Read tharaka RUKA 23 Bible Online

RUKA 23 - tharaka bible

RUKA 23

¹Gîkundi gîa antû bonthe bara baagambithagia Yiesû bamwira kîrî Piraatû.

²Bamûthitanga bauga, “Twîthîîre muntû ûyû akîrutana antû mantû mataagîrîte akîbeeraga batikaarûnge ûgooti kîrî Kaisaarî. Na ariugaga we n'we Kîrîstû, na i mûnene.”

³Piraatû aûria Yiesû, “I woû mûnene wa Ayaundi?” Yiesû amwîra, “Nwa ta ûgu wauga.”

⁴Piraatû eera *athînjîri bara banene ba Ngai na kîrîndî kîra kîîngî, “Niû ntikwona mabîtia mara muntû ûyû arûthîîte.”

⁵Bonthe baakinyîîria mantû mamu na inya mûno bauga, “Mantû mara arutanîîte antû ba Njundea yonthe imareeteete thîîna. Aanjîîrie mantû mamu Gariiri na îîndî nwa mo mama areeteete naaga.”

⁶Piraatû akwîgua ûgu, aûria, “Ka muntû ûyû arî wa kuuma Gariiri?”

⁷Akwîrwa Yiesû aarî wa kuuma rûteere rûra rwathagwa n'Eronde, auga nairwe kîrî Eronde n'ûntû Eronde naarî Njerusaremu kagiita gaku.

⁸Eronde akwona Yiesû aakena mûno n'ûntû kuumania na bûra eegîîtue, kwa îgiita rîîraaya neendeete mûno kwona Yiesû akîringa kîama.

⁹Yiesû akwirwa kîrî we, Eronde amûûria biûria biingî. Îndî Yiesû aarega kûmûcookeria.

¹⁰*Athînjîri bara banene ba Ngai na aarimû ba watho beethîrana agu baatuîrîîra Yiesû na taka.

¹¹Eronde na acikaarî baake baanyûrûnta Yiesû bamûbûthîîria. Bamwîkîra nguo ya goro îndaaya. Eronde auga acookue kîrî Piraatû.

¹²Kuuma ntugû înu, Eronde na Piraatû baatuma ûcoore n'ûntû ibaameneene mbereeni.

¹³Piraatû eeta *athînjîri bara banene ba Ngai, atongoria, na antû bonthe.

¹⁴Abeera, “Bûndeeteere muntû ûyû bwauga nakûrutanaga antû mantû mataagîrîte, îndî nkûmûûria wana biû bûrî oogo, ntiroona mabîtia mara arûthîîte kîrî mantû mara bûmûthitangîrîte.

¹⁵Na wana kinya Eronde atiroona mabîtia maake. I ntûma auga nacookue kîrî tiû. Gûtirî bu muntû ûyû arûthîîte bûra bûûmba gûtûma aûragwa.

¹⁶Kwoogu nkauga aringwe ibooko mmûrekeerie athi.” [

¹⁷Rîonthe kagiita ga kîatho gîa *Pasaka gaakinya, bwarî wîthîre mûgwate ûmwe athaûragwe.][13]

¹⁸Antû bonthe baugîîria bauga, “Naûragwe! Baraba nathaûrwe!” (

¹⁹Kûrî kagiita gîtuma gîaûkîîte taûni ya Njerusaremu. Baraba n'we eengîîre antû baagoma, na aarî mûûragani. Na gîku i kîo gîatûmîîte agwatwa athaîkwa nceera.)

²⁰Piraatû aaria na antû kaîrî akîenda kûrekeeria Yiesû.

²¹Îndî antû baugîîria bauga, “Mwambe! Mwambe!”

²²Rîa mathatû, Piraatû abaûria, “Ka muntû ûyû arûthîîte mabîtia marîkû? Ntikwona bûra arûthîîte bûra bûûmba gûtûma aûragwa! Kwoogu nkauga aringwe ibooko mmûrekeerie athi.”

²³Îndî amwe noogu kîrîndî kîathi na mbere na kuugîîria na inya mûno gîkiugaga Yiesû nambwe. Baacookeeria ûgu kaîrî na kaîrî, mwanka Piraatû eetîgîîria.

²⁴Piraatû aagiitîra Yiesû îgamba kûringana na bûra antû beendaga.

²⁵Aathaûra ûra antû baugire n'we bakwenda abathaûrîra, ûra aathaîkîîtwe atûmîîte antû baûkia gîtuma, mûûragani. Rîru aanenkanîra Yiesû kûringana na bûra antû beendaga.

²⁶Acikaarî bathiîte kwamba Yiesû baarîîkana na muntû eetagwa Simioni aumîîte mûndaani. Baathûkia mûtharaba wa Yiesû bamûkamatithia arî nyuma yake. Simioni aarî wa kuuma gûntû gweetagwa Kureni.

²⁷Antû baingî mûno baathingata Yiesû. Kîrî bo ikwarî na eekûrû baamûrîragîra barî na kwîthikîîra kûûnene.

²⁸Yiesû aûndûka eera eekûrû babu, “Biû eekûrû ba kuuma Njerusaremu bûtikaandîrîre. Îîrîrîreeni bwingwa na bûkîrîra aana beenu!

