Read tharaka MATHAYO 6 Bible Online

MATHAYO 6 - tharaka bible

MATHAYO 6

¹Yiesû auga, “Îmenyeereeni rîra bûkûrûtha mantû meega bûtigaakare taka bûkwîbonania kîrî antû. N'ûntû bwarûtha ûgu bûtiona kîewa kuuma kîrî Abaagu ûra arî îgûrû.

²“Wateethia muntû arî na thîîna ûtikaugîîrie kîrî antû ta bûra eebwithia barûthaga *sinagoogiini kana njîraani, kaingo bakaathîîrua n'antû. Na mma ga nkûbwîra kîewa kîao nwa gîku.

³Rîra ûkweyana ûteethio, wana njara yaku ya ûmotho îtikaamenye bûra njara ya ûrîo îkûrûtha,

⁴kaingo ûteethio bwaku bûtuîka bwa witho, na Abaagu ûra oonaga mantû withooni agakwa kîewa.”

⁵Yiesû eera arutwa baake, “Bwakara kûromba bûtigaakare ta eebwithia, n'ûntû beendaga kûromba barûngi *masinagoogiini na makomanooni ma njîra kaingo boonwa n'antû. Na mma ga nkûbwîra, kîewa kîao nwa gîku.

⁶Wenda kûromba thûngîra nyomba winge mûrango ûrombe Abaagu ûra arî îgûrû, ûra atoonagwa na meetho, na n'ûntû we noonaga mantû ma witho agakwa kîewa.

⁷Bûtikaarîrînge gûtarî bu bûkuuga na maromba maaraaya ta bara batarî Ayaundi, n'ûntû bathûgaanagia maromba ma ntheto inyingî i mo Ngai eegagua.

⁸Bûtigaakare ta bo n'ûntû wana mbere ya bûromba Abaagu naiyî moobatu meenu.

⁹Rombagaani ûûgû, ‘Baaba wetû ûra ûrî îgûrû, riîtwa rîaku rîgongagwe.

¹⁰Ûnene bwaku bûûye, kwenda gwaku kûrûthagwe gûkû nthîgûrû ta bûra kûrûthagwa îgûrû.

¹¹Tweyage irio bia gûtûgana.

¹²Tûrekagîre mabîtia meetû ta bûra tûrekagîra bara batûbîtagîria.

¹³Ûtikaareke tûthûngîra magerioni, tûtunyûkagie ûra mûthûûku. [Ûnene, inya, na mwago i biaku tene na tene. Aameni.]’[4]

¹⁴Weegua bûkaarekagîra bara babûbîtagîria, wana Abaagu ûra arî îgûrû akabûrekagîra.

¹⁵Îndî bwarega kûrekera antû babûbîtîria, wana biû Abaagu ûra arî îgûrû atibûrekera.”

¹⁶Yiesû auga, “Bwatîîrîra kûrîa n'ûntû bwa maromba, bûtikang'onyarie moothiû meenu ta bûra eebwithia barûthaga kaingo boonia antû ibatîîrîrîte kûrîa n'ûntû bwa kûromba Ngai. Na mma ga nkûbwîra kîewa kîao nwa gîku.

¹⁷Bwatîîrîra kûrîa n'ûntû bwa maromba thambagaani meetho, bûgaaka ntundu maguta na bûgaicanûra ta wîthîre,

¹⁸kaingo bûtoonia antû bwîrekeetie n'ûntû bwa kûromba Ngai. Igûtuîke nwa Abaagu ûra atoonagwa na meetho wenka aiyî. Na n'ûntû n'we oonaga mantû ma witho, akabwaa kîewa.”

¹⁹Yiesû auga, “Bûtikeebaigîre ûtonga bwa gûkû nthîgûrû bwîgwetie bu, n'ûntû ndugunye na nganka nwa ibuînyangie kana bûkaiywa n'amba.

²⁰Îbaigîreeni ûtonga bwa îgûrû bûra bûtaûmba kwînyangua i ndugunye kana nganka, kana mwamba athûngîra aiya.

²¹Ara ûtonga bwa muntû bûrî noogo nkoro yake îîgagua îrî.”

²²Yiesû auga, “Riitho i ta rîo taa ya mwîrî. Ûkaaya kwîgua gûtarî bu riitho rîaku rîkari, mwîrî waku unthe ûkaamûrîkîrwa i werû.

²³Îndî riitho rîaku ûkeegua rîrî ûntû, mwîrî waku unthe ûûyûragwa i mwindu. Î rîo rî, ûkaaya kwîgua werû bûra bûrî ndeni yaku bûtuîkîîte mwindu rî, mwindu ûyu ti ûmûnene mûno!

²⁴“Gûtirî muntû aûmba gûtûmîkîra anene baîrî. Nwa amenire ûmwe eenda ûra ûngî, kana aathîkîîre ûmwe atatîîye ûra ûngî. Bûtiûmba gûtûmîkîra Ngai na bûtûmîkîra ûtonga.”

²⁵Yiesû auga, “Ka mbwîreeni, bûtikeemakîre bûkîûragia i mbi bûkaarîa, i mbi bûkaanyua, kana i kû bûkaaruta nguo cia gwîkîra. Anga mwoyo t'uu ûrî gîtûmi nkûrûki ya irio na mwîrî na uu nkûrûki ya nguo?

²⁶Taraithaani nyoni. Cio itiandaga na itikethaga kana ciaiga irio makûmbîîni. Abaagu ûra arî îgûrû n'we acieyaga irio. I biû bûrî gîtûmi nkûrûki ya cio?

²⁷N'ûû wacienu aûmba kwîbongeera ntugû nwa îmwe ya mwoyo wake n'ûntû bwa kwîmakîra?

²⁸“Na i kî îîndî n'ûntû bûkwîmakîra bûkîûragia i kû bûkaaruta nguo? Taraithaani maûa mara maumaga kîthakaani bwone bûra makûrangaga. Mo matirutaga ngûgî kana matuma nguo.

²⁹Na ka mbwîreeni, wana mûnene Soromoni ûra nkuma yake yaiyîkeene mûno, ûthongi bwa nguo ciake bûtigîkinyîîra ûthongi bwa maûa ta mama.

³⁰Biû antû ba wîtîgio bûûkai! Ûkeegua Ngai nakûthongamia nyaki ya kîthaka bûgana ûgu rî, nyaki îkwîgua îrî îmbîthî îmunthî na rûû gûgîkinya îkîgerwa mwankiini rî, î biû akaabûmenyeera bûgana ata?

³¹Kwoogu bûtikeemakîre bûkîûragia, ‘I mbi tûkaarîa?’ kana, ‘I mbi tûkaanyua?’ kana, ‘I kû tûkaaruta nguo?’

³²Into ta bibu i bio antû ba nthîgûrû bacûaga. Abaagu ûra arî îgûrû naiyî bira bûrî bata na bio.

³³Îgûrû rîa mantû monthe cûani ûnene bwa Abaagu ûra arî îgûrû na rûthagaani kwenda gwake, rîru bibu bionthe bûrî bata na bio akabwaa.

³⁴Kwoogu bûtikaamakîre mantû ma rûû. Rûû rûkeemakîra rungwa. Wantugû îrî na mathîîna ma yo ma kûgana.”