Read tharaka MATHAYO 27 Bible Online

MATHAYO 27 - tharaka bible

MATHAYO 27

¹Gûgûkea rûûni rûûkîîrî, *athînjîri bara banene ba Ngai bonthe na akûrû bonthe baakomana baabanga bûra bakaûragangithia Yiesû.

²Bamûthaîka njara baathi n'we bamwirîra Piraatû ûra aarî ngabana.

³Njundas ûra aakunyanîîre Yiesû akwona Yiesû aatuîrwa kûûragwa aanjîîria kwîrira nkorooni. Aacookeria *athînjîri bara banene ba Ngai na akûrû bara fetha ira mîrongo îthatû baamwete.

⁴Abeera, “Imbîyîîtie ntûmîîte nthakame îtarî na ûthûûku îîtûûrwa.” Bamwîra, “Aabu? Ga tûkûmaka n'ûgu tiû? Înu i thîîna yaku.”

⁵Njundas aatiga aagera fetha inu nthîgûrû gûku baarî nyomba ya Ngai, aathi eecuuria.

⁶Athînjîri bara banene ba Ngai booya fetha inu. Bauga, “N'ûntû nikûgwetanîrua na kûûragwa kwa muntû, tûtiîtîgîîrîîtue tûciaiga kîgîînaani kîa nyomba ya Ngai.”

⁷Baagwatanîra bagûre na cio kîthaka gîetagwa ‘Kîthaka kîa mûûmbi wa nyûngû’ gîa kûthikaga ageni bara baakuyagîra Njerusaremu.

⁸Na i ntûma wana îmunthî tûrî mûnda ûyu wîtagwa ‘Kîthaka kîa nthakame.’

⁹Na wabu ûroria bûra kîroria Njeremia aaroriirie bwaûyûra, rîra aaroriirie auga, “Na baathûkia fetha ira mîrongo îthatû, ûgûri bûra bamwe ba Aisiraeri baagwatanîîre bamûrîe,

¹⁰baagûra na cio kîthaka gîetagwa ‘Kîthaka kîa mûûmbi wa nyûngû,’ wabûra Mwathani aambîîrîîte.”

¹¹Bakîrûtha ûgu, Yiesû naarûngi mbere ya ngabana wa Arooma, ngabana akîmûûragia, “I woû Mûnene wa Ayaundi?” Yiesû amwîra, “Nwa ta ûgu wauga.”

¹²*Athînjîri ba Ngai bara banene na akûrû bamûtuîrîîra, îndî Yiesû ataaria.

¹³Piraatû amûûria, “Anga nûkwîgua mantû mama monthe bakuuga nûrûthîîte?”

¹⁴Îndî wana rîo gûtirî bu Yiesû auga eetheteera kîrî ûntû nwa bûmwe bwa mara eeragwa narûthîîte. Ûntû bûbu bwarigaria Piraatû mûno.

¹⁵Rîonthe kagiita ga kîatho gîa *Pasaka gaakinya, ngabana neetîgîîrîîtie kûthaûraga mûgwate ûmwe woora antû bakeenda.

¹⁶Kagiitaani gaku ikwarî na mûgwate ûmwe eetagwa Baraba. Baraba naiyîkeene mûno n'ûntû bwa moothûûku mara aarûthîîte.

¹⁷Kwoogu antû baathi kîrî Piraatû. Piraatû abaûria, “N'ûû bûkwenda mbuga arekeerua? I Baraba kana i Yiesû ûyû agwîtwa Kîrîstû?”

¹⁸Aûriirie ûgu n'ûntû naarî akûmenya bwega *athînjîri bara banene ba Ngai na akûrû baathitangîîte Yiesû kîrî we n'ûntû bwa kûmwîgua rûriitho.

¹⁹Na kaîrî akari waagu aakari ara aagiitagîra magamba, mwekûrû wake naatûmanîîte amwîra, “Menya ûûria muntû ûyu. I muntû ûmwagîru n'ûntû ûtugû indararootire kîrooto kîîthûûku n'ûntû bwake.”

²⁰Îndî amwe na ûgu *athînjîri bara banene ba Ngai na akûrû beera antû bauge i Baraba bakwenda na Yiesû naûragwe.

²¹Ngabana aûria antû kaîrî, “N'ûû kîrî bo barî baîrî bûkwenda arekeerua?” Bamwîra, “I Baraba!”

