Read tharaka MAARIKO 7 Bible Online

MAARIKO 7 - tharaka bible

MAARIKO 7

¹*Abarisai bamwe na aarimû bamwe ba watho ba kuuma Njerusaremu beethîranîra Yiesû.

²Boona arutwa bamwe ba Yiesû bakîrîa irio na njara irî na mûgiro n'ûntû bataithambîîte.

³Abarisai na Ayaundi batirîa irio batambîîte kûthamba njara baithiria mûgiro kûringana na kîîwîthîre gîa akûrû baao.

⁴Bakauma thokooni batirîa gîntû bataambîîte kûthamba njara mbere. Na barî na mawîthire mangî ma mîthemba na mîthemba mara bathingataga ta kûthambagia ikombe, nyûngû, mbakûri [na ûrîrî].[1]

⁵Abarisai babu na aarimû babu ba watho baûria Yiesû, “I mbi n'ûntû arutwa baaku batakûthingata kîîwîthîre gîa akûrû beetû? I kî n'ûntû bakûrîa bataambîîte kûthamba njara mbere?”

⁶Yiesû abacookeria abeera, “Isaaya naaroriirie mantû meenu bwega, biû eebwithia baba! Aandîkire auga, ‘Antû baba baankumagia na tûnyua akî, nkoro ciao irî kûraaya mûno naani.

⁷N'ûtheri bangongaga, mantû mara barutanaga i maathana magûtuîgwa n'antû.’

⁸Bûtiganaga na maathana ma Ngai bûkathingata kîîwîthîre gîa antû.”

⁹Yiesû abeera, “Bûrîona ta mantû meega mamu bûrûthaga, rîra bûregaga maathana ma Ngai kaingo bûthingata kîîwîthîre kîenu?

¹⁰Musa aandîkire auga, Ngai augire, ‘Tîîyaga abaagu na nyûkwe.’ Na aacooka kaîrî aandîka, ‘Ûra akaaruma îthe kana gina aagîrîtwe aûragwa.’

¹¹Îndî ûrutaniini bwenu biû buugaga, muntû nwa arege gûteethia îthe kana gina na arî na gîntû abateethia na kîo, bunka akabeera gîntû gîku i ‘Kurubani’,[2] kana i gîa kûrutîra Ngai.

¹²Na kûringana na ûrutani bwenu bûtiîtîgîîrîîtie muntû ta ûyu ateethia îthe kana gina kaîrî.

¹³Kûringana na kîîwîthîre kîenu bûtionaga ntheto ya Ngai îrî gîtûmi. Na kûrî mantû mangî maingî ta mamu bûrûthaga.”

¹⁴Yiesû aacooka eera kîrîndî, “Nthikîîriani bwinthe bwîgue na bûciûre bûra nkuuga.

¹⁵Gîntû kîra kîthûngagîra kîrî muntû kiumîîte ome gîtiûmba kûmwîkîra mûgiro. Îndî bûra buumaga kîrî muntû i bu bûûmba kûmwîkîra mûgiro. [

¹⁶Ûra arî na matû neegue.]”[3]

¹⁷Yiesû akuuma kîrî antû aathi aathûngîra nyomba. Arutwa baake bamûûria abeere bûra eendaga kuuga na ngerekano înu.

¹⁸Yiesû abaûria, “Anga wana biû nwabu bûrî baarige ûûgû? Ka bûtaiyî atî, kîra kîthûngagîra kîrî muntû kiûmîîte ome gîtiûmba kûmwîkîra mûgiro

¹⁹n'ûntû gîtithûngagîra nkorooni, i nda kîthiyaga na nyumaani gîkauma gîgateegwa kîorooni?” (Kwoogu irio bia mîthemba yonthe ibiagîrîte. Yiesû naabitheriirie.)

²⁰Yiesû aathi na mbere, auga, “Bûra buumaga ndeni ya muntû, i bu bûûmba kûmwîkîra mûgiro,

²¹n'ûntû nkorooni ya muntû i ku kuumaga mantû ta meeciiria maathûûku, ûmaramari, wamba, ûûragani,

²²ûthûngîîri, wîrirîîria bûûthûûku, moothûûku, wenania, mantû ma îgi, rûriitho, gûtuyanîîra, wîkumia, na ûtaku.

²³Mantû mamu monthe maathûûku maumaga ndeni ya muntû. Na i mo mamwîkagîra mûgiro.”

²⁴Yiesû akuuma naagu aarî, aathi gûntû kwarî akubî na taûni cietagwa Turo na Sindoni. Agûkinya noogo aathûngîra nyomba. Ateenda muntû nwa ûmwe amenya ara aarî, îndî gûtaûmbîkana.

²⁵Ikwarî na mûka ûmwe kaarî gaake kaathûngîrîtwe i kîrundu kîîthûûku. Mûka ûyu akwîgua Yiesû aagwetwa, aathi warîo amûturîria maru agu magûrûûni.

²⁶Mûka ûyu ataarî Mûyaundi. Aaciarîrîtwe gûntû gweetagwa Boinîcia. Mûka ûyu aûria Yiesû eengatie kîrundu gîku kîîthûûku kîathûngîrîte kaarî gaake, kiume.

²⁷Yiesû amwîra, “Gatwana twambe tûrîe, tûbae. Ti bwega kûgerera kurû irio bia twana.”

²⁸Mûka ûyu amwîra, “Bûbu bu n'ûmma, Mwathani. Îndî wana kurû nirîyaga tûng'enyua tûra tûgwîyaga rungu rwa meetha twana tûkîrîa.”

²⁹Yiesû eegua ûgu amwîra, “N'ûntû bwa ûgu wauga, mwekûrû, kîrundu kîra gîkûthûngîrîte kaarî gaaku gîkuuma, înûka.”

³⁰Mûka ûyu aacooka mûciî. Agûcooka eethîra kaarî gaake kamaami ûrîrî, kîrundu kîra gîakathûngîrîte kiumire.

³¹Yiesû akuuma Turo aagendeera Sindoni, eendama aathi bwa îria rîa Gariiri, aathi gûntû gweetagwa Ndikaporis.

³²Antû bamwe baareeta gîpûra kîarî maamu. Baûria Yiesû aigîîre muntû ûyu njara, amworie.

³³Yiesû aarutaruta muntû ûyu kîrî antû baathi gataaria. Amwîkîra biara matû, aacooka aatuîra mata njara, amûtongithia rûrîmî.

³⁴Aacûûba îgûrû, aanogokeera. Auga, “Ebatha.” Kuuga ûgu i kuuga, “Rugûka.”

³⁵Akuuga ûgu, warîo matû ma muntû ûyu maarugûka, kîra kîathaîkîîte rûrîmî rwake kîatharûka, muntû ûyu aatua kwaria atarî na thîîna.

³⁶Yiesû aakaania antû babu baamûreetire, abeera batikeere antû mantû mamu. Îndî ûgu bungwa aabakaaniirie kûrûtha i bu baarûthire mûno.

³⁷Antû bakwîgua mantû mamu baarigara mûno. Bauga, “Nakûrûtha mantû meega n'ûntû nagûtûma antû batireegagua batua kwîgua, na bara batiraaragia batua kwaria.”