Read tharaka RUKA 24 Bible Online

RUKA 24 - tharaka bible

RUKA 24

¹Rûkîîrî mûno ntugû ya mbere ya kiumia, eekûrû babu baaraûka nthikooni bakamatîîte mîtaa îra baathuuranîrîte.

²Bagûkinya beethîra iiga irîraingiritiirue rîarutwa mûromooni wa nthiko.

³Bakûthûngîra ndeni batoona mwîrî wa Mwathani Yiesû.

⁴Barûngi waagu barigarîîte i mantû mamu, nthûti îmwe antû arûme baîrî baarûngama akubî na bo beekîrîte nguo ciayicaga mûno.

⁵Eekûrû babu baagwatwa n'ûguaya beenîka biongo biao. Antû babu babaûria, “I kî n'ûntû bûgûcûa muntû arî mwoyo antûûni baakuû.

⁶Atirî gûkû nariûkire. Ririkanaani bûra aabwîrire arî Gariiri.

⁷Aabwîrire, ‘Mwana wa Muntû nwa mwanka anenkanîrwe kîrî antû ba meeyia na aambwe mûtharabaani, îndî akaariûka ntugû ya ithatû.’ ”

⁸Rîru i rîo eekûrû babu baaririkanire bûra Yiesû augîîte.

⁹Bakuuma nthikooni baathi beera arutwa îkûmi na ûmwe ba Yiesû mantû mamu na bara bangî bonthe.

¹⁰Eekûrû babu baarî Maria Mûmagindari, Njoanina, Maria gina wa Njakubu na bangî. I bo beerire arutwa ba Yiesû mantû mamu.

¹¹Îndî arutwa bakwîrwa ntheto inu n'eekûrû babu boona i cia ûtheri, bataaciîtîgia.

¹²Petûrû auma agu na rwîro aathi nthikooni. Agûkinya aakuamîîria aaraithîîria ndeni. Akûraithîîria i nguo ira Yiesû oogeetwe na cio oonire cionka. Aacooka kaîrî arigarîîte i bûra gwakarîkîîte.

¹³Ntugû weenu arutwa bamwe baîrî ba Yiesû ibaathiîte gataûni geetagwa Emaûs. Gataûni gaku kaarî ta mairi mûgwanja kuuma taûni ya Njerusaremu.

¹⁴Baathiîte bakîaragia mantû monthe mara maakarîkîîte.

¹⁵Bakîaragîîria mantû mamu, Yiesû abagwatagwata baathiyania.

¹⁶Ibaamwonire îndî bataamûmenyaga.

¹⁷Yiesû abaûria, “N'ata bûthiîte bûkiugaga na njîra?” Arutwa babu baarûngama moothiû maao makîonanagia kîeba.

¹⁸Ûmwe wao eetagwa Kiriopas amwîra, “Inkûthûgaania i woû wenka Njerusaremu ûtaiyî mantû mara matuîkîkîîte.”

¹⁹Abaûria, “Mantû mabi?” Bamwîra, “Mantû mara maratuîkîkire kîrî Yiesû Mûnasareethi. Araarî kîroria kîrî inya înene. Mantû mara ararûthaga na mara araaragia imaroonanagia araumîîte kîrî Ngai na antû ibarakenaga n'we.

²⁰Îndî athînjîri bara banene ba Ngai na atongoria ibaatûmire atuîrwa kûûragwa na njîra ya kwambwa.

²¹Tûreerîgagîîra n'we agaatûkûûra, tiû Aisiraeri, tuume kîrî anthû beetû. Îîndî îmunthî i ntugû ya ithatû kuuma mantû mamu magûkarîka.

²²Eekûrû bamwe bacietû batûrigariirie mûno. Baraûkire nthikooni rûkîîrî mûno,

²³na batiroona mwîrî wa Yiesû. Bagûcooka baugire iboonire araîka babeera arî mwoyo.

²⁴Na wana bamwe beetû bakûthi nthikooni beethîîre gûkari wata ûgu eekûrû babu batwîrire. Îndî batiramwona.”

²⁵Yiesû abeera, “Biû bûtakîîte mûno n'ûntû bwa kûûmia biongo bienu bûkarega gwîtîgia mantû mara iroria biaroriirie.

