Read tharaka RUKA 14 Bible Online

RUKA 14 - tharaka bible

RUKA 14

¹Ntugû îmwe ya *Sabatû, Yiesû aathûngîra kûrîa irio nyomba ya mûtongoria ûmwe, *Mûbarisai. Antû bara baarî oogo baarîthania n'we bakîenda kwona bûra akaarûtha.

²Ikwarî na muntû ûmwe oogo aayîîtue mûrimo wa kwimba njara na magûrû.

³Yiesû aûria aarimû ba watho na Abarisai, “*Watho ibwîtîgîîrîîtie kworania ntugû ya Sabatû kana bûtiîtîgîîrîîtie?”

⁴Gûtirî we aaria. Yiesû ooria muntû ûyu, amûrekeeria aathi.

⁵Yiesû aûria, “N'ûû wacienu eegua arî na îng'ooi rîake kana ng'ombe yake îgûîte mûthûrûriini ntugû ya Sabatû, îndî atamîrute na mpwî?”

⁶Gûtirî we aûmba kûmûcookeria nwa ata.

⁷Yiesû akwona bûra bara beetîîtwe kîathooni beendaga gûkara mbere itîîni bia gîtîîyo, aatûmîra ngerekano abeera,

⁸“Ûgeetwa i muntû kîathooni ta kîa wiki, ûtikeende gûkara mbere. Mûgeni ûngî arî na gîtîîyo nkûrûki yaku aûmba kûûya.

⁹Na aaya, ûra abwîtîîte akaaya akwîre, ‘Tanenkera muntû ûyû kaanya akare aaga.’ N'îgi mûno ûthiîte gûcûa gîtî kîa nyuma ûkarîra.

¹⁰Ûkaaya gwîtwa kîathooni, îthi ûkare nyuma kaingo ûra agwîtîîte aaya akwîthîra ûkari nyuma akûthûkia akwira mbere, na ûgaatîîywa n'antû bonthe bara ûkeegua bûkîrîyanîra na bo.

¹¹Ûra akeeneneithia akaanyithua. Na ûra akeenyithia akaaneneithua.”

¹²Yiesû aacûûba mwene kîatho amwîra, “Waruga irio bia mûthenya kana bia ûgoro, ûtigeete acoore, aruanyûkwe, na antû beenu, kana itonga bia ntûûra yenu, n'ûntû wana bo bagaacooka bagwîte bakûrîe.

¹³Rîra ûrî na kîatho îtaga nkîa, bionje, ithua, na ntûngi;

¹⁴na ûkaathaarimwa n'ûntû bo batirî na gîntû gîa gûkûrîa na kîo. Ngai agakûrîa îgiita rîakinya rîa kûriûkua kwa bara baagîru.”

¹⁵Muntû ûmwe kîrî babu Yiesû aarîyanagîra na bo akwîgua ûgu amwîra, “Kîthaarimo i kîrî muntû ûra akaarîa mûgaate ûneneeni bwa Ngai!”

¹⁶Yiesû amwîra, “Muntû ûmwe naarugire kîatho kîînene mûno eeta antû baingî.

¹⁷Îgiita rîgûkinya, aatûma mûruti ngûgî wake aathi kwîra bara beetîîtwe îgiita rîgûkinya ibaaye kîathooni.

¹⁸“Îndî wamuntû aarî ûmwîte aanjîîria kweyana gîtûmi gîake gîa kûrega kûthi. Wa mbere auga, ‘Kûrî mûnda ndaragûrire na mbuîrîîte nthi gûcuona bûra ûkari. Itû ndekera.’

¹⁹“Wa baîrî auga, ‘Kûrî ncamba ciakwa îkûmi cia mûraaû ndaragûrire, na mbuîrîîte nthi kûgeria mbona bûra ikûruta ngûgî. Itû ndekera.’

²⁰“Wa bathatû auga, ‘Ndî na mwiki. Kwoogu ntiûmba kûûya.’

²¹“Mûruti ngûgî ûyu aatûmîîtwe aacooka eera mûnene wake bûra antû babu baugire. Mûnene akwîgua ûgu baugire aathûûra mûno. Eera mûruti ngûgî ûyu wake, ‘Taumagarûka na mpwî ûthi barabaraani cia taûni, iinene na iiniini wîte nkîa, bionje, ntûngi na ithua.’

²²“Mûruti ngûgî ûyu aarûtha ûgu eerîîtwe. Aacooka eera mûnene, ‘Nkûrûtha bûra ûkûmbîîrîîte, îndî wana îîndî nyomba îrî na kaanya kaûmba gûkara antû bangî.’

²³“Mûnene eera mûruti ngûgî, ‘Umagarûka kaîrî ûthi na barabara na njîra ira igendeete mîankaani ûkinyîîrie wamuntû wonthe ûra ûkoona aaye, kaingo nyomba yûyûra.

²⁴Ga nkûbwîra, gûtirî muntû kîrî bara ndareetîîte akaarûma nwa mbi ya kîatho gîakwa.’ ”

²⁵Îgiita rîmwe kîrîndî gîa antû ikîathiyanîîtie na Yiesû. Yiesû abacûûba abeera,

²⁶“Gûtirî muntû atuîka mûrutwa wakwa, nwanga akambenda nkûrûki ya bûra eendeete îthe na gina, mwekûrû wake na twana twake, kana aruagina na aaragina, kana bûra eendeete mwoyo wake.

²⁷Muntû atakamata mûtharaba wake aanthingata atiûmba gûtuîka mûrutwa wakwa.

²⁸“Muntû akeenda gwaka nyomba îndaaya, mbere nwa mwanka atare mbia ira ikwendekana kûmîûyûria oone kana arî na cio

²⁹atikaaye kwînjîra mûcingi îrema kûûyûra, antû bamîona bamûthekeera bauga,

³⁰‘Eneeni ûyû kaayia aranjîîrîîtie gwaka nyomba aaremwa kûmîûyûria!’

³¹“Î kana rî, anga kûrî mûnene eetîgîra kûrûa na mûnene ûngî mbere ya aamba gûkara nthî athûgaania bwega oona kana kwaûmbîka akarûa na mûnene ûyu akwenda barûa we arî na acikaarî ngiri mîrongo îîrî, n'we arî na acikaarî ngiri îkûmi?

³²Akoona atiûmba ndûa înu, n'antû atûma bakathi kûromba mûnene ûyu ûkiri arî kûraaya, mbere ya bakinyanîîra.

³³Kwoogu gûtirî we wacienu aûmba gûtuîka mûrutwa wakwa, nwanga agatiganîria bionthe bira arî na bio.”

³⁴“Mwonyo n'ûmwega, îndî ûkathira mûcamo ûtiîkîrîka uu kaîrî.

³⁵Ûkarire ûgu, ûtirî gîtûmi kaîrî n'ûntû ûtigerwa mûndaani ûtuîka mboreo. Nûteeyagwa. Ûra arî na matû neegue.”