Read tharaka RUKA 12 Bible Online

RUKA 12 - tharaka bible

RUKA 12

¹Antû ngiri inyingî beethîrana amwe mwanka baatua gûkinyangana. Yiesû aanjîîria na kwîra arutwa baake, “Îmenyagîîreeni kîrî ndawa ya *Abarisai ya kwimbithia mîgaate. Ndawa înu i wîbwithia bwao.

²Ûntû bunthe bûra bwithe nwa bûkaamenyeka, gûtirî witho bûtakiumbûka.

³Kwoogu mara bwaugire kûrî ûtugû nwa makeeguîgwa kûrî mûthenya. Na mara bwariirie na kîoye bwîbithîîte nwa makaugîîrua antû bonthe beegue.”

⁴Yiesû aacooka abeera, “Na ga nkûbwîra, acoore baakwa, bûtigaakuthûkeeni bara baûmba kûûraga mwîrî unka na nyuma ya ûgu gûtirî bûngî baûmba kûrûtha muntû.

⁵Îndî ga nkûbwîra kûrî ûmwe wenka ûra bûbatîîrue bûkuthûka. Kuthûkagaani Ngai n'ûntû arî na inya ya kûûraga muntû akamûgera mwankiini wa îcamaarîro. Yîî na ga nkûbwîra, ûyu n'we bûbatîîrue bûkuthûka.

⁶Anga tûnyoni tûtaano tûniini tûkeendua twauma mbia kûrî? Îndî amwe na ûgu, gûtirî nwa kamwe Ngai ariganîrua i ko.

⁷We wana ntundu ira irî biongo bienu cionthe naiyî n'igana. Kwoogu menya bûmaka. Biû bûrî gîtûmi nkûrûki ya tûnyoni tûtatarîka.”

⁸Yiesû aacooka auga, “Na ga nkûbwîra, ûra agaankûûyîîra kîrî antû, wana niû, Mwana wa Muntû, nkamûkûûyîîra kîrî araîka ba Ngai.

⁹Îndî ûra agaankaana kîrî antû, wana niû inkaamûkaana kîrî araîka ba Ngai.

¹⁰Muntû wonthe ûra agaacambia Mwana wa Muntû, akaarekerwa. Îndî ûra akaaria mantû maathûûku îgûrû rîa Kîrundu Ûmûtheru atiirekerwa.

¹¹“Wana babûthitanga biamaani bia *masinagoogi kana kîrî mangabana na anene, bûtikaûrie n'ata bûkauga kana n'ata bûgaacookia.

¹²Rîra îgiita rîru rîgaakinya Kîrundu Ûmûtheru akabûrutana bûra bûkauga.”

¹³Muntû ûmwe ntunduuni eera Yiesû, “Mwarimû, îra mûruayia angaîre into bira twatigîîrwe i baaba.”

¹⁴Yiesû amûûria, “Aba, n'ûû ampete watho bwa kûgambîra mantû ta mamu?”

¹⁵Yiesû eera antû, “Îmenyeereeni bûtigaatanûkîre into. Muntû atiûmba gûtûûrua mwoyo n'ûtonga bwake.”

¹⁶Yiesû aatûmîra ngerekano abeera, “Gîtonga kîmwe ikîarî na irio biingî mûno mûndaani wa kîo.

¹⁷Gîtonga gîku kîebûûria na nkoro, ‘N'ata nkûrûtha mbone bantû a gûkethera irio biakwa bionthe?’

¹⁸Kîebîîra mathûgaaniani, ‘Nkoomborania makûmbî maakwa monthe mbake mangî maanene mara ngeekîra irio biakwa biganîre, na mbone akwaiga kinya into biakwa bira bingî bionthe.

¹⁹Ndarûtha ûgu rîru mbîîre nkoro yakwa, “Nkoro, înogokere ûkîrîyaga, ûkînyunyaga, na ûkene n'ûntû into ûrî na bio bia kûgana bitathira rua rûrû.” ’

²⁰“Îndî Ngai eera gîtonga gîku, ‘Woû ûrî kîaa mûno! Ûgaakua îmunthî ûtugû. Îîndî into bibi wîthîranîîtie bigana ûûgû bionthe bigaatuîka bia ûû?’ ”

²¹Yiesû akîthiria auga, “Muntû ta ûyu n'antû bara beebaigîrîte ûtonga bwa aaga nthîgûrû beegwetie bu, bantû a beegwatia ûtonga bwa Ngai.”