²⁶Ga Kîrîstû ataabuîrîîte kûnyamaara i mantû mamu rîru acooka mwagooni wake?”

²⁷Yiesû abataûrîra bûra *Maandîko Maatheru maugîîte îgûrû rîake, kwanjîîria na mabuku mara maandîkirwe i Musa na mara monthe maandîkirwe n'iroria.

²⁸Barî akubî gûkinya gataûni gaku baathiîte, Yiesû aakara taka aakûrûkanîîtie.

²⁹Arutwa babu bateendaga athi. Bamwîra, “Raara n'ûntû riûa rîrî akubî kûthûa na igûgûtuga.” Yiesû eetîgîîria baaraara.

³⁰Bagûkara meethaani barîa, Yiesû aathûkia mûgaate aacookeria Ngai nkaatho, aung'enyûrania abanenkera.

³¹Rîru i rîo meetho maao maarancûkire bamûmenya. Bakûmûmenya bataamwona agu kaîrî.

³²Baûrania, “Tuuge i kîo n'ûntû nkoro cietû ikûringaga ûra rîra akwaragia naati njîraani agîtûtaûrîra Maandîko Maatheru?”

³³Bauma agu thaa wainu baacooka Njerusaremu. Beethîra arutwa bara îkûmi na ûmwe ba Yiesû beethîreene amwe na bara bangî baarî na bo.

³⁴Arutwa babu beethîreene babeera, “I mma Mwathani nariûkire. Noonirwe i Simioni!”

³⁵Arutwa babu baîrî na bo babeera bûra gwakarîkîîte barî njîraani na bûra baamenyangire i Mwathani aarî akîng'enyûrania mûgaate.

³⁶Wabakîaragia mantû mamu, nthûti îmwe boona Yiesû arûngi amwe na bo. Abeera, “Ûkiri bûrookara naabi!”

³⁷Baamaka n'ûntû baathûgaanagia i nkoma yarî.

³⁸Yiesû abaûria, “I mbi yabûmakia? Na i mbi n'ûntû bûtagwîtîgia?

³⁹Raithaani njara na magûrû maakwa bwone i niû ningwa. Ndingithiani bwîgue n'ûntû nkoma îtirî mwîrî na îtirî maîndî ta niû.”

⁴⁰Akuuga ûgu aboonia njara ciake na magûrû.

⁴¹Îndî wana rîo bateetîgia n'ûntû bwa bûra baakeneete na bûra baarigarîîte bûgana. Aacooka abaûria, “Bûrî na gîntû gîa kûrîa aaga?”

⁴²Bamûnenkera kînuku gîa îkûyû rîîruge.

⁴³Yiesû aathûkia aarîa bakîonaga.

⁴⁴Rîru Yiesû abeera, “Mama i mo mantû mara ndabwîraga rîra ndarakaranagia naabi. Rîra ndarabwîraga nwa mwanka mantû maakwa monthe maûyûre mara maandîkîîtwe *wathooni bwa Musa, mabukuuni ma iroria, na Cabuurîîni.”

⁴⁵Abaa ûûme bwa kûmenya *Maandîko mamu Maatheru.

⁴⁶Abeera, “Kwandîkîîtwe ûûgû, Kîrîstû akaanyamaarua îndî akaariûka ntugû ya ithatû.

⁴⁷Na kwa riîtwa rîakwa, kwanjîîria Njerusaremu antû bonthe bagaatûmîîrua mantû ma kwîrira na kûrekerwa meeyia.

⁴⁸Biû bûrî akûûyî ba mantû mama.

⁴⁹Na nkabûtûmîra Kîrundu Ûmûtheru, ûra Baaba augire akabwaa. Karaani aaga taûni mwanka rîra bûkeewa inya ya Kîrundu Ûmûtheru.”

⁵⁰Yiesû aathi na arutwa baake kuuma Njerusaremu mwanka Bethania. Bagûkinya aûkîîria njara ciake îgûrû abathaarima.

⁵¹Warîo Ngai amwathûrana na bo amwîtithia îgûrû.

⁵²Arutwa baake bamûgonga. Rîru baacooka Njerusaremu bakeneete mûno.

⁵³Îgiita rîao rîra riingî beegagua barî nyomba ya Ngai bakîmûkumagia.