Read tharaka MAARIKO 3 Bible Online

MAARIKO 3 - tharaka bible

MAARIKO 3

¹Ntugû îngî Yiesû aathi *sinagoogiini kaîrî. Gûku sinagoogiini ikwarî na muntû oonjeete njara.

²Kûrî antû baarî gûku baaraithîîte boona kana Yiesû akooria muntû ûyu ntugû ya *Sabatû, boona ûntû bwa kûmûthitangîra.

³Yiesû eera muntû ûyu oonjeete njara, “Ncû ûrûngame aaga mbere.”

⁴Yiesû aûria antû, “*Watho bwîtîgîîrîîtie muntû arûtha bwega kana i bûûthûûku ntugû ya Sabatû? I kwonokia mwoyo kana i gûcuûraga?” Gûtirî muntû aaria.

⁵Yiesû aathiûrûûkia meetho athûûri i bo na akîîgagua arî na kîîthikîîro nkorooni n'ûntû bwa kûûmia biongo kwao. Eera muntû ûyu oonjeete njara, “Tambûrûkia njara yaku.” Muntû ûyu aatambûrûkia njara, na akûmîtambûrûkia yabua.

⁶Abarisai na antû ba kîama kîa Eronde bakwona ûgu bauma nja warîo. Baabanga mûbango wa kûûraga Yiesû.

⁷Yiesû akuuma gûku aathi na arutwa baake bwa îria. Antû baingî mûno bamûthingata. Baarî antû kuuma Gariiri, Njundea,

⁸Njerusaremu, Indumea, rûgongo rûra rûngî rwa muuro wa Njorondani, na akubî na taûni ya Turo na ya Sindoni. Antû babu baayîîte kîrî Yiesû n'ûntû bwa mantû mara beegîîtue arûthîîte.

⁹N'ûntû bwa antû kwingîa, Yiesû eera arutwa baake bamûreetere îtarû atûe kaingo atainyîkwa.

¹⁰Yiesû eethîranîîrwe kwa wingî ûgu i bara baarî baayie bakîgeria kûmûtongithia, n'ûntû iboonire ooria antû baingî.

¹¹Irundu biithûûku biamwonaga bikagwîthia bara baarî na bio agu mbere yake, bikauga na inya, “I woû Mwana wa Ngai!”

¹²Îndî Yiesû naabikaanagia mûno kûmuumbûra kîrî antû, biuga aarî ûû.

¹³Kagiita kamwe Yiesû aatûa kîrîmaani, eeta antû îkûmi na baîrî bara eendaga bamûteetheeria barî atûmwa baake. Aabathuurire bathiyanagia n'we na abatûmaga kûthi gûtûmîîria,

¹⁵abaa inya ya kwîngatia irundu biithûûku bikauma kîrî antû.

¹⁶Baarî Simioni ûra Yiesû eetire Petûrû,

¹⁷Njakubu na mûruagina Njoana, aana ba Cabendi bara Yiesû eetire Mboaneriges kana ‘Aana ba nkwa,’

¹⁸Enderea, Piripû, Bathoromayo, Mathayo, Tooma, Njakubu wa Arubayo, Thandayo, Simioni Mûkaanani,

¹⁹na Njundas Mûcikariota ûra aakunyanîîre Yiesû amûgwatithia.

²⁰Kagiita kamwe Yiesû akûthûngîra nyomba, kîrîndî gîa antû kaîrî kîamwîthîranîra aaga mwanya wa kwîgaagûra barî na arutwa baake.

²¹Antû ba mûciî wao bakwîgua ûgu bamûûyîra bakîthûgaanagia naumîîte nkoma.

²²Aarimû bamwe ba watho ba kuuma Njerusaremu bauga, “I Bericebuuri, mûnene wa irundu biithûûku, amûgwete. N'we amwete inya ya kwîngatia irundu biithûûku.”

²³Yiesû abeeta. Aatûmîra ngerekano abaûria, “N'ata Saitaani îîbingatangia îrî yo?”

²⁴Abeera, “Ûnene bûkaathûkana bûtitûûra.

²⁵Na antû ba mûciî ûmwe bakaathûkana mûciî ûyu ûtitûûra.

²⁶Kwoogu wana Saitaani akaathûkana wengwa agatua kwîrûa atiûmba gûtûûra, neethiria wengwa.

²⁷“Gûtirî muntû abunjia nyomba ya muntû arî na inya amûtunya into, nwanga akaamba kûmûthaîka. Rîru i rîo aûmba kûmûtunya into biake.

²⁸“Na mma ga nkûbwîra, antû nwa barekerwe meeyia maao monthe na mantû maathûûku monthe mara baaria îgûrû rîa Ngai.

²⁹Îndî muntû akaaria mantû maathûûku îgûrû rîa Kîrundu Ûmûtheru atirekerwa, n'ûntû meeyia mamu i ma tene na tene.”

³⁰Yiesû augire ûgu n'ûntû bwa bûra antû baugaga arî na kîrundu kîîthûûku.

³¹Gina na aruagina ba Yiesû baaya baarûngama ome ya nyomba înu Yiesû aarî. Baatûmana beetîrwa we.

³²Ikwarî na antû baingî baakari nthî bacerereete Yiesû. Bamwîra, “Nyûkwe na aruanyûkwe barî ome na ibakwenda gûkwona.”

³³Yiesû abaûria, “Taata na aruayia i ba ûû?”

³⁴Aacûûba bara baakari nthî agu bamûcerereete. Auga, “Baba i bo bataata na aruayia.

³⁵Ûra arûthaga bûra Ngai eendaga kûrûthwa n'we mûruayia, mwarayia kana taata.”