Read tharaka RUKA 20 Bible Online

RUKA 20 - tharaka bible

RUKA 20

¹Ntugû îmwe Yiesû naarutanaga antû akîbatûmagîîria ntheto îmbega nyomba ya Ngai. *Athînjîri bara banene ba Ngai, aarimû ba watho, amwe na akûrû bangî baaya kîrî we. Bamwîra,

²“Tatwîre ara ûrutîîte watho bwa kûrûtha mantû mama ûkûrûtha. N'ûû akwete bu?”

³Yiesû abacookeria abeera, “Wana niû ka mbûûrieni.”

⁴Abaûria, “I kû Njoana aarutîîte watho bwa kûbaatithania? I kuuma kîrî Ngai kana i kuuma kîrî muntû?”

⁵Baanjîîria kwîrana, “Twamwîra, ‘I kuuma kîrî Ngai,’ agaatûûria, ‘I kî aabu n'ûntû bûtaamwîtîgia?’

⁶Twamwîra, ‘I kuuma kîrî muntû,’... arî, tiga! Kîrîndî gîgatûûraga na maiga n'ûntû antû bonthe ibeetîgîîtie Njoana aarî kîroria.”

⁷Kwoogu beera Yiesû, “Tûtiiyî.”

⁸Yiesû abeera, “Wana niû ntibwîra ara ndutîîte watho bwa kûrûtha mantû mama nkûrûtha.”

⁹Yiesû eera antû ngerekano îno. Auga, “Kagiita kamwe ikwarî na muntû aarîmîîte mûnda wake aanda ncabiibû. Rîru aakomborithania mûnda ûyu aathi rûgendo aakara îgiita rîraaya.

¹⁰“Îgiita rîa maketha rîgûkinya, muntû ûyu aatûma mûruti ngûgî wake kîrî antû babu aakomborithîîtie mûnda. Eera mûruti ngûgî ûyu wake athi amûgîîrîre bira biarî biake makethaani mamu kûringana na bûra baagwatanîrîte na antû babu. Mûruti ngûgî ûyu agûkinya, antû bara baakomboreete mûnda ûyu bamûgwata bamûtura. Bamwîngatia aacooka atarî na gîntû.

¹¹Mwene mûnda aatûma ûngî kaîrî. Wana we agûkinya, antû babu bamûtura, bamûrûtha mantû maathûûku, bamwîngatia aacooka atarî na gîntû.

¹²Mwene mûnda aacooka aatûma mûruti ngûgî ûngî, wa bathatû. Îndî wana we bamûtonyanga, bamwîngatia mûndaani.

¹³“Mwene mûnda eebûûria, ‘N'ata nkûrûtha?’ Auga, ‘Ga ntûme mwana wakwa wengwa ûra mbendeete mûno, baûmba kûmûtîîya!’

¹⁴“Antû babu bakwona mwana wa mwene mûnda beerana, ‘Ûyû n'we mwene rûgai. Tûmûûrageeni kaingo rûgai rûtuîka rwetû!’

¹⁵Bamûgwata baathi bamûûragîra ome ya mûnda.” Yiesû abaûria, “Bûrîthûgaania mwene mûnda akaarûtha ata?”

¹⁶Yiesû abeera, “Akaathi athirie antû babu, akomborithie antû bangî mûnda wake.” Antû bakwîgua ûgu, bauga, “Irû! Ngai teethia ûntû bûbû bûtigaatuîkîke!”

¹⁷Yiesû abaraitha, abaûria, “Anga bûtaathooma bûra kwandîkîîtwe *Maandîkooni Maatheru? ‘Iiga rîra rîongwa aaki baaregire, îîndî i rîo rîtuîkîîte rîa koona.’

¹⁸Muntû wonthe ûra akaagwîra iiga rîrî nakaunîkanga tûcuncî tûcuncî. Na ûra rîkaagwîra rîrî rîo irîkaamûthithira.”

¹⁹Aarimû ba watho na *athînjîri bara banene ba Ngai bakwîgua ngerekano înu, baamenya i bo Yiesû aatemagia. Baanjîîria gûcûa bûra bakîmûgwata warîo, îndî baakuthûka kîrîndî.

²⁰Kwoogu atongoria baanjîîria gûcûa kaanya ga kûgwatithia Yiesû. Baatûma athigaani kûûria Yiesû biûria bia kûmûtega na bio beetuîkithîîtie n'antû baagîru. Beendaga kwîgua bûra agaacookia biûria kaingo boona bwa kûmûthitanga na bu kîrî ngabana wa Rooma, amûgwata.

²¹Athigaani babu beera Yiesû, “Mwarimû, itwiyî waragia bûra kwagîrîte na ûrutanaga bûra kwagîrîte. Ûtiendagîîra bamwe ûmena bara bangî, na ûrutanaga bûra bungwa mantû ma Ngai makari.

