Read tharaka RUKA 22 Bible Online

RUKA 22 - tharaka bible

RUKA 22

¹*Kîatho kîa mîgaate îtaimbithîîtue gîatigeerie ntugû inkai gîkinya. Ntugû ya mbere ya kîatho yeetagwa *Pasaka.

²*Athînjîri bara banene ba Ngai na aarimû ba watho ibaacûaga bûra bakîûragithia Yiesû. Bateendaga antû bamenya n'ûntû ibaabakuthûkaga.

³Rîru i rîo Nkoma yathûngîîre Njundas ûra eetagwa Mûcikariota, ûmwe wa arutwa bara îkûmi na baîrî ba Yiesû.

⁴Njundas aathi kwonana na athînjîri bara banene ba Ngai na anene ba acikaarî bara baakaragia nyomba ya Ngai. Baaranîria bûra akaabateetheeria bagwate Yiesû.

⁵Baakena baagwatanîra bakamwaa mbia.

⁶Njundas eetîgîîria, aanjîîria gûcûa kaanya keega ga gûkunyanîra Yiesû antû batakûmenya.

⁷Ntugû yakinya ya *kîatho kîa mîgaate îtaimbithîîtue, rîra kagondu ga kûrîgwa ntugû înu ya *Pasaka kaabuîrîîte kûûragwa.

⁸Yiesû aatûma Petûrû na Njoana abeera, “Îthiini bûgatûthuuranîre biakûrîa bia Pasaka tûrîe.”

⁹Bamûûria, “I kû ûkwenda tûthi kûbithuuranîra?”

¹⁰Yiesû abeera, “Bwakinya taûni ya Njerusaremu bûkaarîîkana na muntû akamatîîte nyûngû îrî na rûûyî. Bûmûthingate mwanka nyomba îra akaathûngîra

¹¹bûthûnganîîrie n'we ku, bwîre mwene nyomba înu ûûgû, ‘Mwarimû atwîra tûkûûrie ûtwonie kanyomba kara akaarîîra kîatho gîa Pasaka amwe na arutwa baake.’

¹²Muntû ûyu, mwene nyomba akabwonia kanyomba kaaneene ngorobaani kaathuuranîre kaigwa kîra gîntû. Gûku i ku bûkaathuuranîra kîatho.”

¹³Arutwa babu baathi. Bakûthi mantû monthe maakarîka wabûra Yiesû aabeerîîte. Baathuuranîra kîatho gîa Pasaka.

¹⁴Thaa igûkinya, Yiesû na arutwa baake baakara amwe barîa.

¹⁵Yiesû abeera, “Indareendeete mûno tûrîyanîra naabi kîatho gîkî mbere ya nkua.

¹⁶Na ga nkûbwîra ntiirîa *Pasaka ta îno kaîrî, tatiga rîra ûnene bwa Ngai bûkaaya.”

¹⁷Yiesû akuuga ûgu, aathûkia gîkombe aacookeria Ngai nkaatho. Auga, “Thûkiani bûkînenkanagîîria.

¹⁸Na ga nkûbwîra, ntiinyua ndibei kaîrî tatiga rîra ûnene bwa Ngai bûkaaya.”

¹⁹Aathûkia mûgaate na uu, aacookeria Ngai nkaatho. Aung'enyûrania, aanenkera arutwa baake. Auga, “Ûyû i mwîrî wakwa ûra ûnenkanîrîtwe n'ûntû bwenu. Rûthagaani ûûgû n'ûntû bwa kûndirikanaga.”

²⁰Arutwa bakûthiria kûrîa, Yiesû abanenkera gîkombe na kîo. Auga, “Gîkombe gîkî i nthakame yakwa îra îgeetûûrwa n'ûntû bwenu îrî rwano rwa kîrîîkanîro kîîyerû.

²¹Ûra agaankunyanîra nwa tûkûrîyanîra n'we aaga.

²²Mwana wa Muntû agaakua n'ûntû ûgu i bu mûbango wa Ngai ûkari. Îndî ûra akaamûkunyanîra gîku na ti kînyamaara akoona!”

²³Arutwa baanjîîria kûûrania, “N'ûû we kîrî tiû akaarûtha ûgu?”

²⁴Arutwa ba Yiesû baanjîîria gûkararania bakîûranagia n'ûû waciao aarî mûnene kîrî bara bangî.

