Read tharaka MAARIKO 14 Bible Online

MAARIKO 14 - tharaka bible

MAARIKO 14

¹Ciatigeere ntugû ciîrî *Pasaka îkinya. Pasaka yarî ntugû ya mbere ya *kîatho kîa mîgaate îtaimbithîîtue. *Athînjîri bara banene ba Ngai na aarimû ba watho ibaacûaga bûra Yiesû akîgwatwa na ûûme bakamûûragithia.

²Îndî baugîîte batimûgwata ntugû ya kîatho n'ûntû boonaga bamûgwata antû ibagaûkia gîtuma.

³Ntugû îmwe Yiesû arî Bethania gwa Simioni ûra aayîîtue mûtigiri, mûka ûmwe aaya bakîrîa irio. Mûka ûyu naarî na cûûba yarûthîîtwe na iiga rîa goro yûyûri mîtaa ya goro mûno ya matî meetagwa nandi îtaunganîîtue na gîntû kîngî. Akûûya aarebûra cûûba înu mûromooni ara yakunîkîîtwe, oonoreeria Yiesû mîtaa înu kîongo.

⁴Bamwe ba bara baarî agu bakwona ûgu mûka ûyu aarûthire baathûûra n'we. Beerana, “N'ya kî mîtaa îno mûka ûyû eenyangia?

⁵Îîndî makîendiirue matikiuma mbia inyingî mûno igana îrîi rîa muntû wa kîbaarûa rîa mwanka unthe, mbia inu ikagaîrwa nkîa?”

⁶Yiesû abeera, “Rekanaani n'we! I mbi bûkûmûûria? Akûrûtha ûntû bwega.

⁷Gûtirî rîo nkîa ikaathira. Kwoogu nwa bwiteethie rîonthe rîra bûkwenda. Îndî niû îgiita irîengeerie gûkinya tûtigane.

⁸Bûra mûka ûyû aarûtha nwa bu bunka akîûmba kûrûtha. Agwaka mwîrî wakwa mîtaa, authuuranîra kûthikwa.

⁹Na mma ga nkûbwîra, bantû onthe ara ntheto îmbega îgaatûmîîrua gûkû nthîgûrû, ûûgû mûka ûyû aarûtha bûkeeranagwa n'ûntû bwa kûmûririkana.”

¹⁰Ûmwe wa arutwa bara îkûmi na baîrî ba Yiesû, ûra eetagwa Njundas Mûcikariota, aathi kîrî *athînjîri bara banene ba Ngai kûbangania na bo bûra akaabateetheeria kûgwata Yiesû.

¹¹Athînjîri babu ba Ngai baakena i mûbango ûyu. Beera Njundas bakamwaa mbia. Njundas aanjîîria gûcûa kaanya keega ga gûkunyanîra Yiesû.

¹²Ntugû ya mbere yakinya ya *kîatho kîa mîgaate îtaimbithîîtue, i rîo kagondu ga *Pasaka kaûragagwa. Arutwa ba Yiesû bamûûria, “I na kû ûkwenda tûthi gûkûthuuranîra Pasaka?”

¹³Yiesû aatûma arutwa baîrî. Abeera, “Îthiini taûni. Na bwakinya, bûthingate muntû ûra bûkaarîîkana n'we akamatîîte nyûngû îrî na rûûyî,

¹⁴mwanka nyomba îra akaathûngîra. Aathûngîra, bûthûnganîrie n'we ku bwîre mwene nyomba, ‘Mwarimû auga ûtwonie kanyomba kara akaarîîra kîatho gîa Pasaka na arutwa baake.’

¹⁵Muntû ûyu, mwene nyomba, akabwonia kanyomba kaaneene ngorobaani kaathuuranîre kaigwa kîra gîntû. Gûku i ku bûkaathuuranîra kîatho.”

¹⁶Arutwa babu baathi. Bakûthi mantû monthe maakarîka wabûra Yiesû aabeerîîte, baathuuranîra kîatho gîa Pasaka.

¹⁷Ûgoro bûgûkinya, Yiesû aathi nyomba înu na arutwa baake bara îkûmi na baîrî.

¹⁸Bakîrîyaga, Yiesû abeera, “Na mma ga nkûbwîra, ûmwe wenu akambîndîra njûri, ûmwe kîrî biû bûkûrîyanîra naani îîndî tûrî aaga.”

¹⁹Arutwa bakwîgua ûgu baagwatwa i kîeba. Baanjîîria kwîra Yiesû woomwe kwa ûmwe, “Ti niû, i niû?”

²⁰Yiesû abeera, “N'ûmwe kîrî biû bûrî îkûmi na baîrî, ûra tûgûtombekanîria n'we mûgaate mbakûriini.

²¹Mwana wa Muntû agaakua, wata bûra kwandîkîîtwe *Maandîkooni Maatheru. Îndî ûra akaamûkunyanîra kaingo aûragwa, gîku na ti kînyamaara akoona. I kaaba atagîciarirwe!”

²²Bakîrîyaga, Yiesû aathûkia mûgaate, aacookeria Ngai nkaatho. Aung'enyûrania, aanenkera arutwa baake. Abeera, “Thûkiani, ûyû i mwîrî wakwa.”