²²Yiesû eera arutwa baake, “Bûtikeemakîre bûkîûragia i mbi bûkaarîa, kana bûûria i kû bûkaaruta nguo cia gwîkîra.

²³Mwoyo n'uu ûrî gîtûmi nkûrûki ya irio, na mwîrî n'uu ûrî gîtûmi nkûrûki ya nguo.

²⁴Taraithaani nkûngûrû. Cio itiandaga, itikethaga, itirî makûmbî na itirî mîrûrû. I Ngai acieyaga irio. Anga ti biû bûrî gîtûmi nkûrûki ya cio!

²⁵N'ûû wacienu aûmba kwîbongeera nwa ntugû îmwe ya mwoyo wake n'ûntû bwa kwîmakîra?

²⁶Ûkeegua bûtiûmba kûrûtha tûmantû tûniini ta tûtu rî, i mbi n'ûntû bûkwîmakîra mantûûni mamu mangî?

²⁷“Taraithaani maûa mara maumaga kîthakaani bwone bûra makûrangaga. Mo matirutaga ngûgî kana matuma nguo. Na ka mbwîreeni, wana mûnene Soromoni ûra nkuma yake yaiyîkeene mûno, ûthongi bwa nguo ciake bûtigîkinyîîra ûthongi bwa maûa ta mama.

²⁸Biû antû ba wîtîgio bûûkai! Ûkeegua Ngai nakûthongamia nyaki ya kîthaka bûgana ûûgû rî, nyaki îkwîgua îrî îmbîthî îmunthî na rûû gûgîkinya îkîgerwa mwankiini rî, î biû Ngai akaabûmenyeera bûgana ata?

²⁹Kwoogu bûtikeemakîre bûkîûragia, ‘I mbi tûkaarîa?’ kana, ‘I mbi tûkaanyua?’

³⁰Into ta bibu i bio antû ba nthîgûrû bacûaga. Abaagu ûra arî îgûrû naiyî bira bûrî bata na bio.

³¹Îgûrû rîa mantû monthe cûani ûnene bwake, rîru bibu bionthe bûrî bata na bio akabwaa.

³²“Biû, eendwa baakwa baakai, bûtigaakuthûke n'ûntû Abaagu ûra arî îgûrû nagûkeneera kûbwaa ûnene bûbû.

³³Endiani into bienu bionthe bûteethie nkîa. Bûtikeebaigîreeni ûtonga bûra bûkaathira. Îbaigîreeni ûtonga bwa îgûrû n'ûntû bu bûtithiraga, bûtiywa i mwamba, na bûtiînyangua i ndugunye.

³⁴Ara ûtonga bwa muntû bûrî noogo nkoro yake îîgagua îrî.”

³⁵Yiesû auga, “Karagaani bwîthuuranîrîte na bûmuntîîtie taa cienu.

³⁶Karagaani ta antû beeteereete mûnene wao aaya mûciî aumîîte kîathooni kîa wiki, kaingo aaringaringa mûrango bamûrugûrîra na mpwî.

³⁷Aruti ngûgî bara beetagîîra mûnene wao mwanka rîra akaaya eethîre batamaami, ibakenaga. Na mma ga nkûbwîra, mûnene eeraga aruti ngûgî ta babu ibakare nthî, akeethuuranîra akabaûrîra irio arî we.

³⁸Mûnene agatua gûkinyaga ûtugû mainda mara manene wakîbeethagîra bamweteereete, nabathaarimaga.

³⁹Na bûmenye ata rî, mwene mûciî akamenya rîra mwamba akaaya kwiya, atiuma ku. Nakaria nyomba yake atikaiywe.

⁴⁰Wana biû karagaani bwîthuuranîrîte, n'ûntû Mwana wa Muntû akaaya kagiita konthe kara bûteerîgîîrîîte.”

