Read tharaka RUKA 10 Bible Online

RUKA 10 - tharaka bible

RUKA 10

¹Nyuma ya mantû mamu, Mwathani aathuura arutwa bangî mîrongo mûgwanja.[5] Abatûma baîrî baîrî, baathiyaga barî mbere taûni cionthe na gûntû kunthe kûra Yiesû eengeerie kûthi.

²Yiesû abeera, “Maketha i maingî, îndî akethi i baakai. Kwoogu rombagaani kaingo Mwene îketha atûma akethi baingî baaya îkethaani rîake.

³Na bûthi bûkîmenyaga ndabûtûma bûkari ta ng'ondu irî gûntû kûrî ncûgi.

⁴Bûtigaakamate mbeeti kana kîondo, kana iraatû. Na bûtikaarûngame njîraani gûkeethia muntû.

⁵“Ara onthe bûkaathi, mbere ya bûthûngîra mûciî wa muntû buugage, ‘Ûkiri bûrookaraga mûciî ûyû.’

⁶Ûkaaya kwîgua kûrî na muntû arî mûciî ûyu eendeete ûkiri, ûkiri bwenu bûgaakara kîrî we. Îndî ûkeegua gûtirî we, ûkiri bwenu bûgaakara naabi.

⁷Bûkarage mûciî ûyu bûkîrîyaga na bûkînyunyaga bira bûkaarûmagua n'ûntû mûruti ngûgî nabatîîrue arîagwa ngûgî yake. Bûtikaariûnge na mîciî.

⁸“Bwathi taûni îra bûkaathi, bwagwatwa ûgeni, bûrîyage irio bira bûkaarûmagua.

⁹Bworagie bara baayie taûni ta înu na bwîrage antû, ‘Ûnene bwa Ngai bûkûthengeera.’

¹⁰Îndî bûkathi taûni bûkarega kûgwatwa ûgeni, buumagarûke bûthi bûkiugaga na njîra,

¹¹‘Wana tîîri ya taûni yenu îra îkûrî ikûgwata mbayo cietû tûkûbûturaturîra yo na bûmenye ûnene bwa Ngai bûkûthengeera!’

¹²Na ga nkûbwîra, ntugû ya îgamba Ngai akaagiitîra antû ba taûni înu îgamba bûûthûûku nkûrûki ya antû ba taûni ya Sondomu.”

¹³Yiesû auga, “Bûkoona thîîna biû antû ba taûni ya Korosini! Na bûkoona thîîna biû antû ba taûni ya Bethisainda! Ûkaaya kwîgua biama bira biaringirwe taûni cienu biaringirwe taûni ya Turo kana ya Sindoni antû ba taûni înu bokîonaga, wîgua bo beeririre, beekîra mathango wo tene, na muu beemincîria biongo biao kwonania kwîrira kwao.

¹⁴Ntugû ya îgamba Ngai akaagiita îgamba rîenu bûûthûûku nkûrûki ya bûra akaagiitîra antû ba taûni ya Turo na ya Sindoni.

¹⁵Naabi antû ba taûni ya Kaperinaumu, weegua bûrîthûgaania bûgaakumua mwanka îgûrû, Ngai akaabûgera îcamaarîro!”

¹⁶Yiesû eera arutwa baake, “Ûra abwîtîgagia i niû eetîgagia. Ûra areganaga naabi i niû areganaga naani. Na ûra andegaga n'ûra aantûmire aregaga.”

¹⁷Arutwa babu mîrongo mûgwanja baacooka bakeneete mûno. Beera Yiesû, “Mwathani, wana irundu biithûûku ibigûtwathîkîra riîtwaani rîaku.”

¹⁸Yiesû abeera, “Mbonire Saitaani yarûka ta rweni bûra rwarûkaga kuuma îgûrû.

¹⁹Imbwete inya ya gûkinya njoka na ing'aarurî. Na nkabwaa kinya inya îkûrûkîîte ya mûnthû wetû, gûtirî kîo gîkaabûthûûkia.

²⁰Îndî bûtigaakeneeni i kwîgua irundu bithûûku ibikûbwathîkîra. Kenagaani n'ûntû mariîtwa meenu imaandîke îgûrû.”

²¹Îgiitaani warîru, Yiesû aagwatwa i gîkeno gîa Kîrundu Ûmûtheru, auga, “Ingûgûcookeria nkaatho, Baaba, Mwathani wa îgûrû na nthîgûrû, n'ûntû withîîte bara baûgî na bara bathoomu mantû, îndî wagwûrîra mo bara beenyiîtie. I mma, Baaba, woû nwa bu weendeete gûkarîka.