²³Yiesû aathûkia gîkombe na kîo. Aacookeria Ngai nkaatho, aanenkera arutwa baake, bonthe bakundana kîra kîarî ku.

²⁴Yiesû abeera, “Îno i nthakame yakwa îra îgeetûûrwa n'ûntû bwa antû baingî, îrî rwano rwa kîrîîkanîro kîîyerû.

²⁵Na mma ga nkûbwîra, ntiinyua ndibei îno ya matunda ma mûcabiibû kaîrî, tatiga rîra nkaamînyua îrî înjerû ûneneeni bwa Ngai.”

²⁶Baina rwîmbo. Rwîmbo rûkûthira bauma baathi bwa Karîma ka Mîceituuni.

²⁷Yiesû eera arutwa baake, “Wîtîgio bwenu bwinthe bûkabûringa nthî wata bûra kwandîkîîtwe *Maandîkooni Maatheru atî, ‘Nkaaringa mûrîîthi mmûûrage, ng'ondu inyagaaranie.’

²⁸Îndî ndariûka nkaathi Gariiri mbere yenu.”

²⁹Petûrû amwîra, “Wîtîgio bwa baba bangî bonthe nwa bûbaringe nthî, îndî ti niû!”

³⁰Yiesû amwîra, “Na mma ga ngûkwîra, ûtugû bûbû bwa îmunthî mbere ya ngûkû îkurura maita maîrî, ûgankaana maita mathatû.”

³¹Îndî Petûrû aaremeeria na kwîra Yiesû, “Wana weegua igûgaatuîka mbûragwe ûkîûragwa, ntigûkaana!” Arutwa bara bangî wana bo bonthe bauga wata Petûrû woogu.

³²Yiesû na arutwa baake baathi bantû eetagwa Ngethisemane. Yiesû eera arutwa baake, “Karaani nthî aaga nthi nkarombe.”

³³Yiesû aathûkia Petûrû, Njakubu na Njoana, aathi na bo. Yiesû aanjîîria kûgwatwa i kîeba na kwîgua atarî ûmûganîre.

³⁴Eera Petûrû, Njakubu na Njoana, “Nkorooni yakwa inkwîgua ndî na kwîthikîîra kûûnene mûno. Ndîîgua taka gûkaambûraga. Karagaani aaga na bûtikaamaame.”

³⁵Yiesû aathiyathiyanga gataaria kuuma agu baarî. Eeturania nthî, aaromba akîûragia kana weegua gûkîûmbîka atanyamaarue kagiitaani gaku.

³⁶Aarombire auga, “Abba, Baaba! Woû gûtirî ûntû bûkûrema. Ruta gîkombe gîkî gîa kûnyamaarua mbere yakwa. Îndî rûtha bûra ûkwenda, ti bûra nkwenda.”

³⁷Yiesû agûcooka kîrî arutwa bara bathatû eethîra ibamaamire. Eeta Petûrû, “Simioni!” Amwîra, “Koomaamire ingî? Ûtiraûmba gûkara ûtamaami nwa îthaa rîmwe?”

³⁸Abeera, “Bûtikaamaame karagaani bûkîrombaga bwewa inya ya gûcinda magerio. Nkoro nîkwenda i mwîrî ûkûremwa.”

³⁹Yiesû aacooka kûromba kaîrî akiugaga mîgambo weera.

⁴⁰Agûcooka kîrî arutwa bara eethîra ibamaamire kaîrî n'ûntû ibaang'ontaga mûno. Arutwa babu baaga bwa kûmwîra.

⁴¹Yiesû akuuma kûromba rîa mathatû, abeera, “Wana îîndî nwa bûmaami bûnogokeete? N'ûgu îîndî! Îgiita rîgûkinya rîa Mwana wa Muntû kûnenkanîrwa kîrî antû ba meeyia.

⁴²Ûkîîraani tûthi. Eneeni, ûra aankunyanîrîte n'ûyu aayîîte!”

⁴³Yiesû atirarîîkia kuuga bûra augaga, nthûti îmwe Njundas, ûmwe wa arutwa bara baake îkûmi na baîrî aaya na mûkondo wa antû bakamatîîte ndûyiû na ncûgûma. Antû babu baatûmîîtwe *n'athînjîri bara banene ba Ngai, aarimû ba watho na akûrû ba Kîîyaundi.

⁴⁴Njundas naarî akûbaathîîra bûra akaaboonangia Yiesû. Aabeerîîte, “Ûra ngaacunca, bûmenye ûyu n'we Yiesû. Bûmûgwate bûthi n'we bûmûkabîrîte bwega.”

⁴⁵Njundas agûkinya ûgu, aathi kîrî Yiesû amwîta, “Mwarimû!” Amûcunca.

⁴⁶Antû babu baakamatîîte ndûyiû na ncûgûma baagwata Yiesû.

⁴⁷Ûmwe wa arutwa ba Yiesû ûra aarî akubî n'we aacomoora rûyiû. Aatema mûruti ngûgî ûmwe wa mûthînjîri ûra mûnene wa Ngai, amûgiita gûtû.