²⁹Îgiita rîgaakinya rîra antû bakauga ‘I baathaarime eekûrû bara bataagîa na twana. I baathaarime bara bataagîa na twana twa gwonkia!’

³⁰Îgiita rîru, kûrî antû bakeera irîma, ‘Tûthiîkeeni!’ Na bangî beere tûrîma, ‘Tûguîkîreeni!’

³¹Ûkoona i muntû ûmwagîru akûnyamaara ûûgû rî, î bara batarî baagîru bakaanyamaara bûgana ata?”[14]

³²Ikwarî na atunyani baîrî baathiîte kûûragwa Yiesû akîûragwa.

³³Bagûkinya bantû eetagwa ‘Kîîndî gîa kîongo’ baamba Yiesû na atunyani babu baîrî oogo. Mûtunyani ûmwe aarî rûteere rwa ûrîo, ûyu ûngî rwa ûmotho.

³⁴Yiesû aarombera bara baamwambire auga, “Barekere, Baaba! Batikûmenya bûra bakûrûtha.” Acikaarî baathûkia nguo cia Yiesû bairingîra kuura boona nguo îra muntû agaacinda, athi n'yo.

³⁵Kîrîndî kîarûngama kîîthaîra mantû. Atongoria ba Ayaundi baanyûrûnta Yiesû bauga, “Naroonokagia bara bangî. Taneebonokie ingî weegua n'we Kîrîstû ûra athuurîîtwe i Ngai.”

³⁶Acikaarî bakînyûrûnta Yiesû wana bo baathi bamûkundia ndibei yarî na gana.

³⁷Bamwîra, “Teebonokie ingî weegua ûrî Mûnene wa Ayaundi!”

³⁸Îgûrû rîa kîongo kîa Yiesû agu mûtharabaani ibaaringaringîrîte kabaaû kaandîkîîtwe, “ÛYÛ I MÛNENE WA AYAUNDI.”

³⁹Ûmwe wa atunyani babu aaruma Yiesû amwîra, “Anga ti woû Kîrîstû? Aabu ûteebonokie ûgîtwonokia na tiû!”

⁴⁰Mûtunyani ûyu ûngî aagondokera ûyu wa mbere akîmûkaania. Amûûria, “Woû ka ûtagûkuthûka Ngai wana weegua twagiitîrwa îgamba bûmwe n'we?

⁴¹Rîetû tiû twagiitîrwa kûringana na bûra tûrûthîîte. Îndî we gûtirî ûthûûku arûthîîte.”

⁴²Mûtunyani ûyu wa baîrî eera Yiesû, “Wakinya ûneneeni bwaku, ûndirikane!”

⁴³Yiesû amwîra, “Îmunthî ga ngûkwîra, ûkeegua ûrî amwe naani îkenero.”[15]

⁴⁴Kwanjîîria ta mûthenya gatî mwanka thaa kenda, mwindu waruma nthîgûrû înu yonthe.

⁴⁵Gîtambaa kîra kîagaanîîtie nyomba ya Ngai gîatembûkana maita maîrî.[16]

⁴⁶Yiesû aagondoka na inya mûno auga, “Baaba, ndaiga mwoyo wakwa ûmenyeeriini bwaku” Akuuga ûgu, aanyaarûka.

⁴⁷Mûtongoria wa acikaarî akwona bûra gwakarîkire aakumia Ngai. Auga, “Na mma muntû ûyû araarî ûmwagîru!”

⁴⁸Antû bonthe bara beethîreene oogo bakîona bûra gûgaakarîka bakwona ûgu beenûka bakîringaringaga ibara biao i kîîthikîîro.

⁴⁹Antû bonthe bara baiyeene na Yiesû na eekûrû bara baamûthingatîîte kuuma Gariiri baacûûbîîrîîtie barûngi gataaria.

⁵⁰Ikwarî na muntû eetagwa Njosebu wa kuuma gataûni ka Arimathea, gîteere kîa Njundea. Aarî muntû ûmwega na ûmwagîru.

⁵¹Aakaraga eeteereete kûûya kwa ûnene bwa Ngai. Aarî ûmwe wa akîama, îndî we ateetîganîîria na mûbango wa akîama bara bangî wa kûûraga Yiesû.

⁵²Muntû ûyu aathi kîrî Piraatû amwîra amwîtîgîîrie athûkie mwîrî wa Yiesû akauthike.

⁵³Njosebu aambûra mwîrî wa Yiesû, acuoga na nkûngû. Aukamata aathûngîria nthikooni yenjîîtwe rwaraani rwa iiga. Nthiko înu îtaathikîîtwe muntû ûngî.

⁵⁴Kwarî ntugû ya Ncumaa,[17] na *Sabatû nîarî akubî kwanjîîria.

⁵⁵Eekûrû bara baathingatîîte Yiesû kuuma Gariiri baathiyania na Njosebu. Boona nthiko na mwîrî wa Yiesû ûmaamîîtue ku.

⁵⁶Rîru baacooka mûciî baathuuranîra mîtaa na maguta ma gwaka mwîrî wa Yiesû. Ntugû ya Sabatû baanogoka n'ûntû i bu bwarî watho.