Read tharaka RUKA 19 Bible Online

RUKA 19 - tharaka bible

RUKA 19

²Ikwarî na muntû aarî oogo eetagwa Cakayo. Aarî mûnene wa arûngithia ûgooti na aarî gîtonga.

³Cakayo neendaga kwona Yiesû, îndî gûtaûmbîkanaga n'ûntû aarî muntû ûmûkubî mûno. Agûcûûgia gûtûrithîîria meetho kîrîndîîni gîa antû ataamwona.

⁴Akûrega kûmwona, augia rwîro arî mbere ya kîrîndî aatwa mûkûyûûni kaingo amwona n'ûntû Yiesû aakûrûkîîrîîte njîraani înu.

⁵Yiesû agûkinya agu mûtîîni ûyu, aacûûba îgûrû amwîra, “Cakayo gûrûka na mpwî. Îmunthî nwa mwanka ntuîke mûgeni waku.”

⁶Nthûti weenu Cakayo aagûrûka. Baathi mûciî wake barî na Yiesû amûgwata ûgeni akeneete mûno.

⁷Antû baingî bakwona ûgu, baanjîîria kûnung'una bakiugaga, “Ka atuîkire mûgeni mûciî wa mwîyia?”

⁸Cakayo aarûngama eera Mwathani, “Mwathani, raitha wone nkîgaîra nkîa nucu ya ûtonga bwakwa. Na weegua kûrî muntû ntunyîîte gîntû gîake na njîra îtaagîrîte, nkamûrîa kîo maita mana.”

⁹Yiesû amwîra, “Îmunthî antû ba mûciî ûyû bûkwonokua, n'ûntû igûkwonekana wabu i mwana wa rûrîîyo rwa Îburaîmu atûîre nyomba îno.

¹⁰Mwana wa Muntû aayire gûcûa antû bara baûrîîte aboonokia.”

¹¹Antû bathikîîrîîtie mantû mamu, Yiesû aathi na mbere kûbaarîria agîtûmagîra ngerekano. Na n'ûntû aarî akubî gûkinya Njerusaremu, antû baathûgaanagia ûnene bwa Ngai bûrî akubî mûno. Yiesû abaa ngerekano akîbaruta mathûgaanioni mamu baarî na mo.

¹²Abeera, “Ikwarî na muntû ûmwe aarî îgweta aathiîte nthîgûrû îngî yarî kûraaya na kwao atuîkithua mûnene acooka.

¹³Mbere ya athi, eeta aruti ngûgî baake îkûmi. Bonthe abaa mbia iganeene. Abeera, ‘Wamuntû nakabaitanie mbia inu ndabwa, mwanka rîra ngacooka.’ Rîru aathi.

¹⁴“Antû ba nthîgûrû yao bataamwendaga. Baatûma antû bamûthingatia ntûmwa îkuuga batikwenda atuîka mûnene wao.

¹⁵“Muntû ûyu agûtuîkithua mûnene aacooka kwao kaîrî. Aaruta watho auga eetîrwe aruti ngûgî bara aatigîîte aagaîra mbia, amenye baita îra boonire na cio.

¹⁶Mûruti ngûgî wa mbere aaya amwîra, ‘Ndabaitaniirie mbia ira wannenkeere maita îkûmi.’

¹⁷“Mûnene wake amwîra, ‘I bwega mûno, ûrî mûruti ngûgî ûmwega. Na n'ûntû ûgûtuîka mwîtîgua na biikai, ngûgûtuîkithia mûnene ûkaathaga taûni îkûmi, kîrî kîewa.’

¹⁸“Mûruti ngûgî wa baîrî aaya. Amwîra, ‘Mûnene, mbaitanîîtie mbia ira wannenkeere maita mataano.’

¹⁹“Mûnene amwîra, ‘Ngûgûtuîkithia mûnene, ûkaathaga taûni itaano.’

²⁰“Wa bathatû we akûûya, amwîra, ‘Mûnene, mbia ciaku ira wannenkeere n'ino. Ndaciaigire bwega, n'ino igana wabûra wannenkeere igana.

²¹Indagûkuthûkire n'ûntû woû ûrî muntû atarî kîao. Ûthûkagia bira bitarî biaku na ûkethaga bira ûtaanda.’

²²“Mûnene amwîra, ‘Woû ûrî mûruti ngûgî ûmûthûûku! Ngaakûgiitîra îgamba kûringana na mîgambo yaku îra waria wengwa. Weegua waiyî ntirî kîao, nthûkagia bira bitarî biakwa, na nkethaga ara ntaanda,

²³i mbi îîndî n'ûntû ûtaambaigîra cio mbanki, kaingo ndaaya nthûkia irî na baita?’