²²Piraatû abaûria, “Aabu n'ata bûkwenda ndûtha na Yiesû ûyû agwîtwa Kîrîstû?” Bonthe bauganîîria rîmwe bamwîra, “Nambwe!”

²³Piraatû abaûria, “I kî? I mabîtia marîkû arûthîîte?” Îndî amwe noogu kîrîndî kîathi na mbere kûyoga nkûrûki gîkîmwîraga, “Nambwe!”

²⁴Piraatû akwona mantû makûrema na antû ibeendaga kûreeta thîîna, aathûkia rûûyî aathamba njara mbere yao bonthe bakîonaga. Auga, “Niû ntirî na meeyia îgûrû rîa gîkuû kîa muntû ûyû. N'îgûrû rîenu!”

²⁵Kîrîndî kîonthe kîamwîra, “Yîî, nthakame yake îrootûcookera na nciarwa cietû mbene!”

²⁶I rîo Piraatû eetîgîîrie auga Baraba arekue na Yiesû aringwe ibooko. Rîru amûnenkanîra athi kwambwa.

²⁷Acikaarî ba Piraatû baathûkia Yiesû bamûkûrûkia nyomba ya kûgambîrwa gûku kambîîni ya Ngabana îra yeetagwa Puritoria. Beethîrania mbûûtû ya acikaarî bara bangî bonthe.

²⁸Bamûruta nguo ciake bamwîkîra nguo îndaaya întuune.

²⁹Baatumania matî ma mîîgua maakara ta nthûmbî ya ûnene bamwîkîra mo kîongo, bamûgwatithia kamûraagi na njara ya ûrîo ta mûnene. Rîru baatua kûmûturîria maru bakamûnyûrûnta bakîmwîraga, “N'ata îîndî, Mûnene wa Ayaundi?”

³⁰Bamûtuîra mata, baathûkia kamûraagi gaku bamûkûng'anga na ko kîongo.

³¹Bakûrîîkia kûmûnyûrûnta ûgu, bamûruta nguo înu, bamwîkîra nguo ciake kaîrî. Rîru baathi kûmwamba.

³²Acikaarî babu barî njîraani bathiîte kwamba Yiesû, boona muntû eetagwa Simioni wa kuuma gûntû gweetagwa Kureni. Bamûkamatithia na taka mûtharaba ûra Yiesû aakamatîîte.

³³Bagûkinya bantû eetagwa Gorogotha, tûgîtaûra i ta kuuga, ‘Kîîndî gîa kîongo,’

³⁴baakundia Yiesû ndibei yarî na gana. Îndî Yiesû aarega kûmînyua.

³⁵Bakûmwamba mûtharabaani baacooka baaringîra nguo ciake kuura bathi na cio.

³⁶Rîru baakara nthî bamûkaria.

³⁷Îgûrû ya kîongo gîake ibaaringaringîrîte kabaaû mûtharabaani ga kwonania kîra gîatûmîîte Yiesû aambwa. Baandîkîîte, “ ÛYÛ I YIESÛ, MÛNENE WA AYAUNDI.”

³⁸Ikwarî na atunyani baîrî wana bo baambîîtwe agu akubî na ara Yiesû aambîîtwe. Ûmwe aarî rûteere rwa ûrîo na ûra ûngî rûteere rwa ûmotho.

³⁹Bara baakûrûkagîîra agu Yiesû aambîîtwe, bamwona aambîîtwe bakamûgiitithia irumi na bakainainia biongo

⁴⁰bakiugaga, “Anga ingî kaayia ti woû ûraugaga ûkomborania nyomba ya Ngai na ûmîake kaîrî yûyûre na ntugû ithatû! Weegua ûrî Mwana wa Ngai teebambûre agu ûrî!”

⁴¹Wana *athînjîri bara banene ba Ngai, aarimû ba watho na akûrû baamûnyûrûntaga bakauga,

⁴²“Naroonokagia bara bangî îndî we atikûûmba kwîbonokia na ingî kaayia i Mûnene wa Isiraeri. Taneebambûre agu aambîîtwe, tûmwîtîgie!

⁴³Na n'ûntû eetîgîîtie Ngai, Ngai ûyu îîndî tanamûteethie weegua nakwenda, twone, n'ûntû ingî araugaga we i Mwana wa Ngai.”

⁴⁴Na kinya atunyani babu baambanîrîtue na Yiesû nwa bu baamûkûthagîîria irumi.

