Read tharaka RUKA 1 Bible Online

RUKA 1 - tharaka bible

RUKA 1

¹Antû baingî ibaageriirie baandîka bakiugaga mantû mara makarîkîîte kîrî tiû.

²Baandîkire wata bûra twerîîtwe mo i bara baarî oogo makîrûthwa. Bara baarî akûûyî na atûmîîria ba kiugo kuuma kîambîrîria ibaatwîrire bûra gwakarîkire.

³Nyuma ya ngûcûnkûûna kaumo ka mo monthe ndoona bûra maakari, wana niû indaroonire nkwandîkîre mo tarîîria, woû mûkaathe Thiobiras.

⁴Ndîkwandîkîra kaingo ûmenya ûmma bwa mantû mara warutanirwe.

⁵Eronde arî mûnene wa Njundea, ikwarî na mûthînjîri wa Ngai eetagwa Cakaria. Aarî ûmwe wa *athînjîri bara baataragîrwa gîkundiini kîa Abiya. Wana mwekûrû wake, Ericabethi, aarî wa rûrîîyo rwa Arûni, mûthînjîri ûra mûnene wa Ngai.

⁶Barî baîrî, baarî antû baatheru nkoro kîrî Ngai na ibaathîkagîra mawatho na maathana maake monthe.

⁷Bataarî na twana n'ûntû Ericabethi aarî nthaata na barî baîrî, ibaarî bagûkûra mma.

⁸Kagiita ka athînjîri ba gîkundi kîa Abiya gagûkinya, Cakaria aathûngîra nyomba ya Ngai kûruta ngûgî.

⁹Na wata bûra wîthîre bwa athînjîri ba Ngai bwakari, i kuura baaringire, Ngai aboonia ngûgî îra woora ûmwe waciao akaaruta. Cakaria n'we aathuurirwe athûngîra nyomba ya Mwathani atoogia macoco.[1]

¹⁰Îgiita rîgûkinya rîa gûtoogia macoco, kîrîndî kîonthe îkîarombaga kîrî ome naara kîagîrîtwe kwîgua kîrî.

¹¹Mûraîka wa Mwathani aaya gûku Cakaria aarî, aarûngama rûteere rwa ûrîo rwa bantû ara macoco maabîîthagîrua.

¹²Cakaria akûmwona aagwatwa i kîrikithi, aatua kwîgua ûguaya.

¹³Mûraîka amwîra, “Ûtikaamake Cakaria. Ngai neegîîtue maromba maaku. Mwekûrû waku Ericabethi agagûciarîra kaana ga kaîyî ûgeete Njoana.

¹⁴Kaana gaku gagaatûma ûkena na ûgwîrua. Na antû baingî bagaakeneera gûciarwa gwa ko.

¹⁵Akeegua arî mûruti ngûgî ya Mwathani ûmûnene. Atikooro anyua ncoobi kana anyua gîntû gîa gûtogoonia. Akeegua aûyûrîîtwe i Kîrundu Ûmûtheru kuuma gûciarwa.

¹⁶Akaagarûra antû ba Isiraeri bacooke kîrî Mwathani Ngai wao.

¹⁷Njoana akaaya mbere ya Mwathani aaya, na akeegua atongoreetue i Kîrundu, arî na inya ta ya Eriya. Agaatûma aciari beendage aana baao. Na agaatûma aregi bagarûka bathûgaanagie ta antû baagîru nkoro. N'we akaathuuranîra Mwathani antû baake.”

¹⁸Cakaria aûria mûraîka, “N'ata nkaamenyanga ûntû bûbu bûgaakarîka? Niû ndî mûkûrû, na wana mwekûrû wakwa n'ûmûkûûrû kûrû.”

¹⁹Mûraîka amûcookeria amwîra, “I niû Ngaburieri ûra arûngi mbere ya Ngai. Ntûmirwe i Ngai mbûya kwaria naawe nkwîra ntheto ino imbega.

²⁰Ka ngûkwîra, ûtiaria kaîrî kuuma îîndî ûgu mwanka rîra mantû mama magaakarîka, n'ûntû ûtireetîgania na ntheto ciakwa ira igaatuîkîka îgiita rîa cio rîakinya.”

²¹Mantû mamu mathiîte na mbere woogû, antû nwa baakari nja beeteereete Cakaria. Baarigara baatua kûûrania, “I mbi n'ûntû Cakaria aakara nyomba ya Ngai îgiita rîgana ûgu?”

