Read tharaka MATHAYO 3 Bible Online

MATHAYO 3 - tharaka bible

MATHAYO 3

¹Îgiitaani rîru Njoana Mûbaatithania aathi rwanda rwa Njundea gûtûmîîria.

²Augaga, “Îrireeni meeyia meenu n'ûntû ûnene bwa îgûrû bûkûthengeera.”

³Njoana ûyû n'ûra kîroria Isaaya aaragîîria rîra augaga, “Kayû ka muntû igagûtûmîîria rwanda gakiugaga, ‘Theriani njîra ya Mwathani, rûngariani kûra agaakûrûkîîra.’ ”

⁴Njoana eekagîra nguo yarûthîîtwe na guaya ya nkamîîra akooga mûkanda kauna. Aarîyaga ngige na ûkî bwa kîthaka.

⁵Kîrîndî kingî kîaumaga bwa taûni ya Njerusaremu, nthîgûrû ya Njundea yonthe, na akubî na îkumbo rîa muuro wa Njorondani gîkaaya kûmûthikîîria.

⁶Bara baumbûraga meeyia maao, Njoana aababaatithagîria rûûyîîni rwa muuro wa Njorondani.

⁷Njoana akwona *Abarisai na *Asandukai baingî baayîîte ababaatithia, abeera, “Rûciaro rûrû rwa njoka! N'ûû aabweniirie abwîra bwakuthûka mûthûûro wa Ngai ûra ûûyîîte?

⁸Rûthagaani mantû mara makoonanagia atî na mma bûkwîrira meeyia meenu.

⁹Bûtikaathûgaanie bûgaateethua i kuuga, ‘Tiû tûrî ba rûrîîyo rwa Îburaîmu!’ Na mma ga nkûbwîra, Ngai nwa atuîkithie kinya maiga mama aana ba Îburaîmu.

¹⁰Kathoka karî akubî gûkûûra mîtî na mîri mîene. Na mûtî unthe ûra ûtaciaraga rûciaro rwega ûgaakûûrwa ûgerwe mwankiini.

¹¹Niû ndîbûbaatithia na rûûyî kwonania bûkwîrira meeyia meenu. Îndî ûra aayîîte nyuma yakwa arî îgweta nkûrûki yakwa. Niû ningwa ntiagîrîte wa kûmûkamatîra iraatû. We akaabûbaatithia na Kîrundu Ûmûtheru na mwanki.

¹²Agwete ncûûgi na njara akîendaga kûthi rwaraani acûûga ngano ciake aiga îkûmbîîni, abîîthia maûngû na mwanki ûtakîora.”

¹³Îgiitaani warîru Yiesû auma bwa rûteere rwa Gariiri aathi bwa muuro wa Njorondani abaatithua i Njoana.

¹⁴Îndî Njoana eenda kûrega akîmwîraga, “Ka ûûyîîte nkûbaatithia? Woû, i woû ûbatîîrue ûmbaatithia îndî ti niû!”

¹⁵Yiesû amûcookeria amwîra, “Gagûkare ûgu îîndî kaingo tûrûtha bûra kwagîrîte.” Rîru i rîo Njoana eetîgîîrie.

¹⁶Yiesû akûrîîkia kûbaatithua aumîra rûûyîîni. Warîru îgûrû rîarugûka, oona Kîrundu wa Ngai amwîndamîîrîîte ta îcea aagwîrîîra îgûrû rîake.

¹⁷Kayû kauma îgûrû kauga, “Ûyû i Mwana wakwa ûra mbendeete mûno. Nankenagia mûno.”