Read tharaka MAARIKO 16 Bible Online

MAARIKO 16 - tharaka bible

MAARIKO 16

¹Rûûni rwa ntugû ya *Sabatû, Maria Mûmagindari, Maria gina wa Njakubu na Saroome baagûra mîtaa bathi gwaka kiimba kîa Yiesû.

²Kûrî mûthenya wa mbere wa kiumia, eekûrû babu baaraûka kuuma rûûkîîrî mûno riûa rîkiuma, baathi nthikooni îra Yiesû aathikîîtwe.

³Bathiîte baûranagia, “N'ûû agaatwingiritîria iiga rîra rîgana ûra riume mûromooni wa nthiko?”

⁴Eekûrû babu bagûkinya boona iiga rîra irîraingiritiirue rîarutarutwa oogo na kûnenea kwene.

⁵Bakûthûngîra gûku nthikooni beethîra mûthaka akari nthî rûteere rwa ûrîo eekîrîte nguo îndaaya înjerû. Baamaka.

⁶Mûthaka ûyu abeera, “Tigaani kûmaka. Inkûmenya i Yiesû wa kuuma Nasareethi ûra araambîîtwe mûtharabaani bûgûcûa. Nariûkire, atirî gûkû. Raithaani bwone, aaga noogo kiimba gîake kîraigîîtwe.

⁷Cookaani bûmenyithie arutwa baake akûthiyaga Gariiri. Baathi noogo bakamwona wata bûra aabeerire. Bwîre Petûrû ûgu.”

⁸Eekûrû babu ibainainaga n'ûguaya. Baumagarûka baugia rwîro. Gûtirî we beera ûgu gwakarîkire n'ûntû bwa kîmako kîra kîabagwete.

⁹Yiesû akûriûka rûkîîrî mûthenya wa mbere wa kiumia, eebonaniirie mbere kîrî Maria Mûmagindari ûra agu mbereeni eengatîîtie irundu biithûûku mûgwanja biauma kîrî we.

¹⁰Maria Mûmagindari akwona Yiesû aathi eera athingati baake. Arutwa ibaarî na kîeba kîînene mûno. Ibaarîraga.

¹¹Maria abeera, “Yiesû arî mwoyo, nkûmwona.” Îndî athingati ba Yiesû baarega kûmwîtîgia.

¹²Nyumaani, Yiesû eebonania kîrî arutwa baake baîrî bathiîte bwa ntûûra. Oonekaga agarûkîîte aakara mwanya na bûra aakari mbere ya akua.

¹³Arutwa babu baacooka beera bara bangî ûgu boona. Îndî wana rîo bateetîgia.

¹⁴Kaîrî nyumaani arutwa bakîrîyaga, Yiesû eebonania kîrî bo barî îkûmi na ûmwe. Abatheteria kwaga wîtîgio n'ûntû bakwîrwa akûriûka i bara baamwonaga, ibaûmiirie biongo baarega gwîtîgia.

¹⁵Yiesû abeera, “Îthiini nthîgûrû yonthe bûtûmîîrie ntheto îmbega kîrî antû bonthe.

¹⁶Ûra ageetîgia abaatithue, akoonokua. Îndî ûra atagîîtîgia akaagiitîrwa îgamba bûûthûûku mûno.

¹⁷Bara bageetîgia, kwa riîtwa rîakwa bakeewa inya ya kwîngatia irundu biithûûku bikauma kîrî antû. Na bakaaragia na nthiomi ingeni.

¹⁸Bakaaya kûgwata njoka, kana bakanyua cûmû, gûtirî bu bagaakara. Bakaigagîîra aayie njara bakoora.”

¹⁹Mwathani Yiesû akûrîîkia kwîra arutwa baake ûgu, eetithua airwa îgûrû, aakara rûteere rwa ûrîo rwa Ngai.

²⁰Arutwa baake baathi gûntû kunthe baatûmîîria antû ntheto îmbega, kuumania na ûteethio bwa Mwathani. Na Mwathani noonaniirie ntheto îmbega îra arutwa baake baatûmagîîria n'ya mma kûringana na biama bira baaringaga.[16]