²²Akuuma ataûmba kwaria na bo na kanyua kaîrî. Aabonagîîria mantû na njara akî. I rîo baamenyire kûrî kîoneki oona arî ndeni ya nyomba ya Ngai.

²³Îgiita rîao rîa ûthînjîri rîkûthira, Cakaria eenûka mûciî wake.

²⁴Nyumaani Ericabethi mwekûrû wake aagîa nda. Akûmîgîa atauma nyomba bantû a mîeri îtaano. Aakaraga akiugaga,

²⁵“Mwathani agûnteethia aanthiria îgi rîra ndaraarî na rîo kîrî antû!”

²⁶Nda ya Ericabethi îgûkinyia mîeri îthanthatû, Ngai aatûma mûraîka Ngaburieri taûni ya Nasareethi îra îrî gîteere kîa Gariiri.

²⁷Aamûtûmire kîrî mwarî eetagwa Maria, ataamaamîîte na muntû mûrûme. Maria aakeethagua agûrwa i mûthaka eetagwa Njosebu, wa rûrîîyo rwa Ndaundi.

²⁸Mûraîka aathi kîrî we amûkeethia amwîra, “Woû ûrî ûmûthaarime mûno na Mwathani arî amwe naawe.”

²⁹Maria akwîgua mîgambo înu, aamaka mûno. Aarigara n'ûntû bûbu.

³⁰Mûraîka amwîra, “Ûtikaamake, Maria. Ngai nakeneete i woû.

³¹Ûkaagîa nda ûciare kaana ga kaîyî ûgeete Yiesû.

³²Agaatuîka mûnene na ageetagwa Mwana wa Ngai ûra arî îgûrû mûno. Na Mwathani Ngai akamwaa ûnene bwa kîûyûûyû gîake, Ndaundi.

³³Akaatha rûrîîyo rwa Njakubu tene na tene, na ûnene bwake bûtiithira rî kana rî.”

³⁴Maria aûria mûraîka, “Mantû mama magaakarîkanga ata na niû ntaamaama na muntû mûrûme?”

³⁵Mûraîka amûcookeria amwîra, “Kîrundu Ûmûtheru akaaya kîrî woû, na inya ya Mwathani ûra arî îgûrû mûno îgagûkinyîîra. Kwoogu kaana kara gagaaciarwa gageetwa mûtheru, Mwana wa Ngai.

³⁶Ndîenda ûmenya Ericabethi ûra wenu, n'ûmûrito na wone we n'ûmûkûûrû kûrû. Îîndî ûûgû arî na nda ya mîeri îthanthatû n'ûntû gûtirî bu Ngai ataûmba kûrûtha, na antû baraugaga i nthaata.”

³⁷

³⁸Maria auga, “Niû ndî mûruti ngûgî wa Mwathani, inkare woogu wauga.” Mûraîka amûtiga aathi.

³⁹Kagiita gaku Maria auma agu na mpwî aathi bwa taûni yarî gatîgatî ka irîma bia Njundea.

⁴⁰Agûkinya gwa Cakaria, aathûngîra nyomba aakeethia Ericabethi.

⁴¹Ericabethi akwîgua nkeethi ya Maria, kaana gaatûûbatûûba karî nda. Ericabethi aûyûrwa i Kîrundu Ûmûtheru.

⁴²Augîîria na inya auga, “Woû ûrî ûmûthaarime kîrî aka bonthe. Wana kaana kara ûgaaciara i kaathaarime!

⁴³Niû ndî ûû wa kûriûngîrwa i gina wa Mwathani wakwa?

⁴⁴Nkwîgua wankeethia, kaana igagûtûûbatûûbaga karî nda i gîkeno.

⁴⁵Woû ûrî ûmûthaarime n'ûntû bwa gwîtîgia bûra weerirwe i Mwathani bûgaakarîka.”

⁴⁶Maria auga, “Ingûkumia Mwathani na nkoro yakwa yonthe,

⁴⁷ingûkena mûno n'ûntû bwa Ngai Mwonokia wakwa.

⁴⁸Akûndirikana niû mûruti ngûgî wake ûmûkirîîru kuuma îîndî ûgu nciarwa cionthe ikaugaga ndî ûmûthaarime.

⁴⁹Ngai ûra arî inya akûndûthîra mantû maanene, riîtwa rîake i rîîtheru.

⁵⁰Nabeegagua kîao bara bamûtîîyaga, nciarwa na nciarwa.

