Read tharaka MAARIKO 2 Bible Online

MAARIKO 2 - tharaka bible

MAARIKO 2

¹Nyuma ya ntugû inkai, Yiesû aacooka Kaperinaumu kaîrî. Antû bakûmenya naarî gûku,

²beethîrana kwa wingî mûno mûrangooni wa nyomba înu Yiesû aarî kwaga kinya webero. Yiesû akîbatûmagîîria kiugo,

³antû bana baaya bakamatîîte muntû aarî kîonje bamûnintîîte kîrî Yiesû.

⁴N'ûntû bwa antû kwingîa, bataûmba gûkinyithia kîonje gîku ara Yiesû aarî. Baatwa baaromora rûûgûrû rwa nyomba înu batarithîîrîîtie ara Yiesû aarî. Bakûromora, beendamîîria kîonje gîku oogo wakîrî mamaamîrooni.

⁵Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”

⁶Aarimû bamwe ba watho baakari agu bakwîgua ûgu, baatua kûthûgaania na nkoro beebûûria,

⁷“N'ata muntû ûyû akwenda kwonania? Nakwîthûkia taka arî Ngai? Anga ti Ngai wenka aûmba kûrekera muntû meeyia?”

⁸Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu?

⁹I bûrîkû bûûthû? I kwîra kîonje gîkî, ‘Ûkûrekerwa meeyia maaku,’ kana i gûkîîra ‘Ûkîîra ûkamate mamaamîro maaku ûthi’?

¹⁰Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku,

¹¹“Ûkîîra ûkamate mamaamîro maaku wînûke.”

¹²Nthûti weenu kîonje gîku gîaûkîîra bacûûbîîte, gîakamata mamaamîro kîenûka. Antû bakwona ûgu baarigara mûno. Baakumia Ngai bakiugaga, “Tûtoona ûûgû kaîrî!”

¹³Yiesû aacooka rûteere rwa îria rîa Gariiri kaîrî. Kîrîndî gîa antû kîathi kîrî we, Yiesû abarutana.

¹⁴Akuuma agu, Yiesû oona muntû eetagwa Raawî akîrûngithagia ûgooti, akari nthî ara aakaraga. Îthe eetagwa Arubayo. Yiesû amwîra, “Nthingata!” Raawî aûkîîra amûthingata.

¹⁵Nyumaani Raawî eeta Yiesû na arutwa baake gwake. Arûngithia ûgooti baingî na eeyia baaya bathingatîîte Yiesû, baanjîîria kûrîyanîra n'we.

¹⁶*Abarisai bamwe baarî aarimû ba watho bakwona Yiesû akîrûtha ûgu, baûria arutwa baake, “I kî gîgûtûma arîyanîra na arûngithia ûgooti na eeyia?”

¹⁷Yiesû akwîgua aarimû babu ba watho bakîûria ûgu, abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa. Ntaaya gwîta bara baagîru, ndaayire gwîta bara eeyia kaingo beerira.”

¹⁸Kagiita kamwe athingati ba Njoana Mûbaatithania na ba *Abarisai ibaatîîrîrîte kûrîa irio. Antû bamwe baathi kîrî Yiesû bamûûria, “I kî n'ûntû arutwa ba Njoana Mûbaatithania na ba Abarisai bo batîîragîra kûrîa irio n'ûntû bwa maromba, îndî baaku batitîîragîra?”

¹⁹Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki? Batitîîrîra kûrîa ntugû înu mûgûrani arî na wiki.

²⁰Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.

²¹“Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa gîtaame gîku igîkaamîkuuyia îgendeerie.

²²Na kaîrî, gûtirî we eekagîra ûkî bwa kûrugwa warîru nceemaani înkûrû, n'ûntû ibûgaatûûmûra nceema înu bûûre mana na nceema mbene. Ûkî bwa kûrugwa warîru bwîkagîrwa nceemaani îtarî nkûrû.”

²³Ntugû îmwe ya *Sabatû Yiesû na arutwa baake ibaakûrûkîîrîîte mîndaani. Bathiîte woogû, arutwa baake baanjîîria kûûrûûra ngano barîa.

²⁴*Abarisai bakwona bakîrûtha ûgu, beera Yiesû, “I mbi n'ûntû bakûrûtha bûra bûtabuîrîîte kûrûthwa ntugû ya Sabatû?”

²⁵Yiesû abeera, “Ka bûtaathooma bûra Ndaundi aarûthire akwîgua yûûra barî na bara baarî na bo?

²⁶Aathiire nyomba ya Ngai kagiita kara Abiatharû aarî mûthînjîri wa Ngai ûra mûnene, aarîa mîgaate îra mîtheru na aarûmia bara baarî na bo, na ibwiyî mîgaate înu itikîrûmwa i muntû ûngî tatiga athînjîri ba Ngai.”

²⁷Yiesû abeera, “Ntugû ya Sabatû îrî oogo n'ûntû bwa muntû, îndî muntû atirî oogo n'ûntû bwa ntugû ya Sabatû.

²⁸Kwoogu Mwana wa Muntû n'we Mwathi wa Sabatû.”