Read tharaka MAARIKO 5 Bible Online

MAARIKO 5 - tharaka bible

MAARIKO 5

¹Yiesû na arutwa baake baathi baakinya rûgongo rûra rûngî rwa îria, nthîgûrû ya Angeraca.

²Yiesû agûkinyûka îtarûûni ûgu, aarîîkana na muntû ûmwe aarî na kîrundu kîîthûûku aumîîte makurunguuni, kûra antû baakuû baathikagwa.

³Muntû ûyu aakaraga gûku makurunguuni mamu na antû ibaarî bakûnoga i kûmûthaîka kinya na nyororo agîtuîkagia.

⁴I maita maingî mûno oogagwa na nyororo magûrû na njara, îndî woogwa agaituîkangia ikagwa naara. Gûtirî muntû akîûmba kûmûmaarîîria.

⁵Mûthenya na ûtugû aakararaga naagu makurunguuni mamu na irîmaani akîringaga gîtuma, agîîtemangaga mwîrî wake na nthengeecû cia maiga.

⁶Muntû ûyu akwonera Yiesû kûûraaya, augia rwîro, aathi aagwa magûrûûni maake.

⁷Auga na inya, “N'ata ûkwenda naani, Yiesû, Mwana wa Ngai ûra atûûraga îgûrû mûno. Itû ngûkwereka kwa riîtwa rîa Ngai, menya ûnnyamaaria.”

⁸Muntû ûyu augire ûgu n'ûntû Yiesû naarî akwîra kîrundu gîku kîarî kîrî we kiume.

⁹Yiesû amûûria, “Wîtagwa ata?” Muntû ûyu amwîra, “Mbîtagwa ‘Mbûûtû,’ n'ûntû ntirî ninka tûrî mûkondo.”

¹⁰Kîrundu gîku gîakaîra Yiesû mûno gîkîmwîraga atigakîîngate kiuma gûntû gûku.

¹¹Akubî na bantû agu ikwarî na ngûrwe inyingî ciarîthîîtue kîrîmaani.

¹²Kîrundu gîku kîereka Yiesû kîamwîra, “Twîre tûthi ngûrweeni iira.”

¹³Yiesû agîîtîgîîria. Irundu bibu biauma kîrî muntû ûyu biathûngîra ngûrweni. Ngûrwe inu cionthe ciaugia ciîndamîîte na mpara, ciemina îriani ciaûra na rûûyî. Ciarî ngûrwe ta ngiri ciîrî.

¹⁴Bara bairîthîîtie bakwona ûgu baugia, baatoorooka. Baathi baatambia ntheto inu taûni na ntûûraani. Antû baathi kwîbonera bûra mantû mamu maakarakari.

¹⁵Bakûthi kîrî Yiesû kwîbonera, beethîra muntû ûyu aatûûraga arî na mbûûtû ya irundu biithûûku akari nthî, eekîrîte nguo, na kîongo gîake gîtarî ûntû. Baatua kwîgua ûguaya.

¹⁶Bara booneete mantû mamu magîkarîka i bo beerire antû bûra gwakarîkire kîrî muntû ûyu aarî na irundu biithûûku, na bûra ngûrwe ciakarire.

¹⁷Antû baatua kwîra Yiesû aume kwao.

¹⁸Yiesû agûtwa îtarûûni athi, muntû ûyu aarî na irundu biithûûku amûûria kana akîenda bakathi n'we.

¹⁹Îndî Yiesû amûregeera. Amwîra, “Înûka ûkeere antû beenu bûra Mwathani akûrûthîra, akwîgua kîao.”

²⁰Muntû ûyu akuuma agu, aathiire aanjîîria kwanga akîîraga antû ba naagu Ndikaporis mantû mamu Yiesû aamûrûthîîre. Antû bonthe baarigara bakwîgua.

²¹Yiesû aacooka bwa rûgongo rûra baumîîte. Agûkinyûka îtarûûni, eethîranîrwa i kîrîndî gîa antû agu rûteere rwa îria.

