Read tharaka RUKA 17 Bible Online

RUKA 17 - tharaka bible

RUKA 17

¹Yiesû eera arutwa baake, “Mantû mara matûmaga antû beeyia matiûra. Îndî muntû ûra areetaga mantû ta mamu akoona thîîna mûno!

²Muntû ta ûyu i kaaba akoogeerwa iiga rîa kûthia nkingo akagerwa îriani bantû atûma nwa ûmwe wa baba baniini beeyia.

³Kwoogu îmenyeereeni mantûûni mara bûkûrûtha! “Mûruanyûkwe akûbîtîria mûkaanie. Na akaaya kwîrira mûrekere.

⁴Na agakûbîtîria maita maingî[9] ntugû îmwe, na wakîra îgiita agacooka akaaya agakwîra, ‘Nkwîrira,’ nwa mwanka ûmûrekere.”

⁵Atûmwa beera Mwathani, “Mwathani, twongeere wîtîgio bwetû!”

⁶Mwathani abeera, “Ûkeegua bûrî na wîtîgio, wana ûkeegua i bûgana gapîndî ka mûtî kara kaniini kîrî mpîndî cionthe, nwa bwîre mûkûyû ta ûyû kûûka ûkagwe îriani na wîbînjîre oogo, na gûgakara woogu.”

⁷Yiesû abaûria, “N'ûû wacienu eegua arî na mûruti ngûgî wa mûnda kana wa kûmûrîîthîria, na aaya ûgoro kuuma ngûgîîni ûkamwîra, ‘Ncû îîndî ûkare nthî ûrîe irio’?

⁸Gûtirî we! Nwanga ûkamwîra, ‘Ndugîra irio ndîe. Îkîra nguo ciaku cia ûrugî ûndeetere irio mbambe ndîe na nyue, woû ûgaacooka kûrîa na kûnyua nyumaani.’

⁹Tika mûruti ngûgî abatîîrue acookerua nkaatho aaruta ngûgî îra abatîîrue kûruta.

¹⁰Kwoogu wana biû bwaruta ngûgî ira bûbatîîrue kûruta, ugagaani, ‘Tiû tûrî aruti ngûgî batarî nwa ata, tûrîrûtha mantû mara tûbatîîrue kûrûtha monka.’ ”

¹¹Yiesû akîthi bwa Njerusaremu aakûrûkîîra mwankaani wa Samaria na Gariiri.

¹²Agûkinya taûni îmwe aakomana na antû îkûmi baayîîtue mûtigiri. Antû babu baarûngama gataaria

¹³bakiugagîîria na inya, “Yiesû, mwarimû, twîgue kîao!”

¹⁴Yiesû akûboona abeera, “Îthiini bûkoonwe i mûthînjîri wa Ngai.” Bathiîte na njîra woogu boorua, baathera.

¹⁵Ûmwe wa bo akwona akworua, aacooka nyuma akiugagîîria na inya agîkumagia Ngai.

¹⁶Eekurumania na ûthiû magûrûûni ma Yiesû, amûcookeria nkaatho. Aarî Mûsamaria.

¹⁷Yiesû aûria, “Anga t'antû îkûmi bara mboriirie? Barîkû bara bangî kenda?

¹⁸Gûtirî muntû ûngî aracooka gûcookia nkaatho nwa mûgeni ûyû wenka?”

¹⁹Yiesû amwîra, “Ûkîîra ûthi, wîtîgio bwaku bûgûtûma wora.”

²⁰*Abarisai bamwe bakûûria Yiesû rîra ûnene bwa Ngai bûkaaya, Yiesû aabacookeerie abeera, “Ûnene bwa Ngai bûtiiya bûkîonagwa na meetho,

²¹kana antû bakiugaga, ‘Eneeni i bûûbû,’ kana ‘I bûûra,’ n'ûntû wana îîndî bûrî aaga bûrî.”

²²Eera arutwa baake, “Îgiita rîkaaya bwende kwona Mwana wa Muntû, îndî bûtimwona.

²³Kûrî bo bakaabwîra, ‘Eneeni n'ûûra aara!’, kana ‘N'ûyû aaga!’ Bûtikaaraithe noogo kana bûbathingata.

²⁴Wata bûra rweni rwenia rwonagwa i bonthe n'ûntû rûmûrîkaga nteere cionthe cia îgûrû, i ta bu kûûya kwa Mwana wa Muntû gûgaakara.

²⁵Îndî mbere, nwa mwanka anyamaare mûno na aregwe n'antû ba nthuke îno.

²⁶“Wata bûra gwakarîkire ntugû cia Nuu, i ta bu gûgaakarîka ntugû ya kûûya kwa Mwana wa Muntû.

²⁷Mbere ya nthîgûrû îkondorua i rûûyî, antû baarîyaga na bakanyua, bakagûrana na bakagûrwa, mwanka rîra Nuu aathûngîîre cabinaani mûguû waya wakondoria nthîgûrû antû bonthe baakua.

²⁸“Na nthîgûrû îgaakara ta îgiita rîa Rooti. Antû baarîyaga na bakanyua, bakagûranîra na bakeendanîria into, bakaanda na bagaaka nyomba,

²⁹mwanka ntugû îra Rooti aumire Sondomu. Gwacooka kwaura mbura ya mwanki wa ûbiriti[10] kuuma îgûrû matuuni yaûraga antû bonthe.

³⁰Ûgu i ta bu gûgaakarîka rîra Mwana wa Muntû akaaya.

³¹“Ntugû înu ûra akeegua atwete rûûgûrû rwa nyomba yake naatagûrûka athûkia into biake nyomba. Na ûra akeegua arî mûndaani, atikaathûgaanie gûcooka mûciî.

³²Ririkanaani mwekûrû wa Rooti!

³³“Muntû ûra acûaga gwîtûûria mwoyo wengwa agacuaga. Îndî ûra agaakua n'ûntû bwakwa, agaatûûra mwoyo.

³⁴Na ga nkûbwîra, ûtugû bûbu antû baîrî bakeethîîrua bamaami gîtandaani kîmwe, ûmwe athûkue ûyu ûngî atigwe.

³⁵Aka baîrî bakeethîîrua bakîthiagîra amwe, ûmwe athûkue ûyu ûngî atigwe. [

³⁶Antû arûme baîrî bakeethîîrua barî mûndaani, ûmwe athûkue ûyu ûngî atigwe.]”[11]

³⁷Arutwa baake bamûûria, “I na kû mantû mamu magaakarîkîra, Mwathani?” Yiesû abacookeria abeera, “Ara kiimba kîrî noogo nderi igwîyaga.”