²²Twîre weegua itwagîrîtwe tûrûngaga ûgooti kîrî Kaisaarî kana tûtiagîrîtwe?”

²³Yiesû aamenya ûûme bwao. Abeera,

²⁴“Tamboniani ciringi înu.” Abaûria, “Ûthiû bûbû i bwa ûû? Na riîtwa rîrî i rîa ûû?” Bamûcookeria bamwîra, “Bionthe i bia Kaisaarî.”

²⁵Yiesû abeera, “Kwoogu nenkagîraani Kaisaarî into biake. Na Ngai n'we mûnenkagîreeni bira birî biake.”

²⁶Bataûmba kûmûtega na rwaria rwake rûru aariirie antû bakîîgagua. Baarigara mûno n'îcookio rîake, baakira ki.

²⁷*Asandukai bamwe baathi kîrî Yiesû. Na wîtîgio bwa Asandukai n'atî, gûtiûmbîka muntû ûmûkuû ariûka. Bakûthi beera Yiesû,

²⁸“Mwarimû, Musa aatwandîkîîre watho atwîra, ‘Muntû akagûra mûka, îndî agakua mbere ya bagîa na kaana, mûruagina nabatîîrue athûkia mûka ûyu aciarîra mûruagina mbeû.’

²⁹Kwa ngerekano, kagiita kamwe ikwarî na nthaka mûgwanja cia muntû ûmwe. Ûra mûkûrû akûgûrana, aakua atatigîîte mbeû.

³⁰Mûruagina ûra aamûkinyîîte mûgongo aathûkia mûka ûyu. Îndî wana we aakua atarî mbeû.

³¹Wa bathatû akûthûkia mûka ûyu, wana we aakua atakûrî gûtiga mbeû. Bonthe barî mûgwanja baathûkagia mûka ûyu wabagîkuyaga batagûtiga mbeû

³²mwanka mûka ûyu n'we aakua mûthiani.”

³³Asandukai babu baûria Yiesû, “Îîndî rî, rîra antû bakaariûkua mûka ûyu agaatuîka wa ûû n'ûntû ingî nthaka inu cionthe irî mûgwanja iciamûgûrîîte?”

³⁴Yiesû abacookeria abeera, “Antû ba nthîgûrû îno ibagûranaga,

³⁵îndî rîra antû bakaariûkua batiigûrana kana bagûrwa.

³⁶Ûkeegua bakari ta araîka ba îgûrû na batiûmba gûkua kaîrî n'ûntû bo ûkeegua barî aana ba Ngai bariûkîîtue bauma gîkuûni.

³⁷Mantû ma kûriûkua gwa antû bakuû na mo, wana Musa naandîkîîte bwega bantû ara agweteete mantû ma gakando kara gaakanaga mwanki. Bantû agu kwandîkîîtwe atî Ngai augire, ‘Niû ndî Ngai wa Îburaîmu, Isaka na Njakubu.’

³⁸Kwoogu we ti Ngai wa bara bakuû. I Ngai wa bara barî mwoyo, n'ûntû kîrî we bonthe babu barî mwoyo.”

³⁹Aarimû bamwe ba watho bamwîra, “Mwarimû, ûkuuga bwega!”

⁴⁰Na kuuma rîru gûtirî we waciao aaûmîîria kûmûûria kîûria kîngî.

⁴¹Yiesû abaûria, “N'ata antû baûmba kuuga Kîrîstû i mwana wa Ndaundi?

⁴²Îbukuuni rîa Cabuurî, Ndaundi we wengwa augîîte, ‘Mwathani Ngai neerire Mwathani wakwa, “Kara nthîgûrû rûteere rwakwa rwa ûrîo,

⁴³mwanka ntuîkithie anthû baaku ûkinyo bwa magûrû maaku.” ’

⁴⁴Ûkaaya kwîgua Ndaundi we wengwa arîmwîta ‘Mwathani’, n'ata îîndî Kîrîstû aûmba gûtuîka mwana wake?”

⁴⁵Antû bonthe bathikîîrîîtie, Yiesû eera arutwa baake,

⁴⁶“Îmenyeereeni kîrî aarimû ba watho. Beendaga kûthi beekîrîte nguo indaaya na gûkeethagua n'antû na gîtîîyo baarîîkana na bo. Beendaga gûkara itîîni bia mbere bia gîtîîyo rîra barî *masinagoogiini. Na baathi biathooni beendaga gûkara ara arî gîtîîyo.

⁴⁷Beenagîîria ntigwa bakairîîra into. Na rîra bakûromba, beendaga kûromba maromba maaraaya bakîenda antû boona. Îgamba rîao ûkeegua rîrî rîthûûku nkûrûki!”