²²Mûtongoria ûmwe wa *sinagoogi eetagwa Njairû aaya eegwîthia nthî magûrûûni maake. Amwereka mûno akîmwîraga, “Kaarî gaakwa karî akubî gûkua i kwayua.

²³Itû ncû tûthi ûgakaigîîre njara kabue, gacooke mwoyo.”

²⁴Yiesû baanjîîria kûthi. Ikwarî na ntundu înene ya antû yamûthingatîîte îkîmwinyîkaga.

²⁵Na ntunduuni înu ikwarî na mûka aayîîtue ndwari ya kûrua nthakame mîanka îkûmi na îrî.

²⁶Mûka ûyu naanyamaarîîte mûno agîcûa kûragûrîrwa abua. Naathiîte kîrî ndagitaarî baingî atakûbua, eenyangia into biake bionthe na bo. Bantû abua, ndwari yake nîatororagîria.

²⁷Mûka ûyu neegîîtue mantû ma Yiesû. Kwoogu aaya nyuma yake arî mûkondooni ûyu wa antû, aatonga nguo yake

²⁸akîîbîîraga na nkoro, “Ngatonga nwa nguo yake yonka, nkaabua.”

²⁹Agûtonga nguo ya Yiesû ûgu, nthakame îra yaruaga yatiga warîo. Aathikîîria eegua akwora.

³⁰Yiesû eegua kûrî inya yamuuma. Aûndûka aûria antû, “N'ûû aantonga nguo?”

³¹Arutwa baake bamwîra, “Nûkwona bûra kîrîndî gîkwinyîkîîte bûgana na nûkûûria n'ûû agûtonga?”

³²Yiesû akûraitha oona ûra aamûtongire.

³³Mûka ûyu n'ûntû naiyî n'we aarî, aaya aagwa nthî magûrûûni ma Yiesû akiinainaga n'ûguaya, eera Yiesû ûmma bungwa.

³⁴Yiesû amwîra, “Wîtîgio bwaku bûgûtûma wora. Ithi na ûkiri, mwarî wakwa. Thîîna yaku îkûthira kûrû na itigûcookera kaîrî.”

³⁵Yiesû wakîaragia woogû, atûmwa baaya kîrî Njairû baumîîte mûciî wake. Bamwîra, “Nootanyamaaria mûrutani, kaarî gaaku gagûkua.”

³⁶Yiesû akwîgua atûmwa babu bakîîra mûtongoria ûyu ûgu, amwîra, “Ûtikaamake, îgua ûrî na wîtîgio.”

³⁷Yiesû ateetîgîîria kûthiyania na muntû ûngî, tatiga Petûrû, Njakubu, na mûruagina Njoana.

³⁸Bagûkinya kwa mûtongoria ûyu wa sinagoogi, beethîra antû bakîrîraga na bamwe bakiugagîîria na inya îra nene.

³⁹Yiesû aathûngîra nyomba. Abaûria, “I kû thîîna îrî îra îgûtûma bûrîra ûûgû? Kaana gaka ti gakuû ikamaami.”

⁴⁰Yiesû akuuga ûgu, antû boona ta gûtarî bu augaga. Yiesû abaruta gûku bonthe. Baathûngîra gûku kaana kaarî barî na îthe wa kaana gaku, gina, na arutwa bara baake aarî na bo.

⁴¹Yiesû aagwata kaana gaku njara. Auga, “Taritha, kumi!” Tûgîtaûra, kuuga ûgu i ta kuuga, “Kaarî, ka ngûkwîra ûkîîra!”

⁴²Kaarî gaku gaûkîîra warîru, kaanjîîria kwanganga gûku. Kaarî na ûkûrû ta bwa mîanka îkûmi na îîrî. Babu baarî na Yiesû bakwona ûgu baarigara mûno.

⁴³Yiesû abakaania mûno abeera batikeere muntû mantû mamu. Auga kaarî gaku keewe gîntû gîa kûrîa.