia rûyiû rwaku ara rûkaraga. Aûragani na rûyiû bonthe baûragagwa na rûyiû wana bo.

⁵³Nûkûthûgaania nkîendire ntigîîta Baaba ûra arî îgûrû nkamwîra aandeetere njûûrî nkûrûki ya îkûmi na ciîrî cia araîka na akandeetera?

⁵⁴Îndî na rîo n'ata *Maandîko Maatheru makaûyûranga mara maugîîte nwa mwanka mantû mamu makarîke woogu?”

⁵⁵Îgiitaani warîru Yiesû aûria kîrîndî, “Ka ndî mûtunyani n'ûntû bwaya kûngwata na ndûyiû na ncûgûma? Anga ntugû cionthe tûtiratindaga naabi nyomba ya Ngai nkîrutanaga na bûtirangwataga?

⁵⁶Îndî gûtirî ûntû n'ûntû gwakarîka ûgu kaingo Maandîko mara maandîkîîtwe n'iroria maûyûra.” Arutwa baake bonthe bamûtoorooka, baugia rwîro.

⁵⁷Bara baagwatire Yiesû baamwira gwa Kayabas, ûra aarî mûthînjîri ûra mûnene wa Ngai, kûra aarimû ba watho na akûrû beethîreene.

⁵⁸Petûrû amûthingata arî gataaria mwanka baakinya. Aathûngîra aakara nthî amwe na aruti ngûgî eeteera oona bûra gûgaakara.

⁵⁹Athînjîri bara banene ba Ngai na kîama kîra kîarî oogo baacûa antû bagûtuîrîîra Yiesû kaingo aûragwa.

⁶⁰Antû baingî baatuîrîîra Yiesû, îndî kîama gîtoona gîtûmi kîa Yiesû kûûragwa. Mûthiani antû baîrî baarûngama

⁶¹bauga beeguire Yiesû akiuga nwa oomboranie nyomba ya Ngai akamîaka kaîrî na ntugû ithatû.

⁶²Bakuuga ûgu mûthînjîri ûra mûnene aarûngama. Aûria Yiesû, “N'ata ûkuuga ûrî woû? Gûtirî bu ûkuuga îgûrû rîa mantû mama antû baba bakuuga nûrûthîîte?”

⁶³Yiesû ataaria. Mûthînjîri ûyu auga, “Tathiîtia na Ngai ûra arî mwoyo ûtwîre weegua i woû Kîrîstû, Mwana wa Ngai.”

⁶⁴Yiesû amwîra, “Ûkuuga. Na ga nkûbwîra bûkoona Mwana wa Muntû akari rûteere rwa ûrîo rwa ûra arî inya. Na bûkoona aayîîte na matu kuuma îgûrû!”

⁶⁵Yiesû akuuga ûgu, mûthînjîri ûra mûnene aatembûra nguo yake wengwa ira eekîrîte,[28] auga, “Akûruma Ngai! N'ûgu îîndî, tûtikwenda ûkûûyî bûngî. Wana biû bûkwîgua.

⁶⁶Mbîîraani îîndî bûra bûgûtua.” Bonthe baatua bauga, “Naûragwe.”

⁶⁷Antû bamwe ba kîama baanjîîria gûtuîra Yiesû mata ûthiû bakîmûringangaga. Bamwe kîrî bo bamûringanga makoobi

⁶⁸bakîmwîraga, “Kîrîstû, taroria ûtwîre ûra akûringa!”

⁶⁹Petûrû akari ome kîaragooni, mwarî ûmwe mûruti ngûgî wa mûthînjîri ûyu amwona. Aathi akubî n'we auga, “Wana woû ibûkûrî na Yiesû ûra wa kuuma Gariiri.”

⁷⁰Îndî Petûrû aakaana mbere ya bonthe bara baarî agu. Auga, “Wana ntikûmenya bûra ûkuuga.”

⁷¹Petûrû aûkîîra aathi mwîrîgaani wa kîarago, eethîra antû bangî oogo. Mwarî ûngî tatiga ûyu wa mbere amwona. Eera bara baarûngi agu, “Muntû ûyû ibakûrî na Yiesû wa Nasareethi.”

⁷²Petûrû aakaana kaîrî. Aathiîtia auga, “Niû ntiyî muntû ûyû.”

⁷³Nyuma ya kagiita gatarî karaaya, antû bara baarûngi amwe n'we wana bo baanjîîria kûmwîra, “N'ûmma ûrî ûmwe wao n'ûntû wana rwaria rwaku runka irûkuuga.”

⁷⁴Petûrû eerîrîka wengwa, aathiîtia auga, “Ntiyî muntû ûyû!” Warîru ngûkû yakurura.

⁷⁵Rîru i rîo Petûrû aaririkanire bûra Yiesû aamwîrîîte atî, “Mbere ya ngûkû îkurura, ûgankaana maita mathatû ûkiugaga ûtimbiyî.” Petûrû auma nja aarîra na kîeba mûno.