²²“Ngai Baaba nampete bionthe. Gûtirî we aiyî Mwana tatiga Îthe. Na gûtirî we aiyî Îthe tatiga Mwana, kana bara Mwana athuuraga akabagwûrîra we.”

²³Yiesû eera arutwa baake bonka, “Bûrî baathaarime n'ûntû biû ibûkwona mantû mama nkûbwonia!

²⁴Ga nkûbwîra, n'iroria bingî mûno na anene beendaga kwona mara bwonaga, îndî bataamoona. Ibeendaga kwîgua mara bwîgagua, îndî bataameegua.”

²⁵Ntugû îmwe mwarimû ûmwe wa watho aûria Yiesû kîûria akîmûtega. Amûûria, “Mwarimû, n'ata mbatîîrue kûrûtha nkeewa mwoyo wa tene na tene?”

²⁶Yiesû akîmûcookeria amûûria, “*Maandîko Maatheru maugîîte ata? Na ûmataûraga ata?”

²⁷Mwarimû ûyu amûcookeria amwîra, “Maugîîte, ‘Enda Mwathani Ngai waku na nkoro yaku yonthe, na mwoyo waku unthe, na inya yaku yonthe na mathûgaania maaku monthe,’ na ‘Enda mûtûûri waku ta bûra wîbendeete.’ ”

²⁸Yiesû amwîra, “Ûgûcookia bwega. Rûthaga ûgu wone ûgaatûûra mwoyo.”

²⁹Mwarimû ûyu akîenda gwîtua muntû ûmwagîru, aacooka aûria Yiesû, “Mûtûûri wakwa n'ûrîkû?”

³⁰Yiesû amwîra, “Ikwarî na muntû ûmwe eendamîîte bwa taûni ya Njeeriko aumîîte bwa taûni ya Njerusaremu aarîîkana na atunyani. Atunyani babu bamûtunya nguo, bamûtura mûno, bamûtiga becû akua.

³¹Mûthînjîri ûmwe wa Ngai eendamîîte na barabara înu oona muntû ûyu. Aatamba na rûteere rûra rûngî rwa barabara, aakûrûka aathi.

³²Mûraawî ûmwe aayîîra agu. Amûraithîîria, aatamba na rûteere rûra rûngî rwa barabara, aakûrûka aathi.

³³Kûrî Mûsamaria ûmwe aarî rûgendooni wana we. We agûkinya bantû agu muntû ûyu aarî, akûmwona amwîgîua kîao.

³⁴Aathi ara aarî amûtûûrîria maguta na ndibei kûra aatonyangîîtwe amwoga matonyangîrwa mamu. Amûtwethia mûgongo wa îng'ooi rîra aarî na rîo amwira nyomba îmwe ya gûkomborithia ageni amûmenyeera.

³⁵Rûûni rûkîîrî Mûsamaria ûyu aarîa mbia kîrî mwene wa bantû agu. Amwîra, ‘Mûmenyeere mwanka rîra nkaaya. Weegua mbia nikoongeereka îgûrû rîa inu ndakwa, ngakûrîa cio ndacooka.’ ”

³⁶Yiesû akîthiria aûria mwarimû ûyu, “Ûkîthûgaania ûrî woû rî, kîrî antû babu barî bathatû, n'ûrîkû aarûthîîre muntû ûyu aaturîîtwe n'atunyani bûra mûtûûri abatîîrue arûtha?”

³⁷Mwarimû ûyu aacookeria Yiesû amwîra, “I muntû ûra aamûteethiirie.” Yiesû amwîra, “Wana woû îthi ûrûthage mantû meega ta mamu.”

³⁸Yiesû na arutwa baake bathiîte na njîra baakinya gataûni kamwe. Mûka ûmwe eetagwa Mariitha aagwata Yiesû ûgeni wake mûciî.

³⁹Mariitha naarî na mwaragina eetagwa Maria. Maria aakara akubî na Mwathani athikîîria moorutani maake.

⁴⁰Mariitha aatigwa arî wenka akîîthangîkagia na ngûgî inyingî n'ûntû bwa kûgwatana ûgeni. Aathi ara Yiesû aarî amwîra, “Mwathani, ûtikwona mwarayia naantiganîîrie na ngûgî ninka. Mwîre aaye anteetheerie!”

⁴¹Mwathani amûcookeria amwîra, “Mariitha, nûkwînyamaaria ûkîîthangîkia na mantû maingî!

⁴²N'ûntû bûmwe akî bûrî na gîtûmi. Maria we neethuurîîre ûntû bûbu na atitunyîka bu kaîrî.”