Read tharaka MAARIKO 13 Bible Online

MAARIKO 13 - tharaka bible

MAARIKO 13

¹Yiesû akiumagarûka nyomba ya Ngai, ûmwe wa arutwa baake amwîra, “Mwarimû, taraitha wone maiga ma mwako ûyû bûra marî mathongi!”

²Yiesû amwîra, “Nûkwona mwako ûyû mûnene ûûgû? Gûtirî iiga rîgaatigwa îgûrû ya rîra rîngî. Monthe i makaanyagaarua.”

³Yiesû na arutwa baake baathi bwa Karîma ka Mîceituuni. Yiesû aakara nthî araithîîte bwa nyomba ya Ngai. Petûrû, Njakubu, Njoana na Enderea beera Yiesû barî bonka,

⁴“Tatwîre irî mantû mamu magaakarîka. Na i mbi îkoonania monthe marî akubî gûkarîka?”

⁵Yiesû abeera, “Îmenyagîîreeni bûtikeeneerue i muntû.

⁶Antû baingî bakaaya bagîtûmagîra riîtwa rîakwa bakauga i bo Kîrîstû, na bagaata antû baingî.

⁷Bweegua ndûa ikîrûîwa kana ikîgwetwa, bûtikaamake. Mantû ta mamu nwa mwanka matuîkîke, îndî ûyu t'uu mûthiro.

⁸Nthîgûrû îkaarûa na îra îngî, na ûnene bûrûe na bûra bûngî. Nthîgûrû îkainaina gûntû na gûntû, na mayûûra makaaya. Mantû mamu monthe i ta rûgakaî rwa mbere rwa mwekûrû arî akubî kûgîa na mwana.

⁹“Îmenyagîreeni. Bûkairwa kootiini na bûturîrwe *masinagoogiini. Na n'ûntû bwakwa, bûkairwa kîrî mangabana na anene bûrî akûûyî.

¹⁰Na mbere ya mûthia ungwa ûkinya, ntheto îmbega nwa mwanka ûkeegua îgûtûmîîrua kîrî mîgongo yonthe.

¹¹Bwagwatwa bwairwa kootiini, bûtikaathîîne bûgîcûa bûra bûkauga. Kagiita gaakinya bûkeewa mîgambo ya kuuga.

¹²Muntû agaakunyanagîra mûruagina akaûragwa n'anene. Mwana agaakunyanagîrwa n'îthe, na aana bakaang'entera aciari baao babaûragithie.

¹³Bûkaamenwa n'antû bonthe n'ûntû bwakwa. Îndî ûra ûkaûmîîria mwanka mûthia akoonokua.”

¹⁴Yiesû auga, “Rîra bûkoona kîra kîthûûku mûno, kîra Ngai athûîre, kîrûngi ara gîtabatîîrue wîgua kîrî, (mûthoomi tanataûre), bara ûkeegua barî Njundea ibakuthûke bathi bwa irîma.

¹⁵Ûra akeegua arî rûûgûrû rwa nyomba, eendama atikaagerie kûthara nwa mbi.

¹⁶Ûra akeegua arî mûndaani atigaakare kûthûkia nguo yake ara agûtûûgîîrîîtie.

¹⁷Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku!

¹⁸Îrombaani ûtikeegue kûrî îgiita rîa mpîo kagiita gaku.

¹⁹N'ûntû kînyamaara kîra ûkeegua kîrî oogo i kîra gîtooneka nthîgûrû îno kaîrî kuuma îkûûmbwa. Na gûtirî kîngî ta kîo gîkooneka gûkû kaîrî.

²⁰Ûkeegua ti bûra Mwathani akubîîtie ntugû inu, gûtirî muntû oonoka. Aikubîîtie n'ûntû bwa bara athuurîîte.

²¹Kwoogu ûra akaabwîra, ‘N'ûyû Kîrîstû!’, kana ‘N'ûûra!’, bûtikaamwîtîgie.

²²N'ûntû Kîrîstû ba ûrongo na iroria bia ûrongo ûkeegua barî ku. Na bakaaringaga biama na kwonania magegania kaingo weegua gûkaûmbîka beeneeria kinya bara Ngai athuurîîte.

²³Îndî biû îmenyeereeni. Nkûbwîra mantû monthe mbere ya makarîka.”

²⁴Yiesû aathi na mbere auga, “Na nyuma ya kînyamaara gîku kînene ûgu, riûa rîkaaruma mwindu na mweri ûtige kûtharara.

²⁵Nthata igwe kuuma îgûrû, na mainya ma îgûrû mainainue.

²⁶Rîru i rîo antû bakoona Mwana wa Muntû aayîîte na matu, arî na inya înene na mwago.

²⁷Atûme araîka bathi nteere cionthe cia nthîgûrû beethîranie bara bathuure nthîgûrû yonthe.”

²⁸Yiesû auga, “Tathûkiani ngerekano ya mûkûyû bwîrutane na uu. Rîra mpong'i cia uu cianakaga, mathangû makaanjîîria kûririma, ibûmenyaga i thaano îrî akubî.

²⁹Ûgu i ta bu ûkeegua kûrî rîra bûkoona mantû mamu magîkarîka. Bwona bûmenye Mwana wa Muntû arî akubî mûno kûûya.

³⁰Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru.

³¹Îgûrû na nthîgûrû bikaathira îndî biugo biakwa bitikooro bithira.”

³²Yiesû auga, “Gûtirî muntû aiyî ntugû kana îthaa. Gûtirî mûraîka arî îgûrû aiyî na wana Mwana atiiyî. I Baaba wenka aiyî.

³³Kwoogu îmenyagîreeni na îcûûbagîreeni n'ûntû bûtiiyî irî ûkeegua kûrî.

³⁴Gûkari ta muntû arî na rûgendo, na mbere ya athi agatiga eera woora mûruti ngûgî wake bûra akaarûtha. Na akeera kinya mûkaria mûrango akarage araithîrîte.

³⁵Kwoogu îmenyagîîreeni n'ûntû bûtiiyî rîra mwene mûciî agaacooka. Bûtiiyî weegua akaaya ûgoro, ûtugû gatî kanene, rware rûgîtema, kana riûa rîkiuma.

³⁶Ûkeegua bûteecûûbîrîte, aûmba kûûya rîra bûtakûmwîrîgîîra akeethîra bûmaami toro.

³⁷Ûgu nkûbwîra i bu mbîîraga antû. Îmenyagîîreeni!”