Read tharaka MAARIKO 9 Bible Online

MAARIKO 9 - tharaka bible

MAARIKO 9

¹Yiesû abeera, “Na mma ga nkûbwîra, bamwe ba baba barûngi aaga batiikua batooneete ûnene bwa Ngai bûra bûkaaya bwonanie inya ya bu.”

²Nyuma ya ntugû ithanthatû, Yiesû aathûkia Petûrû, Njakubu na Njoana. Aatwa na bo kîrîmaani kîîraaya mûno, na i bo bonka baarî gûku. Yiesû aanjîîria kûgarûka, arutwa babu bakîonaga.

³Nguo ciake ciatua gûyica mûno, ciatuîka injerû ce. Gûtirî mûbûûri nguo nthîgûrû îno akîûmba gûcibûûra ikara ta ûgu ciakari.

⁴Eriya na Musa boonekana bakîaria na Yiesû.

⁵Petûrû eera Yiesû, “Mwarimû, na kaaba tûrî aaga. Ga twake tûganda tûthatû—gaaku, ka Musa, na ka Eriya.”

⁶Petûrû atoona bwa kuuga i kûmaka kûra baamakîîte.

⁷Îtu rîaya rîabakunîka. Kayû kauma gûku îtuuni kauga, “Ûyû i Mwana wakwa na immwendeete mûno. Mûthikagîîrieni.”

⁸Na nthûti îmwe arutwa bakûraitha batoona babu bangî kaîrî, i Yiesû wenka aatigirwe agu baarî.

⁹Bagûrûkîîte kîrîmaani gîku baarî, Yiesû abakaania abeera batikeere antû mantû mamu boonire mwanka rîra Mwana wa Muntû akaariûka.

¹⁰Arutwa babu beendama bakîûranagia i kûriûkua kûrîkû gûku Yiesû aaragîîria. Bataumbûra mantû mamu boonire.

¹¹Baûria Yiesû, “I kî n'ûntû aarimû ba watho barutanaga bakauga nwa mwanka Eriya aaye mbere ya Mesia aaya?”

¹²Yiesû abeera, “N'ûmma Eriya nwa mwanka aaye mbere oone mantû magûkara bûra maagîrîtwe wîgua makari. Îndî i kî n'ûntû *Maandîko Maatheru maugaga Mwana wa Muntû akanyamaarua mûno na amenwe?

¹³Ga nkûbwîra, kwaria mma Eriya naayire, na wata bûra kwandîkîîtwe Maandîkooni Maatheru îgûrû rîake, antû baamûrûthire wabûra bunthe beendaga.”

¹⁴Bagûcooka baakinya kîrî arutwa bara bangî, beethîra kîrîndî kiingî kîbathiûrûkîîrîte na aarimû ba watho bakîbakararagia.

¹⁵Antû bakwona Yiesû, baarigara mûno. Bamûthagaana na rwîro, baathi kûmûkeethia.

¹⁶Yiesû abaûria, “I mbi yo bûgûkararanîria?”

¹⁷Muntû ûmwe kîrî kîrîndî gîku amwîra, “Mwarimû, ingûkûreeterete kaana gaakwa karî na kîrundu kîîthûûku. Kîrundu gîku gîgatuîkithîîtie maamu.

¹⁸Na rîra gîkagwete igîkagwîthagia nthîgûrû gagatua kûruta mûthonjo na kanyua gagîkabakabaga magego gakaûmagara ng'û. Nkûûya ndeera arutwa baaku, kîrundu gîku karî na kîo ikîbaremire, batiraûmba gûkîîngatia.”

¹⁹Yiesû abeera, “Ga tûgaakara naabi mwanka rî, nthuke îno îtarî wîtîgio? Ga nkainyîkîria tûkare naabi mwanka rî? Reeteeni kaana gaku.”

²⁰Baareeta kaana gaku kîrî Yiesû. Kîrundu gîku gîkwona Yiesû kîaûmagaria kaana gaku nthûti îmwe. Gîagaturania nthî, kaana kaanjîîria kûgaragara gakîrutaga mûthonjo na kanyua.

²¹Yiesû aûria îthe wa kaana gaku, “I kuuma rî kaana gaka kaanjîîrie gûkara ûûgû?” Îthe wa kaana amwîra, “I kuuma wana bwa ko.

²²Na i maita maingî kîrundu gîku gîkagereete mwankiini na rûûyîîni gîkîenda gûkaûraga. Ûkeegua kûrî bu ûrûtha, twîgîîrue kîao ûtûteethie!”

²³Yiesû amwîra, “Î nûkuuga weegua kûrî bu ndûtha? Ûntû bunthe nwa bûûmbîke kîrî ûra eetîgagia.”

²⁴Warîru îthe wa kaîyî gaku eera Yiesû na inya, “Ndî na wîtîgio, îndî mbongeera ti bwingî!”