⁴⁵Kwanjîîria mûthenya gatî mwanka thaa kenda, mwindu waruma nthîgûrû yonthe.

⁴⁶Na ta thaa inu kenda, Yiesû aagondoka na inya mûno. Auga, “Eli, Eli, lama cabakithani?” Tûgîtaûra, ûgu i ta kuuga, “Ngai wakwa, Ngai wakwa, i kî n'ûntû wantiganîria?”

⁴⁷Antû bamwe ba bara baarî oogo bakwîgua Yiesû akiuga ûgu bauga, “Muntû ûyû i kîroria Eriya agwîta!”

⁴⁸Muntû ûmwe augia rwîro aathi aathûkia cibonji amîtombeka ndibeini yarî na gana, rîru amîogeera mûthiani wa kamûtî, amîtiirithia mîromo ya Yiesû amûkundia.

⁴⁹Îndî bara bangî bamwîra, “Tiga. Ga twone ingî kana weegua Eriya akaaya amwonokie.”

⁵⁰Yiesû aagondoka na inya mûno kaîrî agîîkaîra, aanyaarûka.

⁵¹Na warîru warîru, gîtambaa kîra kîagaanîîtie nyomba ya Ngai[29] gîatembûkana maita maîrî kîganeene, kuuma îgûrû mwanka nthî. Nthîgûrû yainaina, ndwara cia maiga ciatûkanga.

⁵²Nthiko ciarugûka mîîrî ya atheru bara baarî bagûkua yariûka.

⁵³Na rîra Yiesû aarîûkire atheru babu bauma nthikooni baathi bwa taûni îra ntheru ya Njerusaremu antû baingî baboona.

⁵⁴Mûtongoria wa njûûrî ya acikaarî na bara baarî n'we agu bakarîîtie Yiesû, bakwona nthîgûrû yainaina na bûra gwakarîkire baagwatwa i kîmako kîînene mûno. Bauga, “Na mma muntû ûyû araarî Mwana wa Ngai.”

⁵⁵Ikwarî na eekûrû baingî mma baacûûbîîrîîtie barî gataaria. Eekûrû babu baathingatîîte Yiesû kuuma Gariiri bakîmûmenyagîîra.

⁵⁶Bamwe baao baarî Maria Mûmagindari, Maria gina wa Njakubu na Njosebu, na mwekûrû wa Cabendi.

⁵⁷Ûgoro mbere riûa rîthwa, muntû ûmwe eetagwa Njosebu wa kuuma ntûûra ya Arimathea aaya. Njosebu aarî gîtonga na aarî ûmwe wa arutwa ba Yiesû. Akûûya,

⁵⁸aathi kîrî Piraatû amwîra amwîtîgîîrie athûkie mwîrî wa Yiesû akauthike. Piraatû eetîgîîria auga anenkerwe.

⁵⁹Njosebu aambûra mwîrî wa Yiesû, acuoga na cuka,

⁶⁰aukamata authûngîria nthikooni yake eenjîîte bantû rwaraani rwa iiga. Rîru aingiritia iiga rîînene mûno aakunîkîra na rîo mûromo wa nthiko, aathi.

⁶¹Rîru aarûthaga ûgu, Maria Mûmagindari barî na Maria ûra ûngî baamûcûûbîîrîîtie barî mbarî îra îngî ya nthiko.

⁶²Rûûni ntugû ya *Sabatû, *athînjîri bara banene ba Ngai na *Abarisai baathi

⁶³beera Piraatû, “Ngabana, n'ûntû rîra mûûrongo ûra araarî mwoyo araugaga akaariûka ntugû ya ithatû,

⁶⁴uga nthiko yake îkarue bwega mwanka ntugû ithatû ithire bûra arutwa baake bataûmba kûthi baiya mwîrî wake, rîru beera antû narariûkire. Gûgakarîka ûgu ûrongo bûbu bwa mûthia i bu bûnenea nkûrûki ya bûra bwa mbere.”

⁶⁵Piraatû abeera, “Thûkiani acikaarî bathi bakarie nthiko yake bwega mûno bûra kûûmbîka.”

⁶⁶Bakûthi baarûmîîria mûûra rûteere rwa iiga rîra rîakunîkîrîte nthiko bûra rîtategategua barega kûmenya.[30] Baatiga acikaarî ba kûmîkaria.