Read tharaka MAARIKO 1 Bible Online

MAARIKO 1 - tharaka bible

MAARIKO 1

¹Ntheto îmbega ya Yiesû Kîrîstû, Mwana wa Ngai yambîîrie ûûgû.

²Kwandîkîîtwe n'ûmwe wa iroria, “Ga ngûkwîra, ngaatûma mûtûmwa wakwa mbere ûkinya akûrûthîre njîra.”

³Na kaîrî kwandîkwa i kîroria Isaaya, “Kayû ka muntû igagûtûmîîria rwanda gakiugaga, ‘Theriani njîra ya Mwathani, rûngariani kûra agaakûrûkîîra.’ ”

⁴Na kwoogu, i kîo n'ûntû Njoana aarî rwanda akîbaatithagia antû. Aatûmagîîria antû akabeera beerire meeyia maao ababaatithie, Ngai abarekere.

⁵Antû baingî mûno kuuma taûni ya Njerusaremu na gûntû kûngî gûku nthîgûrû ya Njundea baaya baumbûra meeyia maao, Njoana ababaatithia muurooni wa Njorondani.

⁶Njoana eekagîra nguo yarûthîîtwe na guaya ya nkamîîra, akooga mûkanda kauna. Aarîyaga ngige na ûkî bwa kîthaka.

⁷Njoana aatûmagîîria antû akabeera, “Ûra aayîîte nyuma yakwa n'we arî îgweta nkûrûki yakwa. Ntiagîrîte kinya wa gûkuamîîria mmûtharia iraatû ndigi.

⁸Niû ndîbûbaatithia na rûûyî. We akaabûbaatithia na Kîrundu Ûmûtheru.”

⁹Îgiitaani rîru Njoana aabaatithanagia, Yiesû aaya aumîîte Gariiri taûni yeetagwa Nasareethi, aabaatithua i Njoana muurooni wa Njorondani.

¹⁰Yiesû akûriamûka rûûyîîni, oona îgûrû rîarugûka, Kîrundu Ûmûtheru eendama kîrî we akari ta îcea aagwîrîîra îgûrû rîake.

¹¹Kayû kauma îgûrû kauga, “Woû ûrî Mwana wakwa ûra mbendeete mûno. Nûnkenagia mûno.”

¹²Nthûti îmwe Kîrundu amwira rwanda,

¹³Yiesû aakara ku ntugû mîrongo îna waakîgeragua i Saitaani. Na gûku rwanda Yiesû akaranagia na nyamû cia kîthaka, îndî araîka ibaamweyaga ûteethio.

¹⁴Njoana akûthaîkwa nceera, nyumaani Yiesû aacooka Gariiri gûtûmîîria ntheto îmbega ya Ngai.

¹⁵Aatûmagîîria antû akabeera, “Îgiita rîgûkinya. Ûnene bwa Ngai bûkûthengeera. Îrireeni meeyia meenu bwîtîgie ntheto îmbega.”

¹⁶Yiesû atambîîte na rûteere rwa îria rîa Gariiri, oona ategi ba makûyû baîrî bakîamba neeti ciao bagwata makûyû. Baarî Simioni na mûruagina Enderea.

¹⁷Yiesû abeera, “Nthingataani mbûtuîkithie ategi ba antû.”

¹⁸Bamûthingata warîru baatiga neeti ciao naagu.

¹⁹Bakûthiyathiyanga, Yiesû eethîra ategi bangî baîrî barî îtarûûni rîao bagîtumaga neeti ciao. Baarî Njakubu na mûruagina Njoana, aana ba muntû eetagwa Cabendi.

²⁰Yiesû akûboona abeeta. Nthûti îmwe Njakubu na Njoana baatiga îthe, Cabendi, na aruti ngûgî baao îtarûûni baathingata Yiesû.

²¹Yiesû na arutwa baake baathi taûni ya Kaperinaumu. Ntugû ya *Sabatû înu yathingatîîte, Yiesû aathi *sinagoogiini aarutana antû.

