Read tharaka MATHAYO 5 Bible Online

MATHAYO 5 - tharaka bible

MATHAYO 5

¹Yiesû akûraitha oona bûra kîrîndî kîagana, aatwa karîmaani aakara nthîgûrû. Arutwa baake bamwîthîranîra.

²Yiesû abarutana mantû mama,

³“Kîthaarimo i kîrî bara beebonaga bo ti gîntû kîrî Ngai, ûnene bwa îgûrû i bwao.

⁴Kîthaarimo i kîrî bara barî na kîîthikîîro nkorooni, Ngai akabaûmîîria.

⁵Kîthaarimo i kîrî bara babooreeru, bakeewa nthîgûrû îtuîke yao.

⁶Kîthaarimo i kîrî bara barî na yûûra na bûûta ya kûrûtha bûra kwagîrîte, bakaabaa.

⁷Kîthaarimo i kîrî bara barî kîao, Ngai akabeegua kîao.

⁸Kîthaarimo i kîrî bara batheru nkoro, bakoona Ngai na meetho.

⁹Kîthaarimo i kîrî bara bareetaga ûkiri, bageetwa aana ba Ngai.

¹⁰Kîthaarimo i kîrî bara bathîînagua n'ûntû bwa kûrûngama ûmmaani, ûnene bwa îgûrû i bwao.

¹¹“Kîthaarimo i kîrî biû rîra antû babûruma, rîra babûnyamaaria, kana babûtuîrîîra mantû maingî maathûûku n'ûntû bwa bûra bûrî baakwa.

¹²Rîra bakûbûrûtha ûgu, kenaani. Gwîruani mûno n'ûntû kîewa kîenu îgûrû i kîînene. Ûgu i ta bu baanyamaariirie bara baarî iroria mbere yenu.”

¹³Yiesû auga, “Kîrî antû biû bûrî mwonyo. Îndî mwonyo ûkathira mûcamo ûtiîkîrîka uu kaîrî. Ûkarire ûgu ûtirî gîtûmi kaîrî nwa gûteewa nja ûgakinyangwa n'antû.

¹⁴“Na kaîrî biû bûrî werû kîrî antû ba nthîgûrû. Bûkari ta bûra ntûûra yakîîtwe karîmaani îtaithîka.

¹⁵Naka muntû atimuntagia taa amîkunîkîra. Amîtûûgagîîria bantû aûkîîru kaingo îmûrîkîra bonthe bara barî nyomba înu.

¹⁶Ta ûgu i ta bu werû bwenu bûbatîîrue bûmûrîkîra antû kaingo boona mantû mara bûrûthaga i mantû meega, bakumia Abaagu ûra arî îgûrû.”

¹⁷Yiesû auga, “Bûtikaathûgaanie mbûyîîte kwonania *watho bwa Musa na ûrutani bwa iroria bûtirî gîtûmi. Ntaaya kûbuagîra gîtûmi, ndaayire kûbuûyûrîîria.

¹⁸Na mma ga nkûbwîra, mûthiro wa îgûrû na nthîgûrû ûtakinyîîte, gûtirî gatemwa nwa kamwe kana gacuncî nwa kaniini ka watho gakaûra mwanka mantû monthe maingîke.

¹⁹Kwoogu muntû ûra aunaga watho bûra bûniini na akarutana bara bangî kûrûtha ta we, agaatuîka ûmûniini ûneneeni bwa îgûrû. Îndî ûra aathîkagîra na akarutana bara bangî gûtuîka aathîki agaatuîka mûnene ûneneeni bwa îgûrû.

²⁰Na ga nkûbwîra, twanga bûkaagîra bûgakûrûka aarimû ba watho na *Abarisai, bûtiikûrûka ûneneeni bwa îgûrû.”

²¹Yiesû auga, “Ibwiyî Ngai augire kuuma tene, ‘Ûtikaûragane. Ûra akaûragana nakagambithua wana aarûtha ata.’

²²Îndî naani ga nkûbwîra, ûra akaathûûrîra ûra ûngî nakagambithua. Na ûra akeera ûra ûngî ‘Ûrî wa ûtheri!’, arî na îgamba na kîama. Na ûra ageeta ûra ûngî, ‘Kîaa gîkî!’, nakaathi îcamaarîro.

²³“Kwoogu ûkaaya kûthi kîthînjîrooni, na mbere ya ûruta kîgongwana gîaku ûkaririkana kûrî muntû ûbîtîrîtie,

²⁴tiga kîgongwana agu kîthînjîrooni wambe ûthi bûgwatanîre n'we. Rîru ûcooke kûrutira Ngai kîgongwana gîaku.

²⁵“Gwatanîra na ûra bûrî na ntheto n'we na mpwî mbere akwira îgambaani ûtuîrwa ûnenkanîîrua kîrî acikaarî bakwira nceera.