²⁵Kîrîndî gîgûtua gûtindîkana mûno, Yiesû aagondokera kîrundu gîku akîîra, “Woû kîrundu kîîthûûku ûtûmîîte kaana gaka gatiga kwîgua na kwaria, ngûkûgondokera. Uma na ûtigaacooke kîrî ko kaîrî!”

²⁶Kîrundu gîku gîakaya. Gîatiga kîaûmagaria kaana gaku mûno gaakara ta gaakua, rîru kîauma. Antû bakwona gaakara ûgu, baingî baao bauga, “Gagûkua!”

²⁷Yiesû aagwata kaana gaku njara agaûkîîria, kaarûngama.

²⁸Yiesû bagûcooka nyomba, arutwa baake bamûûria barî bonka, “I kî n'ûntû tiû tûremirwe kwîngatia kîrundu kîra gîkûrî na kaana kara?”

²⁹Yiesû abacookeria abeera, “Kîrundu ta kîra gîtiîngatîka na gîntû kîngî, tatiga na njîra ya maromba na gûtîîrîra kûrîa n'ûntû bwa maromba.”[5]

³⁰Yiesû na arutwa baake bakuuma agu baakûrûkîîra Gariiri. Yiesû ateendaga antû bamenya ara aarî,

³¹n'ûntû naarutanaga arutwa baake. Abeeraga, “Mwana wa Muntû agaakunyanîrwa anenkanîrwe kîrî antû bamûûrage. Îndî akaariûka ntugû ya ithatû.”

³²Arutwa baake bataaciûra ûntû bûbu, îndî baakuthûka kûmûûria biûria.

³³Bagûkinya taûni ya Kaperinaumu, barî nyomba, Yiesû aûria arutwa baake, “I mbi bûgûkararanagîria njîraani?”

³⁴Arutwa baakira n'ûntû wabu barî njîraani ibaakararanagia woora muntû akiugaga n'we mûnene kîrî bara bangî.

³⁵Yiesû aakara nthî, abeeta baayanga akubî. Abeera, “Ûra akwenda gûtuîka wa mbere, nwa mwanka eetuîkithie wa mûthia na nkombo ya bara bangî bonthe.”

³⁶Yiesû aathûkia kaana kaniini akarûngamia agu mbere. Akagwatîîra, eera arutwa baake,

³⁷“Ûra akenagîîra kaana ta gaka riîtwaani rîakwa, i niû akenagîîra. Na ûra ankenagîîra, n'ûra aantûmire akenagîîra.”

³⁸Njoana amwîra, “Mwarimû, twonire muntû akîîngatia irundu biithûûku agîtûmagîra riîtwa rîaku twamwîra atige n'ûntû t'ûmwe wetû.”

³⁹Yiesû amwîra, “Bûtikaagirie muntû ta ûyu kaîrî n'ûntû gûtirî we aringa kîama agîtûmagîra riîtwa rîakwa na agaacooka kûngweta na ûthûûku.

⁴⁰Muntû atarî ûthû naati ûyu n'wetû.

⁴¹“Ûra akaabûkundia rûûyî riîtwaani rîakwa akiugaga arîbûkundia n'ûntû bûrî ba Kîrîstû, muntû ta ûyu atiaga kîewa.”

⁴²Yiesû auga, “Ûra atûmaga nwa ûmwe wa baba baniini bambîtîgîîtie beeyia, i kaaba akoogeerwa iiga rîa kûthia nkingo, akagerwa îriani ndeni.

⁴³Weegua i njara yaku îtûmaga wîyia, mîgiite! I kaaba ûkathi mwoyooni wa tene na tene ûrî na njara îmwe, kîrî ûkara na cio irî ciîrî, na îndî ûthi îcamaarîro mwankiini ûtooreka. [

⁴⁴Gûku maginyo matikuyaga na mwanki ûtioreka.][6]

⁴⁵Weegua i kûgûrû gwaku gûtûmaga wîyia, kûgiite! I kaaba ûkathi mwoyooni wa tene na tene ûrî na kûgûrû kûmwe, kîrî ûkara na mo marî maîrî, na îndî ûgerwa îcamaarîro. [

⁴⁶Gûku maginyo matikuyaga na mwanki ûtioreka.][7]

⁴⁷Weegua i riitho rîaku rîtûmaga wîyia, rîkûûre! I kaaba ûkathi ûneneeni bwa Ngai ûrî na riitho rîmwe, kîrî ûmaiga marî maîrî na îndî ûgerwa îcamaarîro.

⁴⁸Gûku maginyo matikuyaga na mwanki ûtioreka.”

⁴⁹Yiesû eera arutwa baake, “Ûra aambîtîgîîtie ageetîgîîrîka kuumania na gûkûrûkîîrua kûra agaakûrûkîîrua mwankiini, ta bûra kîgongwana gîîtîgagîîrua kuumania na mwonyo ûra gîîkagîrwa.

⁵⁰Mwonyo n'ûmwega, îndî ûkathira mûcamo ûtiîkîrîka uu kaîrî. Karagaani bûrî na mûcamo, na tûûranagiani na ûkiri.”