⁴⁸Yiesû abaûria, “Ka ndî mûtunyani n'ûntû bwaya kûngwata na ndûyiû na ncûgûma?

⁴⁹Anga ntugû cionthe tûtiratindaga naabi nyomba ya Ngai nkîrutanaga na bûtirangwataga? Îndî ingî gwakarîka ûgu kwingia *Maandîko Maatheru.”

⁵⁰Arutwa ba Yiesû bamûtoorooka bonthe, baugia rwîro baathi.

⁵¹Mûthaka ûmwe eegererete cuka akî mwîrî naathingatîîte Yiesû. Wana we aagwatwa n'antû babu baagwete Yiesû,

⁵²îndî cuka yatharûka augia, aathi arî ûtheri.

⁵³Antû babu baira Yiesû kwa mûthînjîri ûra mûnene wa Ngai. Gûku i ku *athînjîri bara bangî banene ba Ngai bonthe, akûrû, na aarimû ba watho beethîreene.

⁵⁴Petûrû abathingata arî gataaria baathûngîra gûku kwa mûthînjîri ûra mûnene wa Ngai. Petûrû aakara agu ome agîotaga mwanki na aruti ngûgî bara baarî oogo.

⁵⁵Athînjîri babu banene ba Ngai na njûri ya Ayaundi yonthe baacûa ûntû bûûthûûku bwa kuuga Yiesû ararûtha kaingo bamûtuîra kûûragwa, îndî baaga.

⁵⁶Akûûyî baingî baatuîrîîra Yiesû, îndî ûkûûyî bwao bûtaagwatanagîra.

⁵⁷Antû bamwe baarûngama baaria ûrongo bauga,

⁵⁸“Tweegiirue muntû ûyû akiuga akoomborania nyomba ya Ngai îra yakîîtwe n'antû, aake îngî îtarî ya gwakwa n'antû na ntugû ithatû.”

⁵⁹Îndî amwe na ûgu, ûkûûyî bwao bûtaagwatanagîra.

⁶⁰Mûthînjîri ûra mûnene wa Ngai aarûngama mbere yao. Aûria Yiesû, “N'ata ûkuuga woû? Gûtirî bu ûkuuga îgûrû rîa mantû mama antû baba bakuuga nûrûthîîte?”

⁶¹Yiesû ataaria amûcookeria kîûria gîake. Mûthînjîri ûyu mûnene wa Ngai aûria Yiesû kîûria kîngî. Amûûria, “I woû Kîrîstû, Mwana wa Ngai ûra mûthaarime?”

⁶²Yiesû auga, “Yîî, i niû. Na îgiita rîkaaya bûkoona Mwana wa Muntû akari rûteere rwa ûrîo rwa Ngai, mwene inya. Na bûkoona aayîîte na matu, kuuma îgûrû!”

⁶³Mûthînjîri ûra mûnene wa Ngai aatembûra nguo yake wengwa îra eekîrîte.[10] Auga, “N'ûgu îîndî. Gûtirî ûkûûyî bûngî tûkwenda!

⁶⁴Bwinthe bûkwîgua bûra auga akîîganaania na Ngai. Mbîîraani îîndî bûra bûgûtua.” Antû bonthe bauga Yiesû naabîtîîtie, na kwoogu aagîrîtwe aûragwa.

⁶⁵Antû bamwe baanjîîria gûtuîra Yiesû mata na kûmûkunîka meetho bakamûringa bakamwîra, “Taroria [ûtwîre ûra akûringa]!”[11] Acikaarî baathûkia Yiesû baathi n'we bakîmûringangaga.

⁶⁶Mwarî ûmwe, mûruti ngûgî wa mûthînjîri ûra mûnene wa Ngai aakûrûkîîra agu Petûrû baakari ome bagîotaga mwanki.

⁶⁷Mwarî ûyu akwona Petûrû, amûcûûba kii. Amwîra, “Wana woû ibûkûrî na Yiesû wa kuuma Nasareethi.”

⁶⁸Petûrû aakaana auga, “Niû ntiyî na ntikûmenya bûra ûkuuga.” Auma aarûngama mwîrîgaani. [Ngûkû yakurura.][12]

⁶⁹Mwarî ûyu akwona Petûrû aathi aarûngama mwîrîgaani, eera bara baarûngi akubî n'we, “Muntû ûûra n'ûmwe wa bara baayaniirie na Yiesû.”

⁷⁰Îndî Petûrû aakaana kaîrî. Nyuma ya kagiita gaakai, antû bamwe baarûngi akubî na Petûrû bamwîra, “I mma ûrî ûmwe wa athingati ba Yiesû n'ûntû ûrî wa kuuma Gariiri.”

⁷¹Petûrû eerîrîka wengwa, aathiîtia auga, “Ntiyî muntû ûyû bûkûngwetera!”

⁷²Warîru, ngûkû yakurura rîa maîrî. Rîru i rîo Petûrû aaririkanire bûra Yiesû aamwîrîîte atî, “Mbere ya ngûkû îkurura maita maîrî ûgankaana maita mathatû.” Petûrû aathirania kûrû, aanjîîria kûrîra.