²⁴Mûnene eera antû bara baarî agu bamûtunye mbia inu aarî na cio banenkere ûra ooneete baita maita îkûmi.

²⁵“Antû babu bamwîra, ‘Mûnene, akaanenkerwa mbia na ingî arî na cio maita îkûmi!’

²⁶“Mûnene abacookeria abeera, ‘Ga nkûbwîra, ûra arî na gîntû nkamwongeera. Îndî ûra gûtarî kîo arî na kîo, wana gîîkai kîra arî na kîo nagaatunywa.

²⁷Anthû baakwa na bo bara batireendaga ntuîka mûnene wao bareeteeni aaga bûbaûrage nkîonaga!’ ”

²⁸Yiesû akûthiria kwaria mantû mamu, aathi na mbere na rûgendo, athiîte Njerusaremu.

²⁹Arî akubî gûkinya gataûni geetagwa Bethipage na kangî geetagwa Bethania, Karîmaani ka Mîceituuni, aatûma arutwa baake baîrî baathiyaga barî mbere.

³⁰Abeera, “Îthiini gataûni gaka karî mbere aaga, na bwakinya oogo bûkoona kayaû ka îng'ooi kathaîkîîtwe gataakamata muntû. Bûthaûre ko bûreete.

³¹Na ûra akaabûûria i kî n'ûntû bûgûkathaûra, bûmwîre, ‘I Mwathani arî bata na ko.’ ”

³²Arutwa babu baathi beethîra mantû makari wata bûra Yiesû aabeerîîte.

³³Bakîthaûra kang'ooi gaku, eene ko babaûria, “I kî n'ûntû bûkûthaûra kayaû gaku?”

³⁴Arutwa babacookeria babeera, “I Mwathani agûkeenda.”

³⁵Baareetera Yiesû ko. Bamwarîra tûbuuti twao mûgongo wa ko, Yiesû aakarîra.

³⁶Athiîte agatwete, antû bamwarîra tûbuuti twao barabaraani.

³⁷Agûkinya akubî na Njerusaremu, mûtûndûrûkooni wa barabara îra yayîrîîte Karîmaani ka Mîceituuni, arutwa baake bonthe baakena, baakaatha Ngai na tûyû twa îgûrû n'ûntû bwa biama bia inya bionthe bira boonire akîrûtha.

³⁸Baugaga, “N'ûmûthaarime mûnene ûra aayîîte kwa riîtwa rîa Mwathani! Ûkiri ibwîgue bûrî îgûrû na ûkumio kîrî Ngai!”

³⁹*Abarisai bamwe baarî kîrîndîîni gîku gîa antû beera Yiesû, “Mwarimû, kaania arutwa baaku ûbeere bakire!”

⁴⁰Yiesû abacookeria abeera, “Ga nkûbwîra, wana baba bagakira, maiga mama magaatûmîîria.”

⁴¹Yiesû arî akubî gûkinya Njerusaremu aagera meetho mbere oona taûni înu, amîîgua kîao. Aanjîîria kûrîra

⁴²akiugaga, “Ûtakîîgua ikûûmbîka ntugû ya îmunthî ûkamenya mantû mara magaakûreetera ûkiri! Îndî na rîo ûtimenya n'ûntû ûrî ûmwithe mo.

⁴³Îgiita rîgaakinya anthû baaku bagûkîmbe nteere cionthe wage a kuumîîra.

⁴⁴Bagaakwomoranga na bacooke baûrage antû bara batûîre ndeni. Na gûtirî iiga rîgaatigwa rîtûûganîîrîîte na rîra rîngî, n'ûntû ûtiiyî kana gaka i ko kaanya kara Ngai aakwete ga kwonoka!”

⁴⁵Yiesû aathi nyomba ya Ngai eengatia antû ku bonthe bara baagûranagîra na beendanagîria

⁴⁶akîbeeraga, “Kwandîkîîtwe *Maandîkooni Maatheru, ‘Nyomba yakwa îgeetagwa nyomba ya kûndombera,’ îndî biû bûmîtuîkithîîtie ‘îkurungu rîa kwîbithaga aamba’!”

⁴⁷Wakîra ntugû Yiesû aathiyaga nyomba ya Ngai kûrutana antû. *Athînjîri bara banene ba Ngai, aarimû ba watho na atongoria ba antû ibeendaga kûmûûraga.

⁴⁸Îndî batoona kaanya n'ûntû antû baakaraga bathiûrûkîîrîîte Yiesû rîonthe akîbarutanaga. Antû bateendaga gûkûrûkîrwa i katheto nwa kamwe.