⁴¹Petûrû amûûria, “Mwathani, i tiû twinka ûkwîra ngerekano îno kana n'antû bonthe?”

⁴²Mwathani amwîra, “Ndîîra mûruti ngûgî ûra aûmba gwîtîgîka. Mûruti ngûgî ûra mûûme, ûra aûmba kwewa watho bwa kûrûngamîîra mûciî. Ûra aûmba kûrûmia bara bangî irio îgiita rîa biakûrîa rîakinya.

⁴³Mûruti ngûgî ta ûyu nakenaga rîra ûra amwandîkîîte acookaga akamwîthîra akîrutaga ngûgî îra aamwere bwega.

⁴⁴Na mma ga nkûbwîra, mûnene wake amûtuîkithagia mûrûngamîîri wa gûkaragia into biake bionthe.

⁴⁵Îndî akeegua arî mûruti ngûgî ûmûthûûku, aatigwa akaathûgaania ûra amwandîkîîte atiiya rua. Akîanjîîria gûtura aruti ngûgî bara bangî, akarîa na akanyua ncoobi agatogoona.

⁴⁶Ûra amwandîkîîte akaaya ntugû îmwe ataiyî, thaa ira atamwîrîgîîrîîte amwe îkaanûkia rîînene, oone kînyamaara bûmwe na bara bateetîgîîtie.

⁴⁷“Mûruti ngûgî ûra amenyaga bûra mûnene wake eendaga kûrûthwa îndî atirûthaga bu agaaturwa mûno.

⁴⁸Îndî mûruti ngûgî ûra ataiyî bûra mûnene wake eendaga kûrûthwa, akaaya kûbîtia akarûtha mantû matûma aturwa, agaaturwa, îndî ti mûno. Ûra akeewa into biingî, akaarandûkwa biingî woogu. Na ûra n'we ageetîgua eewe into biingî mûno, akeerîgîîrwa aruta biingî mûno woogû.”

⁴⁹Yiesû auga, “Ndaayire kûreetera antû îkaanûkia rîa Ngai rîkari ta mwanki ûra ûkaababîîthia. N'ata nkena bûgana mma mwanki ûyu ûkeegua nwanjîîrîîtie kûrîrîmbana ûkîbîîthanagia!”

⁵⁰“Kûrî na ûbaatithio nkaabaatithua bûkûmbîkîra kîeba mwanka ntugû îra nkaabaatithua bu.

⁵¹Bûtigeeciirie mbûyîîte kûreeta ûkiri nthîgûrû. Ntiyîîte kûreeta ûkiri ndeeteete kwathûkana.

⁵²Kuuma îîndî antû ba mûciî ûmwe batiîganua. Weegua i bataano, bathatû bakeebûûmba mwanya, babu bangî baîrî na bo beebûûmbe mwanya.

⁵³Mwana atiigwatanîra na îthe, mwarî atiigwatanîra na gina, mûk'wa mwana atiigwatanîra na ciaraagwe.”

⁵⁴Yiesû aacooka eera kîrîndî, “Bûkoona matu mathwîrooni ma riûa buugaga, ‘Îmunthî gûkaura n'ûntû kûrî na matu maayirû.’ Na wabu gûkaura.

⁵⁵Bwona ruuo rûkîbuutana ruumîîte bwa iti buugaga, ‘Îmunthî gûkaara mûno.’ Na wabu gûkaara.

⁵⁶Eebwithia baba! Ibwiyî kûraitha mwonekere wa nthîgûrû na matu bûkamenya bûra gûgaakara, îndî bûtikûûmba kûmenya bûra mantû mara magûtuîkîka ntugûûni makwonania.”

⁵⁷Yiesû abaûria, “I mbi n'ûntû bûtakwîgiitîra magamba bûra kwagîrîte?

⁵⁸Geria bûra kûûmbîka bwîganue na mûnthû waku bûrî njîraani. Woona akwira îgambaani ûthi gûtuîrwa, nûkaanenkanîîrua kîrî mûcikaarî akwire nceera.

⁵⁹Na ga ngûkwîra, ûtiuma ku ûtamûrîîte mwanka ndururu ya mûthia.”