²²Bara baamûthikîîrîîtie baarigara mûno n'ûrutani bwake n'ûntû we ataarutanaga ta aarimû ba watho. Aarutanaga na watho kuuma kîrî Ngai.

²³Gûku sinagoogiini ikwarî na muntû aarî na kîrundu kîîthûûku. Muntû ûyu augîîria na inya,

²⁴auga, “N'ata ûkwenda naati Yiesû Mûnasareethi? Ka ûûyîîte gûtûthiria kana? Imbiyî woû ûrî ûû. Ûrî Mûtheru kuuma kîrî Ngai.”

²⁵Yiesû aagondokera kîrundu gîku akîîra, “Kira na uume kîrî muntû ûyû.”

²⁶Kîrundu gîku kîthûûku gîatûgûûgia muntû ûyu gîkîrurumaga. Kîauma kîrî we kîathi.

²⁷Antû bonthe bara baarî gûku baarigara mûno. Baanjîîria kûûrania, “I bûrîkû bûbû? Î muntû ûyû arîrutana mantû maageni na arîaria na watho kuuma kîrî Ngai! Î arîîra irundu biithûûku birûthe ûntû na bikamwathikîra!”

²⁸Nkuma ya Yiesû yatamba na mpwî mûno gûntû kunthe gûku nthîgûrû ya Gariiri.

²⁹Yiesû bakuuma *sinagoogiini baathi kwa baSimioni na mûruagina Enderea. Ibaarî kinya na Njakubu na Njoana.

³⁰Mûthoni wa Simioni wa mûka naamaami aayîîtue kûbîîyanîra mwîrî. Yiesû akwîrwa mantû maake,

³¹aathi amûgwata njara, akûmûûkîîria aabua aanjîîria kûbagaagûra.

³²Ûgoro nyuma ya riûa rîkûthûa, bonthe bara baayîîtue na bara baarî na irundu biithûûku baareetwa kîrî Yiesû.

³³Kîrîndî kîonthe gîa taûni kîethîreene agu mwîrango wa nyomba înu Yiesû aarî.

³⁴Yiesû ooria baingî baao, bara baarî na ndwari mîthemba na mîthemba, na eengatia irundu biingî biithûûku biauma kîrî antû. Na ataareka irundu bibu biaria n'ûntû ibiaiyî we aarî ûû.

³⁵Rûûni rûkîîrî mûno, Yiesû aaraûka kuumagarûka. Auma taûni înu aathi gûntû gûtaarî na antû kûrombera noogo.

³⁶Simioni na bara bangî baathi kûmûcûa.

³⁷Bakûmwona bamwîra, “Antû bonthe ibagûgûceria.”

³⁸Yiesû abeera, “Tûthiini taûni ira ingî na cio ngatûmîîrie noogo n'ûntû ûgu i bu bwatûmire mbûya.”

³⁹Kwoogu Yiesû aariûnga gûku Gariiri kunthe agîtûmagîîria *masinagoogiini, na akîîngatagia irundu biithûûku bikauma kîrî antû.

⁴⁰Muntû ûmwe aarî na mûtigiri aaya kîrî Yiesû, aamûturîria maru amwereka amwîra, “Weegua weenda kûmboria, mboria nthere.”

⁴¹Yiesû aûyûrwa i kîao. Aatambûrûkia njara amûringithia, amwîra, “Yîî, inkwenda. Thera!”

⁴²Nthûti weenu muntû ûyu oora mûtigiri.

⁴³Mbere Yiesû eera muntû ûyu athi, amûkaania mûno amwîra, “Menyeera ûtikeere muntû,

⁴⁴îndî îthi wonwe i mûthînjîri wa Ngai, ûrute kîewa kîra Musa augire kîrutagwe kîrî ûkûûyî kîrî antû.”

⁴⁵Îndî amwe na ûgu, muntû ûyu aathiire eera antû bonthe nkuma înu yatamba gûntû kunthe mwanka gwatuîka Yiesû atikîthi taûni antû bonthe barega kûmwîthîranîra. Yiesû aakara gûntû gûtaarî na antû, na naagu i noogo antû kuuma nteere cionthe baathiyaga kûmwona arî.