⁵¹Narûthaga manene na inya yake. Naaraganagia bara beekumagia mathûgaanioni maao.

⁵²Narutaga bara banene itîîni bia ûnene, akaneneia bara beenyithagia.

⁵³Bara barî na yûûra rîa mantû meega, nababaithagia na mo, akeengatia itonga bikathi njara intheri.

⁵⁴Natûteethagia tiû Aisiraeri, aruti ngûgî baake, n'ûntû naririkanaga gûtwîgua kîao.

⁵⁵Ngai narûthaga bûra eerire biûyûûyû bietû akaarûthîra Îburaîmu, na nciarwa ciake tene na tene.”

⁵⁶Maria baakarire na Ericabethi bantû a mîeri îthatû akîîya gûcooka kwao.

⁵⁷Îgiita rîa Ericabethi rîa kuurûka rîgûkinya, aagîa na kaana ga kaîyî.

⁵⁸Atûûri na antû ba mûciî wao bakwîgua Mwathani naamwîgîîrue kîao ibaakenanîîre amwe n'we.

⁵⁹Baataana kaana gaku ntugû ya inyanya kuuma gagûciarwa. Beendaga gûgeeta Cakaria ta îthe,

⁶⁰gina aarega, auga, “Gatigeetwe ûgu, igeetwe Njoana.”

⁶¹Bamwîra, “Gûtirî muntû wa mûciî wenu eetagwa ûgu!”

⁶²Baarîria Cakaria na njara bakîmûûria bûra eendaga mwana eetwa.

⁶³Cakaria eetia bantû a kwandîka. Aandîka, “Riîtwa rîake i Njoana.” Antû bonthe baarigara boona ûgu.

⁶⁴Warîo Cakaria aarugûka mîario, aanjîîria kwaria agîkumagia Ngai.

⁶⁵Atûûri bonthe baagwatwa n'ûguaya. Na ntheto cia mantû mamu ciatambua ntûûra cionthe irîmaani bia Njundea.

⁶⁶Muntû wonthe ûra eegagua ntheto inu aathûgaanagia akeebûûria, “Ka mwana ûyû agaatuîka ûû?” Antû baûragia ûgu n'ûntû iboonaga inya ya Mwathani nîarî amwe na Njoana.

⁶⁷Cakaria, îthe wa Njoana, aûyûrwa i Kîrundu Ûmûtheru. Aaroria auga,

⁶⁸“Ga tûkumieni Mwathani, Ngai wa Isiraeri! Akûûya gûteethia antû baake akîbakûûra.

⁶⁹Agûtwaa Mwonokia arî na inya, kuuma rûrîîyooni rwa Ndaundi mûruti ngûgî wake.

⁷⁰Wata bûra eeranire kuuma wo tene gûkûrûkîîra tûnyuani twa iroria biake biitheru.

⁷¹Augire agatwonokia kuuma kîrî anthû beetû, na kuuma inyaani ya bara batûmenaga.

⁷²Na akeegua biûyûûyû kîao, aririkane kîrîîkanîro gîake kîîtheru,

⁷³ta kîo mûthiîtio ûra aathiîtîîrie kîûyûûyû gîetû Îburaîmu,

⁷⁴auga agatûtunyûkia kuuma kîrî anthû beetû, agatûteethagia tûtûûrage tûtarî na ûguaya. Rîru i rîo tûkaamûrutîra ngûgî tûrî baatheru, na tûrî baagîru nkoro meethooni maake ntugû cietû cionthe cia mwoyo.

⁷⁵

⁷⁶Naawe, mwana wakwa, ûgeetagwa kîroria kîa Ngai ûra arî îgûrû mûno. Mbere ya Mwathani aaya, ûkamûrûthîra njîra kûra agaakûrûkîîra,

⁷⁷wîre antû baake bamenye bûra baarekerwa meeyia maao, boonokue,

⁷⁸n'ûntû bwa kîao kîînene kîa Ngai wetû. Werû bûkauma îgûrû bûtûthararîre,

⁷⁹na bûkaamûrîkîra antû bonthe bara batûûraga mwinduuni wa gîkuû, bûtûtongoreerie njîraani ya ûkiri.”

⁸⁰Mwana ûyu aakûrire, aagîa inya mûno ya gîîkîrundu. Aakara rwanda ntugû yakinya îra aanjîîrie gûtûmîîria antû ba Isiraeri.