Read tharaka MAARIKO 12 Bible Online

MAARIKO 12 - tharaka bible

MAARIKO 12

¹Yiesû aanjîîria kûbeera mantû agîtûmagîra ngerekano. Abeera, “Kagiita kamwe ikwarî na muntû aarîmîîte mûnda, aanda ncabiibû. Acwirigîra, aathondeka bantû a gwitîra ncabiibû na aaka kîbayo. Rîru aakomborithia antû uu, aathi rûgendo.

²“Îgiita rîa maketha rîgûkinya, muntû ûyu aatûma mûruti ngûgî wake kîrî antû babu aakomborithîîtie mûnda. Amwîra athi amûgîîrîre bira biarî biake makethaani mamu kûringana na bûra baagwatanîrîte na antû babu.

³Mûruti ngûgî ûyu agûkinya, antû babu bamûgwata bamûtura, bamwîngatia, aacooka atarî na gîntû.

⁴Mwene mûnda aatûma ûngî kaîrî. Wana we agûkinya, antû babu bamûringanga kîongo na bamûrûthîra mantû maathûûku.

⁵Mwene mûnda agûtûma ûngî, antû babu bamûûraga. Mwene mûnda aatûma bangî baingî. Na bara aatûmaga antû babu ibaabaturaga kana bakaûraga.

⁶Mwene mûnda aatigwa na muntû ûmwe ûra agîtûma. N'we aarî mwana wake ûra eendeete mûno! Amûtûma arî wa mûthia, aiyî antû babu bakamûtîîya n'ûntû aarî mwana wake.

⁷“Antû babu bakwona mwana wa mwene mûnda beerana, ‘Ûyû n'we mwene rûgai. Tûmûûrageeni kaingo rûgai rûtuîka rwetû!’

⁸Antû babu bamûgwata bamûûraga, baagera kiimba ome ya mûnda.”

⁹Yiesû abaûria, “Bûrîthûgaania mwene mûnda akaarûtha ata?” Yiesû abeera, “Akaathi athirie antû babu, akomborithie antû bangî mûnda wake.

¹⁰Anga bûtaathooma bûra kwandîkîîtwe *Maandîkooni Maatheru? ‘Iiga rîra rîongwa aaki baaregire, îîndî i rîo rîtuîkîîte rîa gîtûmi mûno.

¹¹I Mwathani atûmîîte ûntû bûbu bûkarîka, na tûbuonaga bûrî bwa magegania.’ ”

¹²*Athînjîri babu ba Ngai, aarimû ba watho, na akûrû bakwîgua ûgu ibaamenyire Yiesû i bo aatemagia. Kwoogu baanjîîria gûcûa bûra bamûgwata, îndî baakuthûka kîrîndî. Baarekana n'we baathi.

¹³*Abarisai bamwe na bamwe ba bara baarî ba Eronde ibaatûmîîtwe kûgeria gûtega Yiesû na mîgambo yake.

¹⁴Bakûûya kîrî Yiesû, bamwîra, “Mwarimû, itwiyî ûrî mwîtîgua na ûtitindanagîra na mathûgaania ma antû. Ûtiendagîîra bamwe ûmena bara bangî, na ûrutanaga bûra bungwa mantû ma Ngai makari. Twîre kana weegua itwagîrîtwe tûrûngaga ûgooti kîrî Kaisaarî kana tûtiagîrîtwe. Tûrûngage kana tûtikaarûngage?”

¹⁵Yiesû naiyî ibeebuithagia. Abaûria, “I kî n'ûntû bûgûntega? Ûra arî na ciringi tanareete yo.”

¹⁶Bamûnenkera. Yiesû abaûria, “Ûthiû bûbû i bwa ûû? Na riîtwa rîrî i rîa ûû?” Bamûcookeria bamwîra, “Bionthe i bia Kaisaarî.”

¹⁷Yiesû abeera, “Nenkagîraani Kaisaarî into biake. Na Ngai n'we mûnenkagîreeni bira birî biake.” Baarigara mûno n'îcookio rîru.

¹⁸Asandukai bamwe baathi kîrî Yiesû. Na wîtîgio bwa Asandukai n'atî, gûtiûmbîka muntû ûmûkuû ariûka. Bakûthi beera Yiesû,

¹⁹“Mwarimû, Musa aatwandîkîîre watho atwîra, ‘Muntû akagûra mûka îndî agakua mbere ya bagîa na kaana, mûruagina nabatîîrue athûkia mûka ûyu aciarîra mûruagina mbeû.’

²⁰Kwa ngerekano, kagiita kamwe ikwarî na nthaka mûgwanja cia muntû ûmwe. Ûra aarî mûkûrû akûgûrana aakua atatigîîte mbeû.

²¹Ûra aamûkinyîîte mûgongo aathûkia mûka ûyu. Îndî kinya we aakua atakûrî gûtiga mbeû. Wa bathatû akûthûkia mûka ûyu, wana we aakua atakûrî gûtiga mbeû.

²²Bonthe barî mûgwanja baathûkia mûka ûyu wabagîkuyaga batagûtiga mbeû, mwanka mûka n'we aaya gûkua mûthiani.”

