Read tharaka MATHAYO 8 Bible Online

MATHAYO 8 - tharaka bible

MATHAYO 8

¹Yiesû akûgûrûka kuuma karîmaani kara baarî, antû baingî mûno bamûthingata.

²Muntû ûmwe aayîîtue mûtigiri aaya amûturîria maru. Amwîra, “Mwathani, weegua wenda kûmboria, mboria nthere.”

³Yiesû aatambûrûkia njara yake amûringithia. Amwîra, “Inkwenda, thera!” Warîru muntû ûyu oora mûtigiri!

⁴Yiesû amwîra, “Menyeera ûtikeere muntû. Îndî îthi wonwe i mûthînjîri wa Ngai ûrute kîewa kîra Musa augire kîrutagwe kîrî ûkûûyî kîrî antû.”

⁵Yiesû agûkinya Kaperinaumu, mûtongoria ûmwe wa njûûrî ya acikaarî îgana aaya kîrî we. Amwereka

⁶akîmwîraga, “Mwathani, mûruti ngûgî wakwa n'ûmwayie ndwari ya wonje. Namaami na nakûnyamaara mûno.”

⁷Yiesû amwîra, “Nkaaya kûmworia.”

⁸Mûtongoria ûyu eera Yiesû, “Mwathani, ntikwona ndî mûganu ûntû ûûmba kûthûngîra nyomba yakwa. Uga mûgambo ûmwe akî na mûruti ngûgî wakwa akoora.

⁹Niû ningwa ndî na mûnene ûra aambathaga. Naani ndî na acikaarî bara mbathaga. Na nkeera ûmwe, ‘Îthi!’ nathiyaga. Na nkeera ûngî ‘Ncû!’ naayaga. Na nkeera nkombo yakwa n'yo nîrûthe ûntû bûna, nîrûthaga.”

¹⁰Yiesû aarigara mûno eegua ûgu. Eera bara baamûthingatîîte, “I mma ga nkûbwîra, ntoona muntû arî na wîtîgio bûûnene ta bûbû. Wana Isiraeri ationeka nwa ûmwe.

¹¹Ka mbwîreeni, antû baingî bakauma nteere cionthe cia nthîgûrû barîyanîre meethaani îmwe na Îburaîmu, Isaka na Njakubu ûneneeni bwa îgûrû.

¹²Îndî bara babatîîrue wîgua i bo bakaathi ûneneeni, bakaagerwa nja mwinduuni barîre barî na kîeba kîînene mûno.”[6]

¹³Yiesû eera mûtongoria ûyu, “Înûka, na igûkarîke ûgu wîtîgîîtie.” Thaa wa inu mûruti ngûgî wake oora.

¹⁴Yiesû agûkinya mûciî kwa baPeterû, oona mûthoni wa Peterû wa mûka amaami ûrîrî aayîîtue kûbîîyanîra mwîrî.

¹⁵Aathi kîrî we amûringithia njara, oora. Aûkîîra aanjîîria kûbagaagûra.

¹⁶Na kîûgoro riûa rîkûthûa, antû bara baarî na irundu biithûûku baareetwa kîrî we. Yiesû abiîngatia na mûgambo ûmwe akî biauma. Na bonthe bara baayîîtue abooria.

¹⁷Mantû mamu maatuîkîkire kaingo mantû mara kîroria Isaaya aaroriirie maûyûra, rîra augire, “We mwene naathûkiirie wonje bwetû na ndwari cietû.”

¹⁸Rîra Yiesû oonire ntundu înene ya antû îmûcereereete, eera arutwa baake baringanîrie amwe n'we bathi rûgongo rûra rûngî rwa îria.

¹⁹Mwarimû ûmwe wa watho aaya eera Yiesû, “Mwarimû, ngakûthingataga kunthe kûra ûkaathiyaga.”

²⁰Yiesû amûcookeria amwîra, “Mbwe irî mîrinya na nyoni irî ntara, îndî Mwana wa Muntû atirî kîmaamo.”

²¹Ûmwe wa arutwa baake amwîra, “Mwathani, nwanga ndamba kûthika baaba.”[7]

²²Yiesû amwîra, “Nthingata! Tigana na ntungu ithike ntungu cia cio.”

²³Yiesû bagûtwa îtarûûni, arutwa baake bamûthingata.

²⁴Bathiîte, nthûti îmwe kwagîa kîbuubani kîînene îriani, makûmbî ma rûûyî makûûmba gatarû akubî magakunîkania cwe. Yiesû naarî akûmaama.

²⁵Arutwa baake baathi bamûûkia bakîmwîraga, “Mwathani, twonokie itûkûthira!”

²⁶Yiesû abaûria, “I mbi îkûbûmakia, biû antû ba wîtîgio bûûkai?” Aûkîîra aagondokera kîbuubani na makûmbî ma rûûyî, gwakirîîria kûrû.

²⁷Antû babu baarigara. Baûrania, “Ika muntû ûyû akari ata? N'ûntû wana ruuo, wana makumbî ma rûûyî i makûmwathîkîra!”

²⁸Bagûkinya rûgongo rûra rûngî rwa nthîgûrû ya Agandaara[8] baakomana na antû baîrî barî na irundu biithûûku. Antû babu baumîîte bwa makurungu kûra antû baakuû baathikagwa. Baarî baang'entu mûno na bataarekaga muntû akûrûkîîra njîraani înu.

²⁹Bakwona Yiesû baanjîîria gûkaya mûno bakiugaga, “N'ata ûkwenda naati, woû Mwana wa Ngai? Ika waya gûtûnyamaaria kagiita kongwa gatarî gakinyu?”

³⁰Gataaria mma kuuma agu baarî ikwarî na ngûrwe inyingî ciarîîthîîtue.

³¹Irundu bibu biereka Yiesû biamwîra, “Itû watûruta kîrî antû baba twîtîgîîrie tûthi ngûrweeni iira.”

³²Yiesû abiîra, “Îthiini!” Irundu bibu biauma antûûni babu biathi biathûngîra ngûrweeni inu. Ngûrwe cionthe ciaugia ciîndamîîte na mpara, ciemina îriani ciaûra na rûûyî.

³³Antû bara bairîîthîîtie bakwona ûgu baugia rwîro baathi. Baatambia ntheto inu taûni yonthe. Bauga kinya bûra gwakarîkire kîrî antû babu baarî na irundu bibu.

³⁴Antû bonthe bara baarî taûni bakwîgua ûgu bauma baathi gûcûa Yiesû naara aarî. Bakûmwona bamwereka bamwîra athi aume kwao.