Read tharaka MAARIKO 11 Bible Online

MAARIKO 11 - tharaka bible

MAARIKO 11

¹Yiesû na arutwa baake baakara gûkinya Njerusaremu. Barî akubî gûkinya gataûni geetagwa Bethipage na kangî geetagwa Bethania, Karîmaani ka Mîceituuni, Yiesû aatûma arutwa baake baîrî bathiyaga.

²Abeera, “Îthiini gataûni gaka karî mbere aaga, na bwakinya ûgu bûkoona kayaû ka îng'ooi gataakamata muntû kathaîkîîtwe. Bûthaûre ko bûreete.

³Ûra akaabûûria i kî n'ûntû bûgûkathaûra, bûmwîre, ‘I Mwathani arî bata na ko na agagacookia waaga, atiikarakara na ko.’ ”

⁴Arutwa babu bakûthi beethîra kayaû gaku ka îng'ooi kathaîkîîtwe mûrangooni wa nyomba, akubî na barabara, bakathaûra.

⁵Antû bamwe baarûngi waagu babaûria, “I kî n'ûntû bûkûthaûra kayaû gaku?”

⁶Arutwa babu babacookeria babeera wabûra Yiesû aabeerîîte bacookie bauge. Antû babu babarekeeria baathi na ko

⁷baareetera Yiesû. Baarîra Yiesû tûbuuti twao mûgongo wa ko, Yiesû aakarîra.

⁸Antû bara baingî baara tûbuuti twao barabaraani. Na bamwe baatema mathîgî baara barabaraani.

⁹Bonthe bara baarî mûtongoria na bara baumîîte Yiesû nyuma baugîîria bauga, “Ocana! N'ûmûthaarime ûra aayîîte kwa riîtwa rîa Mwathani!

¹⁰Ûnene bûra bûûyîîte, bwa kîûyûyû gîetû, Ndaundi, i bûûthaarime. Ocana kîrî ûra arî îgûrû mûno mûno!”

¹¹Yiesû aakinya Njerusaremu. Aathi nyomba ya Ngai, oona bûra bunthe gwakari gûku ndeni. Na n'ûntû ikwarî gûkwanjîîria gûtuga, auma Njerusaremu aacooka Bethania na arutwa bara baake îkûmi na baîrî.

¹²Rûûni baumîîte Bethania, Yiesû eegua yûûra.

¹³Arî kûraaya oona mûkûyû ûmûririmu. Aathi kwona kana nwarî na nkûyû. Akûthi oona i mathangû monka maarî n'ûntû gataarî kagiita ga nkûyû gûciarwa.

¹⁴Yiesû eera mûkûyû ûyu, “Gûtirî muntû akaarîa nkûyû ciaku kaîrî! Woû ûtikooro ûciara kaîrî!” Arutwa baake ibeegiirue akiuga ûgu.

¹⁵Bagûkinya Njerusaremu, Yiesû aathi nyomba ya Ngai aanjîîria kwîngatia antû ku bara baagûranagîra na bara beendanagîria. Aakuûrania meetha cia bara baakûûranagia mbia na tûkongoro twa bara beendagia macea ma mîciî.

¹⁶Aaregeera bara aatuîkîîrie baayîîte kwendia biao, kûbikûrûkia nyomba ya Ngai.

¹⁷Yiesû eera babu eengatagia, “Anga *Maandîkooni Maatheru gûtiandîkîîtwe, ‘Nyomba yakwa îgeetwa nyomba ya mîgongo yonthe kûra îkaandombera’? Îndî biû bûmîtuîkithîîtie ‘îkurungu rîa kwîbithaga aamba’!”

¹⁸*Athînjîri bara banene ba Ngai na aarimû ba watho bakwîgua Yiesû auga ûgu, baanjîîria gûcûa njîra ya kûmûûraga. Îndî ibaamûkuthûkaga n'ûntû antû ibaakeneete n'ûrutani bwake.

¹⁹Gûgûkinya ûgoro Yiesû aathi na arutwa baake.

²⁰Rûûni rûkîîrî, Yiesû na arutwa baake bathiîte baakûrûkîîra akubî na mûkûyû ûra Yiesû aarumîîte. Boona ûûmîîte na mîri mîene.

²¹Petûrû aaririkana. Eera Yiesû, “Mwarimû, ene mûkûyû ûra ûrarumire nûraûmire!”

²²Yiesû eera arutwa baake, “Karagaani bwîtîgîîtie Ngai.

²³Na mma ga nkûbwîra, ûkeegua muntû atarî na nkanja nkorooni yake, ûkeegua eetîgîîtie bûra akuuga bûgaatuîkîka, akeera kîrîma ta gîkî, ‘Kûûka ûkagwe îriani,’ gûkarîka woogu auga.

²⁴Kwoogu bûra nkuuga n'atî kîonthe kîra bûkaûria marombaani meenu, îgaguani bwîtîgîîtie bûkeewa kîo.

²⁵Na rîonthe bûkîromba, îgaguani bûrekanîrîte bûra bunthe muntû aûmba kwîgua abîtîrîtie ûra ûngî na bu, kaingo Abaagu ûra arî îgûrû n'we akaabûrekera mabîtia meenu. [

²⁶Bûkarega kûrekanagîra, wana Abaagu ûra arî îgûrû atibûrekera na biû.]”[9]

²⁷Yiesû aacooka Njerusaremu kaîrî. Akîriûngariûnga agu nja ya nyomba ya Ngai, *athînjîri bara banene ba Ngai, aarimû ba watho, na akûrû baaya.

²⁸Bamûûria, “I kû ûrutîîte watho bwa kûrûtha mantû mama ûkûrûtha? Na n'ûû akwete bu?”

²⁹Yiesû abeera, “Wana niû ka mbûûrieni. Bwaûmba gûncookeria, wana niû nkabwîra ara ndutîîte watho bwa kûrûtha mantû mama nkûrûtha.”

³⁰Abaûria, “I kû Njoana aarutîîte watho bwa kûbaatithania? I kuuma kîrî Ngai, kana i kuuma kîrî muntû? Ncookeriani.”

³¹Baanjîîria kwîrana, “Twamwîra, ‘I kuuma kîrî Ngai,’ agaatûûria, ‘Aabu i kî n'ûntû bûtaamwîtîgia?’

³²Na twamwîra, ‘I kuuma kîrî muntû,’ ... arî, tiga!” Ibaakuthûkaga kîrîndî n'ûntû antû beetîgîîtie wabu Njoana aarî kîroria.

³³Kwoogu beera Yiesû, “Tûtiiyî.” Yiesû abeera, “Wana niû ntibwîra ara ndutîîte watho bwa kûrûtha mantû mama nkûrûtha.”