²³Asandukai babu baûria Yiesû, “Îîndî rîra bara bonthe baakuire bakaariûkua rî, mûka ûyu agaatuîka wa ûû, n'ûntû ingî nthaka inu cionthe irî mûgwanja iciamûgûrîîte?”

²⁴Yiesû abacookeria abeera, “Biû bûbîtîîtie mûno n'ûntû bûtiiyî *Maandîko Maatheru na bûtiiyî Ngai arî inya.

²⁵Rîra antû bakaariûka batiigûrana kana bagûrwa. Bagaakara ta araîka ba îgûrû.

²⁶Mantû ma kûriûkua gwa antû baakuû na mo rî, ka bûtaathooma bûra Musa aandîkîîte bantû ara agweteete mantû ma gakando kara gaakanaga mwanki? Bantû agu kwandîkîîtwe, Ngai aariirie na Musa amwîra, ‘Ndî Ngai wa Îburaîmu, Isaka na Njakubu.’

²⁷We ti Ngai wa bara bakuû. I Ngai wa bara barî mwoyo. Biû bûbîtîîtie mûno.”

²⁸Mwarimû ûmwe wa watho akwîgua Yiesû eeyana îcookio rîega, amûûria, “I yathana rîrîkû rîrî gîtûmi nkûrûki ya maathana mara mangî?”

²⁹Yiesû amwîra, “I rîrî, ‘Thikîîria, Isiraeri, Mwathani Ngai wenu n'we Mwathani wenka.

³⁰Enda Mwathani Ngai waku na nkoro yaku yonthe, na mwoyo waku unthe, na mathûgaania maaku monthe, na inya yaku yonthe.’

³¹Na yathana rîa maîrî na rîo, i rîrî, ‘Enda mûtûûri waku ta bûra wîbendeete.’ Gûtirî yathana rîngî rîrî gîtûmi nkûrûki ya mama marî maîrî.”

³²Mwarimû ûyu wa watho eera Yiesû, “Rîru n'îcookio rîega mûno, mwarimû. N'ûmma kuuga ûgu wauga. Atî, Ngai n'we Mwathani wenka na gûtirî ûngî.

³³Na n'ûmma kuuga muntû nabatîîrue eenda Ngai na nkoro yake yonthe, na mathûgaania maake monthe, na inya yake yonthe. Na atî muntû nabatîîrue eenda mutûûri wake ta bûra eebendeete. Bu maathana mamu marî gîtûmi nkûrûki ya kinya kûrutîra Ngai kîgongwana.”

³⁴Yiesû oona mwarimû ûyu naaragia na ûûme. Amwîra, “Ûtirî kûraaya mûno na ûnene bwa Ngai.” Gûtirî ûngî aûmîîria kûûria Yiesû kîûria kaîrî.

³⁵Yiesû akîrutanaga nyomba ya Ngai, aûria, “N'ata aarimû ba watho baûmba kuuga Kîrîstû i Mwana wa Ndaundi?

³⁶Na Ndaundi we wengwa akîaragia kwa inya ya Kîrundu Ûmûtheru augire, ‘Mwathani Ngai neerire Mwathani wakwa, “Kara nthî rûteere rwakwa rwa ûrîo, mwanka ntuîkithie anthû baaku ûkinyo bwa magûrû maaku.” ’

³⁷Ûkaaya kwîgua Ndaundi we wengwa arîmwîta ‘Mwathani’ rî, n'ata îîndî Kîrîstû aûmba gûtuîka mwana wake?” Kîrîndî ikîarî agu kiingî mûno kîthikîîrîîtie Yiesû gîkeneete.

³⁸Yiesû aarutana antû abeera, “Îmenyeereeni kîrî aarimû ba watho. Beendaga kûthi beekîrîte nguo indaaya na gûkeethagua n'antû na gîtîîyo baarîîkana na bo.

³⁹Rîra barî *masinagoogiini beendaga gûkara itîîni bia mbere bia gîtîîyo. Na baathi biathooni beendaga gûkara ara arî gîtîîyo.

⁴⁰Beenagîîria ntigwa bakairîîra into. Na rîra bakûromba, beendaga kûromba maromba maaraaya bakîenda antû boona. Îgamba rîao ûkeegua rîrî rîthûûku nkûrûki.”

⁴¹Yiesû naakari akubî na îthandûkû rîra rîethîranagîrua biewa nyomba ya Ngai akîonaga bûra antû baarutaga mbia. Baingî ba bara baarî itonga baaruta mbia inyingî.

⁴²Ntigwa îmwe nkîa yaya, yaruta tûcerecere twîrî.

⁴³Yiesû eera arutwa baake, “N'amma ga nkûbwîra, ntigwa îno nkîa îkûruta nkûrûki ya bara bangî bonthe.

⁴⁴N'ûntû bara bangî bonthe baaruta bûra barî na cio. Îndî ntigwa îno yo, amwe na ûkîa bwa yo yaruta kîonthe kîra îkwîgwetie.”