Read tharaka MATHAYO 9 Bible Online

MATHAYO 9 - tharaka bible

MATHAYO 9

¹Yiesû aatwa îtarûûni aaringanîria rûgongo rûra rûngî, aakinya taûni îra aakaraga.

²Antû bamwe baaya bakamatîîte kîonje na mamaamîro ma kîo bakînintîîte kîrî we. Yiesû akwona wîtîgio bwao eera kîonje gîku, “Aba, ûtikaamake. Ûkûrekerwa meeyia maaku.”

³Aarimû bamwe ba watho baanjîîria kûthûgaania, “Muntû ûyû nakwîthûkia taka arî Ngai!”

⁴Yiesû akûmenya bûra baathûgaanagia, abaûria, “I mbi n'ûntû bûkûthûgaania mathûgaania maathûûku ûgu nkorooni cienu?

⁵I bûrîkû bûrî na inya? I kuuga, ‘Ûkûrekerwa meeyia maaku,’ kana i kuuga, ‘Ûkîîra ûthi?’ ”

⁶Yiesû abeera, “Kaingo bûmenya Mwana wa Muntû arî na watho bwa kûrekera antû meeyia gûkû nthîgûrû, inkûbwonia.” Yiesû eera kîonje gîku, “Ûkîîra ûkamate mamaamîro maaku wînûke.”

⁷Kîonje gîaûkîîra kîenûka.

⁸Antû bakwona ûgu baaguaya mûno. Baakumia Ngai ûra eete antû inya ta înu.

⁹Yiesû athiîte woogu oona muntû eetagwa Mathayo akari nthî ara aakaraga akîrûngithagia ûgooti. Yiesû amwîra, “Nthingata!” Mathayo aûkîîra amûthingata.

¹⁰Yiesû akari mûciî kwa Mathayo akîrîyaga irio, arûngithia ûgooti baingî na eeyia baaya baanjîîria kûrîyanîra n'we amwe na arutwa baake.

¹¹*Abarisai bakwona ûgu baûria arutwa ba Yiesû, “I kî gîgûtûma mwarimû wenu arîyanîra na arûngithia ûgooti na eeyia?”

¹²Yiesû akwîgua bakîûria ûgu, abacookeria abeera, “Tika antû batarî baayie beendaga kûragûrîrwa i ndagitaarî, bara baayie i bo beendaga kûragûrîrwa.

¹³Îthiini bûkeerutane mîgambo îno îriuga ata, ara ntheto ya Ngai yugîîte, ‘Kîra nkwenda n'antû beeganagua kîao, ntirî bata na kîgongwana.’ Ntaaya gwîta bara baagîru, ndaayire n'ûntû bwa eeyia.”

¹⁴Kagiita kamwe athingati ba Njoana Mûbaatithania baathiire kîrî Yiesû bamûûria, “I kî n'ûntû tiû na *Abarisai tûtîîragîra kûrîa irio n'ûntû bwa maromba, îndî arutwa baaku bo batitîîragîra?”

¹⁵Yiesû abaûria, “Bwaûmba kwîrîgîîra antû bara beete wikiini barega kûrîa rîra mûgûrani arî oogo? Îndî kûrî kagiita gagaakinya mûgûrani arutarutwe kîrî bo. Rîru nwa barege kûrîa irio.

¹⁶“Gûtirî muntû eekagîra nguo kîraka na gîtaame gîtarî gîkûrû ataambîîte gûkîbûûra n'ûntû nguo înu yabûûrwa gîtaame gîku igîkaamîkuuyia îgendeerie.

¹⁷Na kaîrî, gûtirî we eekagîra ûkî bwa kûrugwa warîru nceemaani înkûrû n'ûntû nceema nîgaatûûmûka yûûre mana na ûkî bwene. Ûkî bwa kûrugwa warîru bwîkagîrwa nceemaani îtarî nkûrû kaingo gûtarî kîo kîûra.”

¹⁸Yiesû akîaragia woogu, mûtongoria ûmwe wa *sinagoogi akûmwona aaya kîrî we. Aaturia maru mbere yake, amwereka mûno amwîra, “Kaarî gaakwa i weendî gaakua. Itû ncû tûthi ûkaigîîre njara kariûke.”

¹⁹Yiesû na arutwa baake baûka bamûthingata.

²⁰Bathiîte mûka ûmwe aaya. Mûka ûyu naanyamaarîîtue mûno i ndwari ya kûrua nthakame bantû a mîanka îkûmi na îîrî. Aaya bwa nyuma ya Yiesû, aatongithia mûthia wa nguo yake

²¹akîbîîraga na nkoro, “Ngatonga nwa nguo yake yonka nkaabua.”

²²Yiesû aûndûka nyuma amwîra, “Ûtikaamake, mwarî wakwa. Wîtîgio bwaku bûgûtûma woora.” Na nthûti weenu mûka ûyu oora.

²³Yiesû bagûkinya kwa mûtongoria ûyu, aathûngîra nyomba. Eethîra augia ba mbeebe[9] na kîrîndî kiingî mûno gûku ndeni gîkîyogaga.

²⁴Abeera, “Umaani. Kaarî gaka ti gakuû ikamaami.” Yiesû akuuga ûgu boona ta gûtarî bu augaga.

²⁵Antû bakûrutwa nja Yiesû aathûngîra kûra kaarî gaku kaarî, akagwata njara agaûkîîria.

²⁶Nkuma înu yatambua gûntû gûku kunthe.

²⁷Yiesû akuuma agu athiîte, ntûngi ciîrî ciamûthingata ikiugagîîria na inya, “Mwana wa Ndaundi, twîgue kîao!”

²⁸Akûthûngîra nyomba, ntûngi inu ciîrî ciaya kîrî we. Aciûria, “Ibûgwîtîgia ndaûmba kûbworia?” Ntûngi inu ciamwîra, “Yîî, waûmba, Mwathani.”

²⁹Yiesû aatambûrûkia njara abatonga meetho. Abeera, “Kûrookara ûgu bwîtîgîîtie.”

³⁰Baatua kwona. Yiesû aacooka abakaania mûno abeera, “Bûtikeere muntû mantû mama.”

³¹Antû bakuumagarûka baariûnga na ntûûra bagîtambagia nkuma ya Yiesû gûntû gûku kunthe.

³²Warîra Yiesû bakiumagarûka nyomba aareeterwa maamu aarî na kîrundu kîîthûûku.

³³Kîrundu gîku gîkwîngatua muntû ûyu aanjîîria kwaria. Kîrîndî kîarigara kîauga, “Aba, gûtooneka ûntû ta bûbû kaîrî Isiraeri!”

³⁴*Abarisai bauga, “I mûnene wa irundu biithûûku eeyaga muntû ûyû inya îra eengatagia n'yo irundu biithûûku.”

³⁵Yiesû aariûnga taûni na ntûûra cionthe akîrutanaga antû *masinagoogiini maao na agîtûmagîîria ntheto îmbega ya ûnene bwa îgûrû, na akîoragia antû mbayua cia mîthemba yonthe.

³⁶Eegua antû kîao akwona bûra baanyamaarîîte bûgana banyageere ta ng'ondu itarî na mûrîîthi.

³⁷Yiesû eera arutwa baake, “Maketha i maingî, îndî akethi i baakai.

³⁸Kwoogu rombaani Mwathani wa maketha atûme akethi îkethaani rîake.”