²⁵Yiesû abeera, “Anene ba bara batarî Ayaundi baathanaga na wîkumia. Bara barî na watho bwa kwathana beendaga gwîtwa arûthi bwega.

²⁶Îndî biû bûtibatîîrue bwîgua bûkari ûgu. Ûra mûnene kîrî bara bangî nakare ta we mûniini kîrî bo. Ûra atongoragia bara bangî nakare ta we mûruti ngûgî wao.

²⁷Arîo rî, n'ûû mûnene? N'ûra akaraga meethaani areeterwa irio kana n'ûra abireetaga? Kîrî antû ba nthîgûrû ûra areetagîrwa n'we mûnene. Îndî niû, îîndî tûrî naabi nkari ta mûruti ngûgî wenu.”

²⁸Yiesû abeera, “Biû bwîgagua bûrî kîmwe naani rîra ndî mathîînaani.

²⁹Naani imbwete ûnene wata bûra na niû mpeetwe bu i Baaba.

³⁰Tûkaarîyanîra na tûnyunyanîre meethaani îmwe naabi ûneneeni bwakwa. Na bûgaakarîra itî bia ûnene bwathe mîîrîga ya Isiraeri îrî îkûmi na îîrî.”

³¹Yiesû eera Simioni Petûrû, “Simioni, thikîîria! Saitaani abangîîte kûgeria woora ûmwe wacienu aathûrane mwere na maûngû.

³²Îndî woû, Simioni, indombeete wîtîgio bwaku bûtikaathire. Nyuma ya kûgerua, weerira wîkîre aruanyûkwe wîru.”

³³Simioni amwîra, “Mwathani, indîîthuuranîrîte kûthi naawe nceera kana gûkua ûgîkua!”

³⁴Yiesû amwîra, “Ga ngûkwîra, Petûrû, ûtugû bûbû bwa îmunthî, mbere ya ngûkû îkurura ûgankaana maita mathatû.”

³⁵Rîru Yiesû aûria arutwa baake, “Nkûbûtûma rîra ndabûtûmire bûtarî na mbeeti, kana mbooro, kana iraatû, kûrî kîo bwaga?” Arutwa bamwîra, “Gûtirî kîo twaga.”

³⁶Yiesû abeera, “Îîndî ûra arî na mbeeti ya gwîkîra mbia kana mbooro nakamate. Na ûra atarî na rûyiû neendie îgooti agûre.

³⁷Ga nkûbwîra *Maandîko Maatheru mara maandîkîîtwe îgûrû rîakwa nwa mwanka maûyûre, mara maugîîte, ‘Aathûkiirue bûmwe na auni watho.’ ”

³⁸Arutwa bamwîra, “Teene, Mwathani! Aaga tûrî na ndûyiû ciîrî!” Yiesû abeera, “Nithirîre agu!”

³⁹Yiesû auma taûni înu aathi Karîmaani ka Mîceituuni wata bûra aamenyeereetie. Arutwa baake bamûthingata noogo.

⁴⁰Agûkinya ara aathiîte, eera arutwa baake, “Rombagaani bûtikaagwe magerioni.”

⁴¹Yiesû akûbeera ûgu aathûkana na bo. Aathiyathiyanga gataaria mma, bantû muntû akîgera iiga rîgakinya. Aaturia maru aaromba Ngai

⁴²akiugaga, “Baaba, ûkeegua wenda, ruta gîkombe gîkî gîa kînyamaara mbere yakwa. Îndî rûtha bûra ûkwenda, ti bûra nkwenda.” [

⁴³Mûraîka auma îgûrû aaya amûûmîîria.

⁴⁴Yiesû naarî na kîeba mûno. Aathi na mbere kûromba Ngai mûno îrûngû rîgîîtîgaga ta bûra nthanta cia nthakame iruaga.][12]

⁴⁵Yiesû akûthiria kûromba aarûngama aacooka kîrî arutwa baake. Akûthi eethîra bamaami i kîeba kîra kîabagwete.

⁴⁶Abaûria, “I kî n'ûntû bûmaami? Ûkîîraani bûrombe bwewa inya ya gûcinda magerio.”

