Read tharaka RUKA 21 Bible Online

RUKA 21 - tharaka bible

RUKA 21

¹Yiesû aaraithîîria oona bûra itonga biarutaga mbia bigîîkagîra îthandûkûûni rîra rîethîranagîrua biewa nyomba ya Ngai.

²Oona ntigwa îmwe nkîa yaruta tûcerecere twîrî.

³Yiesû eera arutwa baake, “Na mma ga nkûbwîra, ntigwa îno nkîa îkûruta mbia inyingî nkûrûki ya bara baaruta bonthe.

⁴N'ûntû bara bangî bonthe baaruta biewa bûra barî na cio. Îndî ntigwa îno yo, amwe na ûkîa bwa yo yaruta kîonthe kîra îkwîgwetie.”

⁵Arutwa bamwe ibaugaga bûra nyomba ya Ngai yaakîîtwe bwega na maiga maathongi, na bûra yagemeetue na twiga twa goro tûthongi tûra antû barutagîra Ngai tûrî biewa biao. Yiesû auga,

⁶“Into bibi bûkwona bionthe, îgiita rîgaakinya wîgue gûtirî iiga rîgaatigwa rîrî îgûrû ya rîra rîngî. Monthe imakaanyagaarua.”

⁷Arutwa babu bamûûria, “Mwarimû, tatwîre i rî mantû mamu magaakarîka, na i mbi îkoonania marî akubî gûkarîka?”

⁸Yiesû abeera, “Îmenyagîîreeni bûtikeeneerue i muntû n'ûntû antû baingî bakaaya bagîtûmagîra riîtwa rîakwa bakauga i bo Kîrîstû, na bakiugaga, ‘Kagiita i gaakinyu!’ Bûtikaabathingate.

⁹Bweegua ndûa ikîrûîgwa na bweegua gacagaca inyingî, bûtikaamake. Nwa mwanka mantû ta mamu meegue marî oogo mbere ya îgiita rîa mûthia rîkinya. Îndî ûyu t'uu mûthiro.”

¹⁰Yiesû aathi na mbere abeera, “Nthîgûrû îkaarûa na îra îngî, ûnene bûrûe na bûra bûngî.

¹¹Nthîgûrû îkainaina mûno, mayûûra makeegua marî gûntû na gûntû, na ûkeegua kûrî na ndwari inthûûku. Ûkeegua kûrî na mantû maingî ma kûmakania na magegania ma kûrigaria makoonekana kuuma îgûrû.

¹²“Na mbere ya mantû mamu matuîkîka, bûkaagwatwa bûnyamaarue, bûtuîrwe îgamba *masinagoogiini, na bwingîrwe nceera. Bûkairwa kîrî anene na mangabana n'ûntû bwakwa.

¹³Na gaka ûkeegua karî kagiita keenu keega ga gûkûûyîîra.

¹⁴Mbere ya bûgiitîrwa îgamba bûtikeenyamaarie bûgîcûa bûra bûgaacookia.

¹⁵Îgiita rîakinya, i niû nkaabwaa ûûme mbwîre bûra bûkauga, bûra anthû beenu batakîûmba kûrega kana bakararia.

¹⁶Bûgaakunyanîrwa n'aciari beenu, aruanyûkwe, antû ba mwîrîga wenu, acoore beenu na bamwe beenu bakabûûragithia.

¹⁷Antû bonthe bakabûthûûra n'ûntû bwakwa.

¹⁸Îndî gûtirî kinya rûtundu rwa biongo bienu rûkaûra.

¹⁹Kûûmîîria kwenu gûkoonokia mîoyo yenu.”

²⁰Kaîrî Yiesû auga, “Rîra bûkoona Njerusaremu yakîmbwa i njûûrî cia acikaarî, bûmenye kwînyangua kwa yo kûrî akubî.

²¹Bara ûkeegua barî Njundea, ibakuthûke bathi irîmaani. Bara ûkeegua barî gûku taûni ya Njerusaremu, nwa mwanka baume ku. Na bara na bo ûkeegua batarî naagu taûni, batikaathi noogo.

²²Ntugû inu i ntugû cia îkaanûkia, kaingo *Maandîko Maatheru maûyûra.

²³Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku! Antû ba nthîgûrû bonthe bakaagwatwa i kînyamaara kîînene, na Ngai akaboonia bûra bamûthûûrîîtie bûgana.

²⁴Antû bamwe bakaûragîrwa ndûani. Bara bangî bataîgwe bairwe nceera nthîgûrû ingî. Njerusaremu îkaathwa n'antû bangî batarî Ayaundi mwanka rîra îgiita rîao rîkaathira, kûringana na mûbango wa Ngai.”

²⁵Yiesû aathi na mbere na kuuga, “Antû bakoona magegania kuumania na riûa, mweri, na nthata. Nthîgûrû cionthe îkaagîa thîîna, antû baage wîrîgîîro n'ûntû bwa gîtuma kîra makûmbî ma rûûyî rwa îria makaaringa.

²⁶Ûguaya na mathûgaanio bikaagirîkia antû baathûgaanîria mantû mara ûkeegua maayîîte gûtuîkîka nthîgûrû. Mainya ma îgûrû makainainua.

²⁷Rîru i rîo antû bakoona Mwana wa Muntû aayîîte na îtu, arî na inya na mwago ûmûnene.

²⁸Rîra mantû mamu magaakarîka, bûrûngame na ûcamba n'ûntû gûkûûrwa kwenu ûkeegua kûrî akubî.”

²⁹Yiesû abaa ngerekano abeera, “Tathûkiani ngerekano ya mûkûyû na mîtî îra îngî yonthe.

³⁰Rîra bwonaga mathangû maaririma ibûmenyaga thaano îrî akubî.

³¹Ûgu i ta bu ûkeegua kûrî rîra bûkoona mantû mamu magîkarîka. Rîra magaatuîkîka bûmenye n'ûnene bwa Ngai bwathengeera.

³²“Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru.

³³Îgûrû na nthîgûrû bikaathira, îndî biugo biakwa bitikooro bithira.”

³⁴Yiesû abeera, “Îmenyagîîreeni bûtikaagwatwe ûkombo i mîkarîre îtarî mîega, ntogoona, kana mantû ma nthîgûrû îno. N'ûntû bûkeethûngîria mantûûni ta mamu bûtiikara bwîthuuranîrîte. Ntugû îgaakinya

³⁵îbûkirimanie ta mbea mûtegooni, ta bûra antû ba nthîgûrû bagaakirimanua gûntû kunthe.

³⁶Kwoogu îmenyeereeni na rombagaani magiita monthe, kaingo bûûmba gwota gûkûrûkîîra mantûûni mamu monthe, na kaingo bûûmba gwîtîgîîrîka i Mwana wa Muntû.”

³⁷Wakîra ntugû Yiesû aathiyaga nyomba ya Ngai akarutana antû. Ûgoro bwakinya aathiyaga kûraara Karîmaani ka Mîceituuni.

³⁸Rûkîîrî antû bonthe baathiyaga nyomba ya Ngai bakamûthikîîria akîrutana.