Read tharaka MATHAYO 7 Bible Online

MATHAYO 7 - tharaka bible

MATHAYO 7

¹Yiesû aathi na mbere na kûrutana auga, “Bûtikaagiitîre bara bangî îgamba bûûya kûgambithua,

²n'ûntû bûra bûgiitagîra bara bangî îgamba i ta bu bûkaagiitîrwa. Kîthimi kîra ûkaathimîra na kîo bara bangî wana woû i kîo ûkaathimîrwa na kîo.

³N'ata ûkwona gakaracû karî riitho rîa mûcoore waku, îndî ûtikwona mûgogo ûra ûrî riitho rîaku?

⁴N'ata ûûmba kwîra mûcoore waku, ‘Ga nkûrute gakaracû riitho’ na mûgogo ûrî rîîtho rîaku?

⁵Woû mwîbwithia! Amba wîrute mûgogo riitho kaingo ûûmba kwona bwega gakaracû kara karî riitho rîa mûcoore waku bwega, ûmûruta ko.

⁶“Bûtikaanenkere kurû gîntû kîîtheru na igaacooka kûbûrûmanga. Na bûtikaagerere ngûrwe ruru[5] cienu, n'ûntû nigaakinyanga.”

⁷Yiesû auga, “Rombaani bûkeewa. Cûani bûkoona. Ringaringaani bûkaarugûrîrwa.

⁸Ûra arombaga neeyagwa, ûra acûaga noonaga, na ûra aringaringaga mûrango narugûragîrwa.

⁹N'ûû wacienu eetua mûgaate i mwana wake akamwaa iiga?

¹⁰Kana mwana amwîtia îkûyû akamwaa njoka?

¹¹Ûkeegua biû ibwiyî kwa aana beenu biewa bithongi na bûrî antû baathûûku rî, n'ata îîndî Abaagu ûra arî îgûrû akaarega kûbwaa biewa bithongi mûno, bara bûmûrombaga!

¹²Kwoogu rûthagîraani bara bangî mantû monthe ta bûra wana biû bwenda babûrûthîra, n'ûntû i bu kwandîkîîtwe *wathooni bwa Musa na mabukuuni ma iroria.”

¹³Yiesû auga, “Thûngîraani na mwîrîga ûra mûcege. Mwîrîga ûra ûthiîte wînyangiani n'ûmwariî na njîra n'îmbariî, na n'yo baingî bathiîte n'yo.

¹⁴Îndî mwîrîga na njîra îra îthiîte mwoyooni n'înjincianu na ibaakai bamiiyî.”

¹⁵Yiesû auga, “Îmenyeereeni kîrî iroria bia ûrongo bira biiyaga bikari ta ng'ondu bikîoneka, îndî ndeni bikari ta ncûgi.

¹⁶Bûkabimenya na ngûgî ira birutaga. Kûrî muntû aûmba gûtua ncabiibû mûtîîni wa mîîgua, kana agatua nkûyû mûgaani?

¹⁷Mûtî ûmwega ûciaraga maciaro meega, na mûtî ûmûthûûku ûciaraga maciaro maathûûku.

¹⁸Mûtî ûmwega ûtiûmba gûciara maciaro maathûûku, na mûtî ûmûthûûku ûtiûmba gûciara maciaro meega.

¹⁹Mûtî unthe ûra ûtaciaraga maciaro meega nûrîîkagwa ûkarîrîkîrwa na mwanki.

²⁰Kwoogu bûkabimenya na ngûgî ira birutaga.”

²¹Yiesû auga, “Ti muntû wonthe ûra ambîtaga ‘Mwathani, Mwathani,’ akaathi ûneneeni bwa îgûrû nwanga ûra arûthaga bûra Baaba ûra arî îgûrû eendaga kûrûthwa.

²²Ntugû înu i baingî bakaambîta, ‘Mwathani, Mwathani, tûtaaroragia kwa riîtwa rîaku na tûkeengatia irundu biithûûku kwa inya ya riîtwa rîaku na tûkaringa biama biingî kwa riîtwa rîaku?’

²³Naani nkaabeera ntakûbaitha, ‘Umaani aaga ndî, ntibwiyî, eeyia baba.’ ”

²⁴Yiesû auga, “Kwoogu ûra wonthe eegagua ntheto ciakwa akairûtha, akari ta muntû ûmûûme ûra aakire nyomba yake rwaraani rwa iiga.

²⁵Mbura îkuura mûguû waya ruuo rûkîbuutanaga, nyomba îtoombokana kana yenyenya n'ûntû mûcingi wa yo weenjîîtwe rwaraani rwa iiga.

²⁶Na ûra eegagua ntheto ciakwa na atacirûthe, akari ta kîaa kîra gîakire nyomba ya kîo mûthangaani.

²⁷Mbura îkuura mûguû waya ruuo rûkîbuutanaga nyomba ya kîo yaturana nthî mpu, yoombokana. Kûgwa kûra yagwîre kwarî kûûnene mûno!”

²⁸Yiesû akûthiria kuuga mantû mamu, kîrîndî kîarigara mûno n'ûrutani bwake,

²⁹n'ûntû aarutanaga na inya ya Ngai na ti ta aarimû ba watho.