⁴⁷Yiesû akîaragia woogû, kîrîndî gîa antû kîaya gîtongoreereetue i Njundas, ûmwe wa arutwa bara baake îkûmi na baîrî. Aathi kîrî Yiesû kaingo amûcunca.

⁴⁸Yiesû amûûria, “Njundas! Ûgaacunca Mwana wa Muntû na nûkûmûkunyanîra?”

⁴⁹Arutwa bakwona bûra kwathiîte gûkarîka, baûria Yiesû, “Mwathani, tûtemange antû baba na ndûyiû?”

⁵⁰Mûrutwa ûmwe wa Yiesû aatema mûruti ngûgî ûmwe wa mûthînjîri ûra mûnene wa Ngai, amûgiita gûtû kwa ûrîo.

⁵¹Yiesû auga, “Tigaani!” Aaringithia gûtû kwa muntû ûyu amworia.

⁵²Yiesû aûria *athînjîri bara banene ba Ngai, anene ba acikaarî bara baakaragia nyomba ya Ngai, na akûrû bara baayîîte kûmûgwata, “Ka ndî mûtunyani n'ûntû bwaya kûngwata bûrî na ndûyiû na ncûgûma?

⁵³Tûratindaga naabi nyomba ya Ngai ntugû cionthe na bûtirangwataga. Îndî n'îîndî kagiita keenu karî oogo, ta ko kagiita ka wathani bwa mwindu.”

⁵⁴Antû babu baagwata Yiesû bamwira nyomba ya mûthînjîri ûra mûnene wa Ngai. Petûrû abathingata arî gataaria.

⁵⁵Bagûkinya baabua mwanki kîaragooni. Petûrû aaya aakaranîîra na bo.

⁵⁶Mwarî ûmwe aarî mûruti ngûgî wa mûthînjîri ûyu, oona Petûrû akari agu mwankiini. Amûraitha kii, auga, “Wana muntû ûyû ibakûrî na Yiesû.”

⁵⁷Îndî Petûrû aakaana auga, “We, mûka, niû wana ntimwiyî.”

⁵⁸Nyuma ya kagiita gaakai muntû ûngî tatiga mwarî ûyu, oona Petûrû. Amwîra, “Woû ûrî ûmwe wa bara baayaniirie na Yiesû.” Petûrû auga, “Arî, niû ntirî wao.”

⁵⁹Nyuma ta ya îthaa rîmwe ûgu, muntû ûngî tatiga ûyu aaremeera na kuuga, “N'ûmma muntû ûyû ibakûrî na Yiesû, n'ûntû wana we i Mûûgariiri!”

⁶⁰Petûrû amwîra, “Niû wana ntikûmenya bûra ûkuuga!” Petûrû akîaragia woogu, warîru ngûkû yakurura.

⁶¹Mwathani aûndûka aaraitha Petûrû kii. Rîru i rîo Petûrû aaûkirwe aaririkana bûra Mwathani aamwîrîîte atî, “Ûtugû bwa îmunthî mbere ya ngûkû îkurura, ûgankaana maita mathatû.”

⁶²Petûrû auma nja aarîra na kîeba mûno.

⁶³Bara baakarîîtie Yiesû baanjîîria kûmûnyûrûnta na kûmûringanga

⁶⁴bakîmûkunîkaga meetho bakamwîra, “Taroria ûtwîre ûra akûringa!”

⁶⁵Bamwîra mantû maingî mûno bakîmûrumanga.

⁶⁶Gûgûkea rûûni, kîama gîa akûrû, *athînjîri bara banene ba Ngai, na aarimû ba watho baarîîkana amwe. Yiesû aareetwa.

⁶⁷Bamwîra, “Tatwîre kana i woû Kîrîstû.” Yiesû abeera, “Wana ndabwîra bûtimbîtîgia.

⁶⁸Na ndabûûria kîûria na kîo bûtincookeria.

⁶⁹Na kuuma îîndî, Mwana wa Muntû agaakara nthîgûrû rûteere rwa ûrîo rwa Ngai, mwene inya.”

⁷⁰Bonthe bamûûria, “Rîru rî, i woû Mwana wa Ngai?” Yiesû abeera, “Nwa woogu bwauga.”

⁷¹Bauga, “Ga kûrî ûkûûyî bûngî tûkwenda bwa mbi! Tiû twingwa tûkwîgua akiuga na kanyua gaake.”