²⁶Na mma ga ngûkwîra, ûtiuma ku ûtamûrîîte mwanka ndururu ya mûthia.”

²⁷Yiesû aathi na mbere abeera, “Na kaîrî ibwiyî Ngai augîîte, ‘Ûtikaathûngîîre.’

²⁸Îndî naani ga nkûbwîra, ûra oonaga mûka akamwîgua bata i ta bûmwe na kûmaama n'we n'ûntû bwa kwîrirîîria we.

²⁹Ûkaaya kwîgua riitho rîaku rîa ûrîo rîtûmaga wîyia, rîtûre. I kaaba wagîîte gacuncî kamwe ka mwîrî waku kîrî mwîrî waku unthe ûgereetwe mwankiini wa îcamaarîro.

³⁰Kana ûkaaya kwîgua njara yaku ya ûrîo îtûmaga wîyia, mîgiite. I kaaba wagîîte gacuncî kamwe ka mwîrî waku kîrî mwîrî waku unthe ûgereetwe mwankiini wa îcamaarîro.”

³¹Yiesû abeera, “Kaîrî kwîrîîtwe, ‘Muntû akeenda gûcookia mûka nwa mwanka aandîke baarûa ya kwonania akuumanwa n'we.’

³²Îndî naani ga nkûbwîra, twanga mûka atuîkîîte mûthûngîîri, ûra acookagia mûka natûmaga mûka ûyu athûngîîra. Na ûra agûraga mûka ta ûyu ateetwe i mwene, muntû ûyu neegagua akîthûngîîra.”

³³Yiesû auga, “Ibwiyî Ngai augire kuuma tene, ‘Ûtikaathiîtie ûtakîrûtha ûntû. Wathiîtîria Ngai kûrûtha ûntû nwa mwanka ûbwingie.’

³⁴Îndî naani ga nkûbwîra, ûtikaathiîtie wana gûkari ata. Ûtikaathiîtie na îgûrû n'ûntû i noogo Ngai aathanaga arî,

³⁵na ûtikaathiîtie na nthîgûrû n'ûntû n'yo ûkinyo bwake kana ûthiîtia na Njerusaremu n'ûntû i taûni ya mûnene ûra arî îgweta mûno.

³⁶Ûtikaathiîtie na kîongo gîaku n'ûntû ûtiûmba kûgarûra rûtundu nwa rûmwe rûtuîka rûûyerû kana rûûyirû.

³⁷Weegua ûrîenda kuuga ‘Yîî,’ uga ‘Yîî.’ Na weegua ûrîenda kuuga ‘Arî,’ uga ‘Arî.’ Bûngî nkûrûki ya ûgu i Nkoma abureetaga.”

³⁸Yiesû auga, “Ibwiyî kwîrîîtwe, ‘Ûra agaatûra ûra ûngî riitho wana we natûrwe rîake. Na ûra agaakûûra ûra ûngî îgego wana we nakûûrwe rîake.’

³⁹Îndî naani ga nkûbwîra, ûtikaarigîîrie muntû akûrûthîra ûthûûku. Muntû akaaya gûkûringa îkoobi rûthea rwa ûrîo, mûgarûrîre kinya rwa ûmotho aringe.

⁴⁰Muntû agakûthitanga abangîîte gûgûtunya caati yaku, eenda nathûkie kinya kabuuti.

⁴¹Muntû akaaya gûgûkamatithia mûrigo wake na taka bantû a mairi îmwe, mûkamatîre mairi îngî îmwe nkûrûki.

⁴²Muntû agakûromba gîntû ûtikaarege kûmûteethia. Na ûra agaagûkooba gîntû ûtikarege kûmûkoobithia.”

⁴³Yiesû auga, “Kaîrî ibwiyî kwîrîîtwe, ‘Enda mûtûûri waku ûmene mûnthû.’

⁴⁴Îndî naani ga nkûbwîra, endagaani anthû beenu na rombagîraani bara babûnyamaaragia.

⁴⁵Bûkarûtha ûgu i rîo bûgaatuîka aana ba Abaagu ûra arî îgûrû, n'ûntû we n'we atûmaga riûa rîake rîthararîra baathûûku na beega na akaurithîria mbura bara barûthaga bûra kwagîrîte na bara batarûthaga bûra kwagîrîte.

⁴⁶Bwenda wabara babwendeete bonka akî rî, i bûrîkû bûûnene bûra bûgaatûma bwewa kîewa? Anga wana arûngithia ûgooti batirûthaga ûgu?

⁴⁷Î kana weegua bûkeethagia waanyanya beenu bonka akî rî, i bûrîkû bwa mwanya bwarûtha? Anga wana bara bataiyî Ngai batirûthaga ûgu?

⁴⁸Nwa mwanka bûtuîke baagîru ta bûra Abaagu ûra arî îgûrû arî ûmwagîru.”